ކަކުލަށް ލިބުނު އަނިޔާއިން ރަނގަޅުވެ ޕީއެސްޖީގެ ފަރިތަކުރުންތަކުގައި އާޖެންޓީނާގެ ތަރި ލިއޮނެލް މެސީ ބައިވެރިވެއްޖެއެވެ.
މެސީއަށް އަނިޔާވީ ލީގުގައި މިދިޔަ ހަފުތާގެ އާދިއްތަ ދުވަހުގެރޭ ލިޔޯން އަތުން ޕީއެސްޖީ މޮޅުވި މެޗުގައެވެ. އެ މެޗުގެ ފުރަތަމަ ހާފުގައި މެސީ ރަނގަޅު ކުޅުމެއް ދެއްކި ނަމަވެސް، މެޗުގެ ދެވަނަ ހާފުގައި މެސީ ވަނީ ބަދަލުކޮށްފައެވެ. އެކަމާ ގުޅިގެން މެސީ ހިތްހަމަނުޖެހިފައި ހުރިއިރު، ބަދަލުކުރި ވަގުތު މެސީ ވަނީ ޕީއެސްޖީގެ ކޯޗު މައުރީސިއޯ ޕޮޗެޓީނޯ ދެއްކި ވާހަކަތަކަށް މާ ބޮޑު ސަމާލުކަމެއް ނުދީ ބެންޗަށް ގޮސްފައެވެ.
އެ މެޗަށްފަހު ޕޮޗެޓީނޯ ވަނީ މެސީ ބޭލުމުން ހިތްހަމަނުޖެހުންތަކެއް އުޅޭ ކަމަށް ދެކެވޭ ވާހަކަ ދޮގުކޮށްފައެވެ. އެކަމަކު އެ ފަހަރު މެސީއަށް އަނިޔާވި ކަމަށް ޕޮޗެޓީނޯ ބުނެފައެއް ނުވެއެވެ. ނަމަވެސް ލީގުގައި ބުދަ ދުވަހުގެރޭ މެޓްޒްއާ ދެކޮޅަށް ޕީއެސްޖީ ކުޅުނު މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޮޗެޓީނޯ ބުނީ އެ މެޗުގައި މެސީ ބަދަލުކުރަން ޖެހުނީ އޭނާގެ ވާތު ކަކުލަށް ލިބުނު އަނިޔާއަކާ ގުޅިގެން ކަމަށެވެ.
އެ އަނިޔާއާ ގުޅިގެން މެސީއަށް ވަނީ ޕީއެސްޖީން ލީގުގައި މެޓްޒްއާ ދެކޮޅަށް ކުޅުނު މެޗާއި، މޮންޕެލިއޭއާ ދެކޮޅަށް ކުޅުނު މެޗުވެސް ގެއްލިފައެވެ. އެކަމަކު އަނިޔާއިން ރަނގަޅުވެ ހޯމަ ދުވަހު ޕީއެސްޖީން ކުރިއަށްގެންދިޔަ ފަރިތަކުރުންތަކުގައި މެސީ ވަނީ ބައިވެރިވެފައެވެ. އެހެންކަމުން އަންގާރަ ދުވަހުގެރޭ ޔުއެފާ ޗެމްޕިއަންސް ލީގުގައި މެންޗެސްޓާ ސިޓީއާ ދެކޮޅަށް ޕީއެސްޖީން ކުޅޭ މެޗުގައި މެސީ ފެނުމުގެ ފުރުސަތު ބޮޑު ކަމަށް ރިޕޯޓުތައް ބުނެއެވެ.
އަނިޔާއިން ރަނގަޅުވެ ޕީއެސްޖީގެ ފަރިތަކުރުންތަކުގައި މެސީ ބައިވެރިވިއިރު، ޗެމްޕިއަންސް ލީގުގައި ކުލަބު ބްރޫޖާ 1-1 ގެ ނަތީޖާއަކުން ޕީއެސްޖީ އެއްވަރުވި މެޗުގައި މެސީ ވަނީ ކުޅެފައެވެ. އެކަމަކު ޕީއެސްޖީގެ ޖާޒީގައި މިހާތަނަށް ކުޅުނު ތިން މެޗުގައިވެސް މެސީއަށް ލަނޑެއް ޖެހިފައެއް ނުވެއެވެ.
މި ސީޒަނުގެ ޗެމްޕިއަންސް ލީގުގެ ގްރޫޕް ޖީގައި ޕީއެސްޖީ އާއި ސިޓީ ހިމެނުމުން، ހޫނު މޫސުމުގެ ޓްރާންސްފާގައި ޕީއެސްޖީއާ ގުޅުނު މެސީ ނުކުންނަން ޖެހޭނީ އޭނާއަށް ބާސެލޯނާގައި އިރުޝާދުދިން ޕެޕް ގާޑިއޯލާގެ ސިޓީއާ ދެކޮޅަށެވެ. މި ފަހަރުގެ ޗެމްޕިއަންސް ލީގުގެ ގްރޫޕް ސްޓޭޖުގައި ޕީއެސްޖީ އާއި ސިޓީ ބައްދަލުކުރާއިރު، މިދިޔަ ސީޒަނުގެ ސެމީ ފައިނަލުގައިވެސް މި ދެ ޓީމު ވަނީ ބައްދަލުކޮށްފައެވެ. އެ ފަހަރު ކުޅުނު ދެ މެޗުންވެސް މޮޅުވީ ސިޓީއެވެ.
