ގޭގައި ކެފޭއުސޫލުން މަސްތުވާތަކެތި ވިއްކައި، ބޭނުންކުރުމުގެ ހުއްދަ ދިން މައްސަލައިގައި ދައުވާ އުފުލާފައިވާ މ. ބްރައިޓްފްލާވަރ ޙުސައިން ޔޫސުފްގެ މައްޗަށް ދައުވާ ކުރާ މައްސަލައިގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.

މައްސަލައިގެ ޚުލާސާއެއް:

މި މައްސަލައިގައި ދައުވާ އުފުލިއިރު ޕީޖީ އޮފީހުން ބުނެފައިވަނީ މ. ބްރައިޓްފްލާވަރ ގޭގައި ކެފޭއުސޫލުން މަސްތުވާތަކެތި ވިއްކައި ވިޔަފާރިކުރާކަމަށް ތުހުމަތުކުރެވުނު މައްސަލައިގައި, އެ ގޭގައި މީހުން މަސްތުވާތަކެތި ބޭނުންކޮށް، އެ ތަކެތީގެ ވިޔަފާރިކޮށް، އެ ތަކެތި ޕެޑްލް ކުރާކަމަށް ގަބޫލުކުރެވޭ ހާލަތު އޮވެ، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެކަން ހުއްދަކޮށްފައިވާ ކަމަށެވެ. އެގޮތުން މި މައްސަލައިގައި ހުސައިން ޔޫސުފުގެ މައްޗަށް ދައުވާ އުފުލާފައިވަނީ 2 ސެޕްޓެންބަރު 2021 ގައެވެ.

ޕީޖީ އޮފީހުން މައުލޫމާތު ދޭ ގޮތުގައި މިއީ ކެފޭ އުސޫލުން މާލޭގައި މަސްތުވާތަކެތި ވިއްކާ މައްސަލައިގައި, މަސްތުވާތަކެއްޗާބެހޭ ގާނޫނުގެ ދަށުން ގޭގެ ވެރިފަރާތުގެ މައްޗަށް ދަޢުވާކުރެވުނު ފުރަތަމަ ފަހަރެވެ.

ހޯމަ ދުވަހުގެ އަޑުއެހުން:

ހޯމަ ދުވަހުގެ އަޑުއެހުމަކީ މި މައްސަލައިގައި ބޭއްވި ފުރަތަަމަ އަޑުއެހުމެވެ. އެގޮތުން ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ސޮފްވަތު ޙަބީބުއެވެ. އެއާއެކު ޝަރީއަތުން ވަނީ މައްސަލައިގެ ލިއެކިއުންތައް ލިބިފައިވޭތޯ ކަށަވަރު ކުރައްވައި، ދައުވާލިބޭ ފަރާތަށް ލިބިގެންވާ ޙައްޤުތައް ސާފުކޮށްދެއްވާފައެވެ. އެގޮތުން ސީޑީތަކާއެކު 55 ލިއުމެއް ލިބިފައިވާކަމަށް ހުސައިން ޔޫސުފު ބުންޏެވެ.

ހޯމަ ދުވަހުގެ އަޑުއެހުމުގައި ދައުލަތުން ވަނީ ހުސައިން ޔޫސުފުގެ މައްޗަށް ކުރާ ދައުވާ ސާފުކޮށްދެއްވާފައެވެ. އެގޮތުން ދައުލަތުން ހުށަހަޅާފައިވާ ދައުވާއަކީ ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއް، ޖަދުވަލު 1 ގައިވާ މަސްތުވާއެއްޗެއް ނުވަތަ ޖަދުވަލު 2 ގައިވާ މަސްތުވާއެއްޗެއް، ޓްރެފިކްކުރުމަށް ނުވަތަ ޕެޑެލްކުރުމަށް ނުވަތަ އުފެއްދުމަށް ނުވަތަ ނުވަތަ އެއިން ކަމެއް ކުރުމަށް ބޭނުންކުރާކަން ގަބޫލުކުރެވޭ ހާލު، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެ ތަނެއްގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެ ތަނެއްގެ މަސްއޫލިއްޔަތު އުފުލާފަރާތުން ހުއްދަ ދިނުން ނުވަތަ ހުއްދަކުރުމުގެ ކުށުގެ ދައުވާއެވެ. އެ ދައުވާ ސާފުވެފައިވާކަމަށާއި، ވަކީލަކު ބޭނުންވާކަމަށް ހުސައިން ޔޫސުފު މި އަޑުއެހުމުގައި ބުނެފައިވެއެވެ.

މި މައްސަލައަކީ ޖިނާއީ ބޮޑެތި ކުށްތަކުގެ ގިންތީގައި ހިމެނޭ މައްސަލައެއް ނޫންކަން ބަޔާންކޮށް ދައުލަތުން ބުނީ، ބޮޑެތި ކުށްތަކުގެ ގިންތީގައި ހިމެނެނީ 10 އަހަރަށްވުރެ ބޮޑު އަދަބެއް ލިބޭ މައްސަލަތަކުގައި ކަމަށެވެ. އަދި ދައުލަތުން ވަކީލުން އައްޔަނު ކޮށްދެނީ ބޮޑެތި މައްސަލަތަކުގައި ނަމަވެސް، ހުސައިން ޔޫސުފަށް ދައުވާ ކުރާ މައްސަލައިގެ އަދަބަކީ ސީދާ 10 އަހަރަށްވާތީ މި މައްސަލައިގައި ވަކީލަކު އައްޔަނު ކުރުމާ ގުޅޭގޮތުން އޭޖީ އޮފީހަށް ހުށައަޅައިގެން ކުރިއަށް ގެންދެވިދާނެކަމަށް ޝަރީއަތުން ވަނީ ބުނެފައެވެ. ހުސައިން ޔޫސުފު ވެސް ވަނީ އެގޮތަށް ބޭނުންވާކަމަށް ބުނެފައެވެ.

ޝަރީއަތުން ވަނީ މައްސަލައިގައި ވަކީލަކު އައްޔަނު ކުރުމުގެ ފުރުސަތު ދެއްވުމަށްފަހު، ދައުވާ ސާފުކޮށް ދައުވާއަށް ޖަވާބުދާރީ ވުމުގެ ބައި ކުރިއަށް ގެންދިއުމަށް ނިންމަވާފައެވެ. އޭޖީ އޮފީހާ މަޝްވަރާ ކުރެއްވުމަށްފަހު ވަކީލަކު ހަމަނުޖެހިއްޖެނަމަ، އަމިއްލައަށް ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދިނުމަށް ޝަރީއަތުން ވަނީ ނިންމާފައެވެ.

ދެން މި މައްސަލައިގެ އަޑުއެހުމެއް އޮންނާނީ އޮކްޓޯބަރު 14 ގެ 11:00 ގައިކަމަށް ޝަރީއަތުން ވަނީ ނިންމާފައެވެ.