ބޮޑު ޚިޔާނާތުގެ މައްސަލަތައް ކުރިއަށް ނުގެންދިއުމަށް އެއްވެސް އިރަކު ނުނިންމަން: ދައުލަތް

އެމްއެމްޕީއާރްސީ ބޮޑު ޚިޔާނާތުގެ ތުހުމަތުކުރެވޭ ފަރާތްތަކުގެ މައްސަލަތައް ކުރިއަށް ނުގެންދިއުމަށް އެއްވެސް އިރަކު ނިންމާފައި ނުވާނެކަމަށް ދައުލަތުން ބުނެފިއެވެ.

ރައީސް ޔާމީނުގެ ފަރާތުން ހުށައަޅާފައިވާ 22 އިސްތިއުނާފީ ނުކުތާއަށް ދައުލަތުން ޖަވާބުދީފައިވާއިރު، ޝަރީއަތުން ވެސް ވަނީ ބައެއް ކަންކަން ސާފުކޮށްފައެވެ.

މި މައްސަލައިގައި ޝަރީއަތުން ކުރި ސުވާލުތަކަށް ޖަވާބުދެއްވަމުން ވަކީލުން ވިދާޅުވީ، އެމްއެމްޕީއާރްސީ ޚިޔާނާތާ ގުޅިގެން ތުހުމަތު ކުރެވޭ އެހެން ފަރާތްތަކުގެ މައްސަލަތައް ކުރިއަށް ނުގެންދިއުމަށް އެއްވެސް އިރަކު ނިންމަވާފައި ނުވާނެ ކަމަށެވެ. އެގޮތުން މިހާރުވެސް ފުލުހުންނާއި، އޭސީސީއާއި ރިޔާސީ ކޮމިޝަނުން މި މައްސަލައިގެ ޖޮއިންޓް ތަހުގީގު ކުރިއަށްދާކަން ފާހަގަކުރައްވައި ވަކީލު ވިދާޅުވީ، ރައީސް ޔާމީނު އޭރު ހުންނެވި މަޤާމުގެ ޙައިސިއްޔަތުން އެމަނިކުފާނުގެ އެކައުންޓަށް މިފަދައިން ފައިސާ ވަދެފައި ހުރުމަކީ ވެގެންވާނެ ކަމެއް ނޫން ކަމަށެވެ. އެއާއެކު، މި މައްސަލައިގައި އާންމު ފަރުދެއްގެ އެކައުންޓަށް ވަދެފައިވާ ފައިސާތައް ޓްރޭސް ކުރުމަށްވުރެ ރައީސް ޔާމީނުގެ އެކައުންޓަށް ވަތް ފައިސާ ދެނެގަތުން ފަސޭހަކަން ދައުލަތުން ފާހަގަކުރިއެވެ.

އެސްއޯއެފުން 1 މިލިއަން ޑޮލަރު ނޫން އަދަދެއް ޔާމީން އެކައުންޓަށް ޖަމާކުރިނަމަ ދައުވާ ކުރެވޭނެތޯ ކުރި ސުވާލަށް ޖަވާބު ދެއްވަމުން ދައުލަތުގެ ވަކީލު ވިދާޅުވީ، ކުށް ކޮށްގެން ހޯދާފައިވާ ފައިސާނަމަ، ކޮންމެ އަދަދެއްގެ ފައިސާއެއް ޖަމާވެފައި އޮތް ނަމަވެސް، ދައުވާ ކުރެވޭނެ ކަމަށެވެ.

އޭގެ އިތުރުން، އިސްތިއުނާފު ކުރި ފަރާތުންވެސް ބައެއް ކަންކަން ޝަރީއަތުން ސާފުކޮށްފައިވެއެވެ. އެގޮތުން ޔާމީނުގެ އެކައުންޓަށް ވަތް ފައިސާއަކީ އަދީބު އަތުން ލިބެންޖެހޭ ފައިސާކަމަށް ތަކުރާރުކޮށް ވިދާޅުވާއިރު، އެކަންކަން ލިއެކިއުމުން އެއްވެސް ވަރަކަށް އެނގެން އޮންނާނެތޯ ޝަރީއަތުން ވަނީ ސުވާލުކޮށްފައެވެ. އެކަމާ ގުޅޭގޮތުން ވާހަކަ ދައްކަވަމުން ރައީސް ޔާމީނު ވިދާޅުވީ، އެ ފައިސާއަކީ އެމަނިކުފާނުގެ ފައިސާ ކަމަށާއި، މުއާމަލާތު ކުރެވުނީ އެމަނިކުފާނުގެ ޕާޓީގެ ނާއިބްރައީސާ ކަމަށެވެ. ވީއިރު އާންމު އުސޫލުން ލިއެކިއުންތައް ނުހުންނާނެކަން ފާހަގަ ކުރައްވައި ރައީސް ޔާމީނު ވިދާޅުވީ، އެކަމާގުޅޭ ލިއެކިއުމެއް ނެތް ސަބަބަކީ އެއީ ކަމަށެވެ.

ރައީސް ޔާމީނު ވިދާޅުވީ، އެ ފައިސާ ދެއްވުމަށް އަދީބު ގާތުގައި އެދިފައިވާނީ ރައީސް އޮފީހުގެ ރަސްމީ އިންޓަކޮމްއިން ގުޅުއްވައިގެން ކަމަށެވެ. އަދި އަދީބު ދޭން އުޅެނީ އެސްއޯއެފްގެ ޗެކެއްކަން އެނގިވަޑައިނުގަންނަވާ ކަމަށްވެސް ރައީސް ޔާމީނު ވިދާޅުވިއެވެ. ރައީސް ޔާމީނުގެ އެކައުންޓު ނަންބަރު ވެސް ދެއްވީ ގުޅުއްވައިގެންކަން ފާހަގަކުރައްވައި ވިދާޅުވީ، އޭރުވެސް އަދީބު ޖަމާކުރަން އުޅެނީ އެސްއޯއެފްގެ ފައިސާކަން ކުޑަވެސް މިންވަރަކަށް އެނގިވަޑައިނުގަންނަވާ ކަމަށެވެ.

އެހިސާބުން ޝަރީއަތުން ވަނީ އެސްއޯއެފްގެ ޗެކް ޖަމާ ކުރުމުން އެ ކުންފުންޏަށް އެއްވެސް ސުވާލެއް ކޮށްފައިވާނެތޯ ސުވާލު ކުރައްވާފައެވެ. އެކަމާ ގުޅޭގޮތުން ރައީސް ޔާމީން ވިދާޅުވީ، އެސްއޯއެފްއާ އެއްވެސް މުއާމަލާތެއް ކޮށްފައި ނުވާނެ ކަމަށާއި، އޭރު ކުންފުނީގެ އެންމެން ރާއްޖެއިން ބޭރަށް ފުރައިގެން ގޮސްފައިވާ ކަމަށެވެ. އަދި އޭސީސީގެ ރައީސް ޙަސަން ލުތުފީ އެ ޗެކްތަކުގެ ވާހަކަ ސަމާލުކަމަށް ގެނައިރުވެސް މު މުއާމަލާތްތަކުގައި އެއްވެސް ނޭއްގާނީ ކަމެއް ހިނގާފައިވާ ކަމުގެ ޝައްކެއް ނުކުރެވޭކަމަށް ރައީސް ޔާމީނު ވިދާޅުވިއެވެ. ނަމަވެސް އެކަން ވެފައި އޮތް ގޮތެއް ބެލުމަށް އޭސީސީ ކިބައިން އެދިފައިވަނީ އެވާހަކަ ސަމާލުކަމަށް ގެނައީ އޭސީސީގެ އިސް ފަރާތަށްވެފައި ރައީސް ޔާމީނުގެވެސް ހެޔޮ ނިޔަތުގައި ކަމަށް އެމަނިކުފާނު ވިދާޅުވިއެވެ.

މި މައްސަލައިގައި ދެފަރާތުން ފާހަގަކުރި ކަންކަމާއި ގުޅޭގޮތުން ޝަރީއަތުން ސާފުކުރަން ބޭނުންވާ ކަންކަން ސާފު ކުރުމަށްފަހު، އަޑުއެހުން ނިންމަވާލެއްވީ އަންނަ އޮކްޓޯބަރު މަހުގެ 4 ވަނަ ދުވަހަށް އަޑުއެހުމެއް ތާވަލު ކުރައްވާފައެވެ. މި އަޑުއެހުމުގައި ދެފަރާތުން ޚުލާސާ ގޮތެއްގައި ވާހަކަ ދެއްކެވުމަށް ފަހު ފުރުސަތު ދެވިގެންދާނެއެވެ. އަދި ޔާމީނުގެ ފަރާތުން ހުށައަޅާފައިވާ ކަފާލާތާއި ޙުކުމް ތަންފީޒު ކުރުން ފަސްކޮށްދެއްވުމުގެ އަމުރާއި ގުޅޭގޮތުން ގޮތެއް ނިންމެވުމާއި، ރައީސް ޔާމީނުގެ ފަރާތުން ހުށައަޅާފައިވާ އައު ހެކިތަކާއި ގުޅޭގޮތުން ގޮތެއް ނިންމެވުން އޮންނާނެކަމަށް ޝަރީއަތުން ވަނީ ވިދާޅުވެފައެވެ.