13 އަހަރުގެ ކުއްޖާގެ މަރު: ޒިހާން ވަކީލަކު ބޭނުމެއް ނުވޭ
މަރާ ގުޅިގެން ދައުވާ އުފުލާފައިވަނީ ޒިހާންގެ އިތުރުން 17 އަހަރުގެ ފިރިހެން ކުއްޖެއްގެ މައްޗަށް
ކްރިމިނަލް ކޯޓުގައި ކުރިއަށްގެންދާ މި އަޑު އެހުންތައް ކުރިއަށްގެންދަނީ ސިއްރުކޮށްގެން
އުމުރުން 13 އަހަރުގެ ކުޑަ ކުއްޖަކު ރަހުމްކުޑަ ގޮތަކަށް މަރާލި މައްސަލައިގެ މަރުގެ ދައުވާ އުފުލާފައިވާ ނ. ލަންދޫ، ބަގީޗާގޭ އުމުރުން 27 އަހަރުގެ އިބްރާހީމް ޒިހާން ދައުލަތުގެ ވަކީލަކު ބޭނުން ނުވާކަމަށް ބުނެފިއެވެ.
މި މައްސަލައިގެ އާދީއްތަ ދުވަހު އޮތް އަޑުއެހުންވެސް ކުރިއަށްގެންދިޔައި ސިއްރުކޮށްގެންނެވެ. ނަމަވެސް ޕީޖީ އޮފީހުން ވަނީ ޝަރީއަތް ހިނގި ގޮތުގެ ޚުލާސާ ރާއްޖެ އެމްވީއަށް ކިޔައިދީފައެެވެ. އެ އަޑުއެހުމުގައިވެސް ކުރިއަށްގެންދެވުނީ އިބްތިދާއީ ބައެވެ. ފުރަތަމަ އިބްތިދާއީ އަޑުއެހުމުގައި އިބްރާހީމް ޒިހާންއަށް ވަކީލަކު އައްޔަންކުރަން ފުރުސަތު ދިނުމުން، ވަކީލަކު ބޭނުން ނުވާކަމަށް ބުނެފައިވެއެވެ. ނަމަވެސް ދައުލަތުން ވަނީ އޭނާގެ މައްޗަށް ކޮށްފައިވާ ދައުވާތަކުގެ ބޮޑު ކަމުންނާއި ޤަޞްދު މަރުގެ ދަޢުވާ ކުރެވޭތީ, ދިފާއީ ވަކީލެއް އައްޔަން ކުރުން މުހިންމު ކަމަށް ބުނެފައެވެ.
އާދީއްތަ ދުވަހުގެ އަޑުއެހުމުގައިވެސް ޒިހާން ވަނީ ވަކީލަކު ބޭނުން ނުވާކަމަށް ބުނެފައެވެ. ޕީޖީ އޮފީހުން ޝަރީއަތުގައި ބުނެފައިވަނީ ގާނޫނު އޮންނަ ގޮތުން މިފަދަ މައްސަލަ ތަކުގައި، ތަހުގީގު މަރުހަލާގައި ވަކީލަކު އައްޔަން ކުރަން ލާޒިމް ނަމަވެސް ޝަރީއަތުގެ މަރުހަލާގައި ވަކީލަކު އައްޔަންކުރުން ލާޒިމް ނޫން ކަމަށެވެ. އެހެންކަމުން ދައުވާ ލިބޭ ފަރާތުން އެ ފުރުސަތު ދޫކޮށްލާ ހާލަތުގައި، ވަކީލަކު އައްޔަން ކުރުމާމެދު އަމަލުކުރަންޖެހޭ ގޮތް ޤާނޫނުގައި ނެތް ކަމަށެވެ.
ދިފާއުގައި ދައުލަތުގެ ވަކީލަކު ބޭނުން ނުވާ ކަމަށް ޒިހާން ބުނުމުން، އޭނާގެ ނުގަބޫލުގައި ދައުލަތުގެ ވަކީލަކު އައްޔަނު ކުރުމަށް ގާނޫނީ ގޮތުން ހުރަހެއް އޮތްތޯ ބެލުމަށް ދައުލަތުން ވަނީ ނިންމާފައެވެ. އަދި އެކަމަށް އެޓާނީ ޖެނަރަލް އޮފީހުގެ ލަފައެއް ހޯދުމަށް ވަނީ ނިންމާފައެވެ.
ޖިނާއީ ބޮޑުތި މައްސަލަތަކުގައި ވަކީލަކާއި ނުލައި ކުރިއަށް ނުގެންދެވޭއިރު، އަމިއްލައަށް ވަކީލަކު ހޯދުމުގެ ގާބިލްކަން ނެތްނަމަ, ނުވަތަ ވަކީލަކު ނުހޯދިއްޖެ ނަމަ ދައުލަތުން ވަކީލަކު ހަމަޖައްސައިދޭނެއެވެ.
އާދީއްތަ ދުވަހު ކުރިއަށް ގެންގޮސްފައިވަނީ ބަންދު މުރާޖައާ ކުރުމެވެ. އަދި ގާޒީ ނިންމާފައިވަނީ ޝަރީއަތް ނިމެންދެން, އޭނާ ބަންދުކޮށްފައި ހުރި ހުރުން ދެމެހެއްޓުމަށެވެ. ޕީޖީ އޮފީހުން ބުނީ، ގާނޫނު އޮންނަ ގޮތުން މިފަދަ މައްސަލަ ތަކުގައި، ތަހުގީގު މަރުހަލާގައި ވަކީލަކު އައްޔަން ކުރަން ލާޒިމް ނަމަވެސް ޝަރީއަތުގެ މަރުހަލާގައި ވަކީލަކު އައްޔަންކުރުން ލާޒިމް ނޫން ކަމަށެވެ.
އުމުރުން 13 އަހަރުގެ ކުއްޖާގެ މަރާ ގުޅިގެން ދައުވާ އުފުލާފައިވަނީ އިބްރާހީމް ޒިހާންގެ އިތުރުން 17 އަހަރުގެ ފިރިހެން ކުއްޖެއްގެ މައްޗަށެވެ. ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލާފައިވާއިރު މި ދައުވާތައް ސާބިތު ވެއްޖެނަމަ 100 ވަރަކަށް އަހަރުގެ ޖަލު ހުކުމެއް އަންނާނެ ކަމަށް ޕްރޮސެކިއުޓަރ ޖެނެރަލް ޙުސައިން ޝަމީމް ވަނީ ވިދާޅުވެފައެވެ. ޕީޖީ ވިދާޅުވެފައިވަނީ، ދައުވާ ސާބިތުކުރެވޭ ވަރަށް ހެކި އެބަހުރި ކަމަށެވެ.
ކުއްޖާ މަރާލުމަށްފަހު ފޮއްޓަކަށް ލާފައި އޮއްވައި ފެނުނީ ހުޅުމާލޭ ދެވަނަ ފިޔަވަހީގެ މޫދުންނެވެ. އެ ކުއްޖާގެ ހަށިގަނޑު ފެނިފައިވަނީ މިދިޔަ ޖޫން މަހުގެ 21 ވަނަ ދުވަހުގެރޭ ދަންވަރުގެ ވަގުތެއްގައެވެ. މި މައްސަލައިގެ ދައުވާ އުފުލާފައިވަނީ އޮގަސްޓު މަހުގެ 19 ވަނަ ދުވަހުއެވެ.
މަރުވި ކުއްޖާގެ ޕޯސްޓްމޯޓަމް ހަދަން ފޮނުވީ ޖުލައި 5 ވަނަ ދުވަހުއެވެ. ޕޯސްޓްމޯޓަމް ހެދުމަށްފަހު މާލެ ގެނެސް ވަޅުލާފައިވަނީ ޖުލައި 12 ވަނަ ދުވަހުއެވެ.
