އަޑިޔަށް ދިޔަ ސަފާރީން ބިދޭސީއަކު މަރުވެއްޖެ
ނިޔާވީ އުމުރުން 41 އަހަރުގެ ބިދޭސީ ފިރިހެނެއް
ބޮލިފުށި ކައިރިން އަޑިޔަށް ދިޔަ ސަފާރީ
އަޑިޔަށް ދިޔަ ސަފާރީން މާލެ ގެނައި އެކަކު ނިޔާވެއްޖެއެވެ.
ރާއްޖެއެމްވީއަށް މައުލޫމާތު ދެމުން އައިޖީއެމްޗުގެ އިންފޮރމޭޝަން އޮފިސަރ ވިދާޅުވީ ނިޔާވީ އުމުރުން 41 އަހަރުގެ ބިދޭސީ ފިރިހެނެއް ކަމަށެވެ. އަދި މި ހާދިސާއާ ގުޅިގެން ޖުމްލަ ހަތް މީހުން ހޮސްޕިޓަލަށް ގެނައި ކަމަށެވެ. އެ ސަފާރީން ޖުމްލަ 17 މީހުން ދަތުރުކުރިއިރު ހާދިސާގެ ރިޕޯޓް ލިބިފައިވަނީ އާދިއްތަ ދުވަހުގެ 08:39 ހާއިރު ކަމަށް އެމްއެންޑީއެފުން ވަނީ ބުނެފައެވެ.
މި ސަފާރީ އަޑިއަށް ދިޔައީ ބޮލިފުށި ކައިރިން ފުރައިގެން މާލެއަށް ދަތުރުކުރަމުން ދަނިކޮށެވެ. އެމީހާ ބުނީ ދެން ތިބި މީހުން މާލެ ގެނެސްފައިވަނީ އެމްއެންޑީއެފްގެ ކޯސްޓްގާޑާއި އެހެން ދޯންޏެއްގެ އެހީތެރިކަމާއެކު ކަމަށެވެ.
މޫސުން ގޯސްވެ، ކަނޑުމަތީގެ ތަފާތު ހާދިސާތަކުގެ މަޢުލޫމާތު އެމްއެންޑީއެފްގެ ކޯސްޓްގާޑަށް ލިބެމުންދާތީ، ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް އެމްއެންޑީއެފް އިން ވަނީ އިލްތިމާސްކޮށްފައެވެ.
އަދި ކުރިއަށްއޮތްތަނުގައި ވައިގަދަވެ، ކަނޑުތައް ގަދަވާނެކަމަށް މޫސުމާ ބެހޭ އިދާރާއިން ލަފާކޮށްފައިވާތީ ކަނޑުދަތުރުކުރައްވާ އެންމެހާ ފަރާތްތަކުން މޫސުމާބެހޭ އެންމެ ފަހުގެ މަޢުލޫމާތު ހޯދުމަށްފަހު ދަތުރުތައް ރޭވުމަށް ވެސް އެމްއެންޑީއެފްއިން އިލްތިމާސްކުރެއެވެ.
