އިޒްރޭލުން އަނެއްކާވެސް ފަލަސްތީނުގެ އާންމުންތަކެއް ޝަހީދުކޮށްލައިފިއެވެ.
އަލްޖޒީރާގައި ރިޕޯޓުކޮށްފައިވާ ގޮތުން އާދިއްތަ ދުވަހުގެ ދަންވަރުގެ ވަގުތެއްގައި އިޒްރޭލުން ދިން ހަމަލާތަކެއްގައި ފަަލަސްތީނަށް ނިސްބަތްވާ 3 މީހަކު ޝަހީދުވެފައިވާކަން މިހާތަނަށް ވަނީ ކަށަވަރު ކުރެވިފައެވެ. މި ހަމަލާތައް ދީފައިވަނީ ޖެނިންއާއި ހުޅަނގު ޤުދުސްގެ ސަރަޙައްދެއްގައެވެ.
ޝަހީދުވެފައިވާ މީހުންގެ ތެރެއިން 2 މީހަކު މިހާތަނަށް ދެނެގަނެވިފައިވާއިރު، އޭގެ ތެރޭގައި ހިމެނެނީ 22 އަހަރުގެ އުސާމާ ސޮބާޙުއާއި، އަހުމަދު ޒަހްރާންއެވެ. ރިޕޯޓުތައް ބުނާގޮތުން ޝަހީދުވި މީހުންގެ ހަށިތައް ވެސް އިޒްރޭލު މީހުން ވަނީ އެމީހުންގެ ބާރުގެ ދަށަށް ގެންގޮސްފައެވެ. އެމީހުން ޝަހީދު ކޮށްލާފައިވަނީ އިޒްރޭލުން ދިން ބަޑީގެ ޙަމަލާތަކެއްގައިކަން އަލްޖަޒީރާގައި ރިޕޯޓު ކޮށްފައިވެއެވެ.
އިޒްރޭލުގެ މީޑިއާތަކާ ޙަވާލާދީ އަލްޖަޒީރާގައި ރިޕޯޓު ކޮށްފައިވާ ގޮތުން މި ހަމަލާތަކަކީ އެ ޤައުމުގައި އުޅޭ ހަމާސް ޖަމާއަތުގެ ހަނގުރާމަވެރިންނަށް އަމާޒުކޮށްގެން ދިން ހަމަލާތަކެކެވެ.
މިދިޔަ މަހުވެސް އިޒްރޭލުން ވަނީ ފަލަސްތީނަށް ނިސްބަތްވާ 4 މީހަކު ޝަހީދުކޮށްލާފައެވެ. އެ އެންމެންނަކީ ވެސް ރެފިއުޖީ ކޭމްޕުތަކުގައި އުޅެމުންދިޔަ މީހުންނެވެ.
