އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން އެސްޓަން ވިލާ އަތުން މެންޗެސްޓާ ޔުނައިޓެޑް ބަލިވިއިރު، ޗެލްސީ އަތުން އެންމެ ފަހުގެ ޗެމްޕިއަން މެންޗެސްޓާ ސިޓީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ޔުނައިޓެޑް ބަލިވީ 1-0 ގެ ނަތީޖާއަކުންނެވެ. މިއީ ލީގުގައި ޔުނައިޓެޑުގެ ދަނޑުގައި 2009 ވަނަ އަހަރުގެ ފަހުން ވިލާއަށް ލިބުނު ފުރަތަމަ މޮޅެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ވިލާގެ މެޓް ޓާގެޓަށް ވަނީ ލަނޑެއް ޖަހަން ހުސް ފުރުސަތެއް ލިބި ބޭކާރުވެފައެވެ. އަދި ހަމަ މި ހާފުގައި ޔުނައިޓެޑުގެ ބްރޫނޯ ފެނާންޑޭސް އާއި، ޕައުލް ޕޮގްބާ އަދި އިތުބާރު ފޯވާޑް ކްރިސްޓިއާނޯ ރޮނާލްޑޯއަށްވެސް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ.

މި މެޗުގައި ވިލާއިން ލީޑު ނަގާފައިވަނީ މެޗު ނިމެން ދެ މިނެޓަށް ވެފައި ވަނިކޮށެވެ. ޑަގްލަސް ލުއީޒް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ކޯޓްނީ ހޯސްއެވެ.

އެކަމަކު މެޗުގެ އިތުރު ވަގުތުގައި ނަތީޖާ އެއްވަރުކުރަން ޔުނައިޓެޑަށް ވަނީ ޕެނަލްޓީއެއް ލިބިފައެވެ. އޭރިއާ ތެރެއިން ވިލާގެ ކޯޓްނީ ހޯސްގެ އަތުގައި ބޯޅަ ޖެހުމުން ރެފުރީ ޔުނައިޓެޑަށް ޕެނަލްޓީއެއް ދިން ނަމަވެސް، އެ ޓީމުގެ ބްރޫނޯ ފޮނުވާލި ޕެނަލްޓީ ދިޔައީ ހުރަސް ދަނޑި މަތިން ބޭރަށެވެ.

މި މެޗުން ޔުނައިޓެޑް ބަލިވިއިރު، އެންމެ ފަހުން އިނގިރޭސި ލީގު ކަޕުގައި އަމިއްލަ ދަނޑުގައި ކުޅުނު މެޗުންވެސް އެ ޓީމު ވަނީ ބަލިވެފައެވެ. ލީގު ކަޕުގެ ތިންވަނަ ބުރުން ޔުނައިޓެޑް ކެޓީ އަމިއްލަ ދަނޑުގައި ކުޅެ ވެސްޓް ހޭމް ޔުނައިޓެޑް އަތުން 1-0 ގެ ނަތީޖާއަކުން ބަލިވުމުންނެވެ.

މީގެ އިތުރުން ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ޗެލްސީ އަތުން ސިޓީ މޮޅުވީ 1-0 ގެ ނަތީޖާއަކުންނެވެ. މި މެޗުގެ ކުރިން އެންމެ ފަހުން ޗެލްސީއާ ދެކޮޅަށް ކުޅުނު ތިން މެޗުންވެސް ސިޓީ ވަނީ ބަލިވެފައެވެ.

ޗެލްސީގެ ދަނޑުގައި ކުޅުނު މި މެޗު ފަށައިގެން ސިޓީން މެޗު ކޮންޓްރޯލް ކޮށްގެން ކުޅުނު ނަމަވެސް، ފުރަތަމަ ހާފުގައި ޗެލްސީ ގޯލާ އަމާޒުކޮށް ސިޓީއަށް ނުރައްކާތެރި ހަމަލާތަކެއް ފޮނުވާލެވިފައެއް ނުވެއެވެ. އަދި ޗެލްސީއަށްވެސް މާ ގިނަ ހަމަލާތަކެއް ފޮނުވާލެވިފައި ނުވި ނަމަވެސް، އެ ޓީމުގެ ޓިމޯ ވާނާ އާއި ރޮމެލޫ ލުކާކޫއަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ.

މި މެޗުގައި ފެނިގެންދިޔަ ހަމައެކަނި ލަނޑު ސިޓީން ކާމިޔާބުކޮށްފައިވަނީ ދެވަނަ ހާފު ފަށައިގެން އަށްވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ގަބްރިއެލް ޖީސޫސްއެވެ. އަދި އޭގެ ފަހުން ލީޑު ފުޅާކުރަން ޖެކް ގްރީލިޝް ނުރައްކާތެރި ހަމަލާއެއް ފޮނުވާލި ނަމަވެސް، ޗެލްސީގެ ގޯލްކީޕަރު އެޑޮއާޑް މެންޑީ ވަނީ އެ ހަމަލާ ހުއްޓުވާފައެވެ.

މަ ނަތީޖާތަކާއެކު ދެވަނައިގައި އޮތް ސިޓީ އާއި، ތިންވަނައިގައި އޮތް ޗެލްސީ އަދި ހަތަރުވަނައިގައި އޮތް ޔުނައިޓެޑަށް ވަނީ ކުޅުނު ހަ މެޗުން 13 ޕޮއިންޓް ލިބިފައެވެ. އެއްވަނައިގައި އޮތް ލިވަޕޫލަށް ފަސް މެޗުން 13 ޕޮއިންޓް ލިބިފައިވާއިރު، ލީގުގައި ހޮނިހިރު ދުވަހުގެރޭ ބްރެންޓްފޯޑާ ދެކޮޅަށް ކުޅޭ މެޗުން މޮޅުވެގެން އެ ޓީމަށް ތިމް ޕޮއިންޓުގެ ލީޑެއް ނެގޭނެއެވެ.