މެސީއަށް މޮންޕެލިއޭއާ ދެކޮޅަށްވެސް ނުކުޅެވޭނެ
25 ސެޕްޓެމްބަރު 2021 | ހޮނިހިރު 11:35ސިޓީއާ ދެކޮޅަށް ކުޅޭ މެޗަށްވެސް މެސީ ފިޓުވާނެކަމާމެދު ޝައްކު
ޕީއެސްޖީއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީ
ކަކުލަށް ލިބުނު އަނިޔާއަކާ ގުޅިގެން ފްރެންޗް ލީގުގައި ހޮނިހިރު ދުވަހުގެރޭ މޮންޕެލިއޭއާ ދެކޮޅަށް ކުޅޭ މެޗުގައި އާޖެންޓީނާގެ ތަރި ލިއޮނެލް މެސީއަށް ނުކުޅެވޭނެ ކަމަށް ޕީއެސްޖީން ބުނެފިއެވެ.
މެސީއަށް އަނިޔާވީ ލީގުގައި މިދިޔަ ހަފުތާގެ އާދިއްތަ ދުވަހުގެރޭ ލިޔޯން އަތުން ޕީއެސްޖީ މޮޅުވި މެޗުގައެވެ.
އެ މެޗަކީ މި ފަހަރުގެ ޓްރާންސްފާ ބާޒާރުގައި ބާސެލޯނާ ދޫކޮށް ޕީއެސްޖީއަށް ބަދަލުވި މެސީ، އެ ޓީމުގެ އަމިއްލަ ދަނޑުގައި ކުޅުނު ފުރަތަމަ މެޗެވެ. އަދި އެ މެޗަކީ ލީގުގައި ޕީއެސްޖީގެ ފުރަތަމަ އެގާރައިގައި ހިމެނިގެން މެސީ ކުޅުނު ފުރަތަމަ މެޗެވެ. އެ މެޗުގެ ފުރަތަމަ ހާފުގައި މެސީ ރަނގަޅު ކުޅުމެއް ދެއްކި ނަމަވެސް، މެޗުގެ ދެވަނަ ހާފުގައި މެސީ ވަނީ ބަދަލުކޮށްފައެވެ. އެކަމާ ގުޅިގެން މެސީ ހިތްހަމަނުޖެހިފައި ހުރިއިރު، ބަދަލުކުރި ވަގުތު މެސީ ވަނީ ޕީއެސްޖީގެ ކޯޗު މައުރީސިއޯ ޕޮޗެޓީނޯ ދެއްކި ވާހަކަތަކަށް މާ ބޮޑު ސަމާލުކަމެއް ނުދީ ބެންޗަށް ގޮސްފައެވެ.
އެ މެޗަށްފަހު ޕޮޗެޓީނޯ ވަނީ މެސީ ބޭލުމުން ހިތްހަމަނުޖެހުންތަކެއް އުޅޭ ކަމަށް ދެކެވޭ ވާހަކަ ދޮގުކޮށްފައެވެ. އެކަމަކު އެ ފަހަރު މެސީއަށް އަނިޔާވި ކަމަށް ޕޮޗެޓީނޯ ބުނެފައެއް ނުވެއެވެ. ނަމަވެސް ލީގުގައި ބުދަ ދުވަހުގެރޭ މެޓްޒްއާ ދެކޮޅަށް ޕީއެސްޖީ ކުޅުނު މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޮޗެޓީނޯ ބުނީ އެ މެޗުގައި މެސީ ބަދަލުކުރަން ޖެހުނީ އޭނާގެ ވާތު ކަކުލަށް ލިބުނު އަނިޔާއަކާ ގުޅިގެން ކަމަށެވެ.
އެ މެޗުގައިވެސް މެސީއަށް ލަނޑެއް ކާމިޔާބުކުރެވިފައި ނުވާއިރު، ޕީއެސްޖީގެ ޖާޒީގައި މިހާތަނަށް ކުޅުނު ތިން މެޗުގައިވެސް މެސީއަށް ލަނޑެއް ޖެހިފައެއް ނުވެއެވެ. ކަކުލަށް ލިބުނު އަނިޔާއާ ގުޅިގެން މެސީއަށް މޮންޕެލިއޭއާ ދެކޮޅަށް ކުޅޭ މެޗު ގެއްލޭއިރު، މި ހަފުތާގައި ޔުއެފާ ޗެމްޕިއަންސް ލީގުގައި މެންޗެސްޓާ ސިޓީއާ ދެކޮޅަށް ޕީއެސްޖީން ކުޅޭ މެޗަށްވެސް އޭނާ ފިޓުވާނެކަމާމެދު ވަނީ ސުވާލު އުފެދިފައެވެ.
ލީގުގައި ބުދަ ދުވަހުގެރޭ ކުޅުނު މެޗުން މެޓްޒް އަތުން ފަހު ވަގުތު ޕީއެސްޖީ މޮޅުވިއިރު، ލީގުގައި މިހާތަނަށް ކުޅުނު ހަތް މެޗުންވެސް ޕީއެސްޖީ ވަނީ މޮޅުވެފައެވެ. އެއާއެކު ތާވަލުގެ އެއްވަނައިގައި ޕީއެސްޖީ އޮތީ ހަތް މެޗުން ލިބުނު 21 ޕޮއިންޓާއެކުއެވެ.
ލީގުގައި ހޮނިހިރު ދުވަހުގެރޭ އަމިއްލަ ދަނޑުގައި ޕީއެސްޖީން މޮންޕެލިއޭއާ ދެކޮޅަށް ނުކުންނައިރު، މި މެޗު ފަށާނީ ހޮނިހިރު ދުވަހުގެރޭ ރާއްޖެ ގަޑިން 00:00 ގައެވެ.
