ރަސްފަރި ފަރަށް އުރުނު ބޯޓާއި ގުޅިގެން އެ ފަރުގެ ސަރވޭގެ މަސައްކަތް ނިންމާލެވިފައިވާކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވެއްޖެއެވެ.
ޕެނަމާއަށް ނިސްބަތްވާ އެމްވީ ނޭވިއަސް އަމަރިލިސް ނަމަކަށް ކިޔާ އާގުބޯޓު ފަރަށް އަރާފައިވަނީ އޮގަސްޓު މަހުގެ 19 ވަނަ ދުވަހުއެވެ. އެ ދުވަހުން ފެށިގެން ބޯޓު ފުންކުރުމުގެ މަސައްކަތް ވަނީ ކުރިއަށްގެންގޮސްފައެވެ. ބޯޓު ފަރަށް އެރިތާ 10 ވަނަ ދުވަހު، މިދިޔަ މަހުގެ 29 ވަނަ ދުވަހު ވަނީ ބޯޓު ފުންކޮށްފައެވެ. ބޯޓު ފުންކުރުމަށްފަހު އީޕީއޭއިން ވަނީ ފަރަށް ލިބުނު ގެއްލުން ބަލަން ފަށާފައެވެ.
ސަރވޭއާއި ގުޅިގެން ރާއްޖެއެމްވީން ކުރި ސުވާލަކަށް ޖަވާބުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވީ މި ސަރވޭގެ މަސައްކަތް މިހާރު ނިމިފައިވާކަމަށެވެ. މިހާރު ކުރިއަށްދަނީ ސަރވޭ ރިޕޯޓު ތައްޔާރުކުރުމުގެ މަސައްކަތް ކަމަށެވެ. ރިޕޯޓު ތައްޔާރުކޮށް ނިމުމުން އެ ބޯޓު ޖޫރިމަނާކުރާނެ އަދަދެއް ކަލްކިއުލޭޓް ކުރާނެ ކަމަށް ނައީމް ވިދާޅުވިއެވެ.
ނައީމް ވިދާޅުވީ ބޯޓު އުރުމުގެ ތެރެއިންނާއި، ފުން ކުރުމުގެ ތެރެއިން ރަސްފަރި ފަރަށް ވަރަށް ބޮޑު ގެއްލުމެއް ލިބިފައިވާކަން ސަރވޭއަށް ފާހަގަކުރެވުނު ކަމަށެވެ. ފަރުގެ 1 ހެކްޓަރާ ގާތްކުރާ ސަރަހައްދަކަށް ގެއްލުން ލިބިފައިވާކަމަށް ނައީމް ވިދާޅުވިއެވެ. ރިޕޯޓު ތައްޔާރުކޮށް ނިމުމުން އެ ބޯޓު ޖޫރިމަނާކުރާނެ އަދަދެއް ކަނޑައަޅާނެ ކަމަށް ނައީމް ވިދާޅުވިއެވެ. މި އަދަދު ކަނޑައަޅާނީ ފަރަށް ލިބުނު ގެއްލުން ބަލައި، ގަވައިދުގައި އިންނަ ފޯމިއުލާއާ އެއްގޮތަށް ކަމަށް ނައީމް ވިދާޅުވިއެވެ. ރަސްފަރީ ފަރަކީ ހިމާޔަތްކޮށްފައިވާ ފަރަކަށްވާތީ ބޮޑު އަދަދަކުން ޖޫރިމަނާކުރާނެ ކަމަށް މިގެ ކުރިން ނައީމް ވަނީ ވިދާޅުވެފައެވެ. ޖުރިމަނާ ކަނޑަނޭޅެނީސް ބޯޓު ފުރަން އެދޭނަމަ 100 މިލިއަން ރުފިޔާގެ ޑިޕޮޒިޓެއް ދައްކައިގެން، ބޯޓަށް ފުރޭނެ ކަމަށް ނައީމް ވިދާޅުވިއެވެ.
މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓީމުން ބުނެފައިވެއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. މި ބޯޓު ފަރަށް އެރީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ. އުޅަނދު ފަރަށް އެރުމުން ސަލާމަތްކުރުމަށް އުޅަނދުގެ ކެޕްޓަން ކުރަންޖެހޭ ކަންކަން ކޮށްފައިނުވާކަމަށާއި، މިފަދަ މައްސަލައެއް ދިމާވިކަން އަންގާފައިނުވާކަމާއި، އަދި ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން މިހާތަނަށް ހޯދުނު ހޯދުންތަކުން ދައްކާފައިވެއެވެ.
