ބައިނަލްއަގްވާމީ ފަތުރުވެރިންގެ މެދުގައި ރާއްޖެ އިޝްތިހާރުކުރުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ސީއެންއެން އިންޓަރނޭޝަނަލް ކޮމާޝަލް އާއެކު އެއްބަސްވުމެއްގައި ސޮއިކޮށްފިއެވެ.

މިއެއްބަސްވުމުގައި ރާއްޖޭގެ ފަރާތުން ސޮއިކޮށްފައިވަނީ އެމްއެމްޕީއާރުސީގެ މެނޭޖިންގ ޑިރެކްޓަރ ތައްޔިބް މުހައްމަދެވެ. ސީއެންއެން އިންޓަރނޭޝަނަލް ކޮމާޝަލްގެ ފަރާތުން ސޮއިކޮށްފައިވަނީ ޑިރެކްޓަރ އޮފް ސޭލްސް އަބިޖީތް ދަރ އެވެ. މިއެއްބަސްވުމުގައި ސޮއިކޮށްފައިވަނީ އެމްއެމްޕީއާރުސީ އޮފީހުގައެވެ.

އެއްބަސްވުމުގައި ސޮއިކުރެއްވުމަށްފަހު އެމްއެމްޕީއާރުސީގެ އެމްޑީ ތައްޔިބް މުހައްމަދު ވަނީ މިއެއްބަސްވުމުގެ ދަށުން ރަނގަޅު ފައިދާތަކެއް ރާއްޖެއަށް ކުރާނެކަމަށް ވިދާޅުވެފައެވެ. މީގެކުރިން 2020 ވަނަ އަހަރު ވިޒިޓް މޯލްޑިވްސް އާއި ސީއެންއެން އާ ދެމެދު ވެވުނު އެއްބަސްވުމުގެ ދަށުންވެސް ރާއްޖެއަށް ބޮޑެތި ފައިދާތަކެއް ކޮށްފައިވާކަން ތައްޔިބް ފާހަގަކުރެއްވިއެވެ.

އެމްއެމްޕީއާރުސީން ރާއްޖެ އިޝްތިހާރު ކުރުމުގައި މިހާރު އެންމެ ބޮޑަށް ގެންގުޅެމުންދާ ސިޔާސަތަކީ ރާއްޖެއަކީ ފަތުރުވެރިން ދަތުރުކުރުމަށް އެންމެ ރައްކާތެރި ފުރިހަމަ ޚިދުމަތްތަކެއް ލިބޭ ތަނެއްގެ ގޮތުގައި ޕްރޮމޯޓްކުރުންކަމަށް ތައްޔިބް ވިދާޅުވިއެވެ. އަދި ސީއެންއެންއާއެކު ވެވުނު މިއެއްބަސްވުމުގެ ދަށުން ބައިނަލްއަގްވާމީ ފެންވަރުގައި ރާއްޖެ އިޝްތިހާރު ކުރުމަށް ކުރަމުންދާ މަސައްކަތަށް އިތުރު ބާރެއް ލިބިގެންދާނެކަމަށް ވިދާޅުވިއެވެ.

އެއްބަސްވުމުގައި ސޮއިކުރުމަށްފަހު ސީއެންއެންގެ ޑިރެކްޓަރ ސޭލްސް އަބިޖީތް ވިދާޅުވީ ރާއްޖެއާ ގުޅޭގޮތުން ގެނެސްދެވޭނެ ޝައުގުވެރި އެތައް ކަމެއް އެބައޮތްކަމަށެވެ. އަދި ރާއްޖެއަށް ދަތުރުކުރުމުގެ ތަޖުރިބާ އޯޑިއަންސާ ހިއްސާކުރާނެކަމަށް ވިދާޅުވިއެވެ.

މިކެމްޕެއިން ކުރިޔަށްދާނީ ސެޕްޓެމްބަރ މަހުން ފެށިގެން މިއަހަރު ނިމެންދެންނެވެ. ކުރިޔަށް އޮތް ތިން މަސްދުވަސްތެރޭގައި ސީއެންއެން އިން ރާއްޖެއާ ގުޅުންހުރި ކޮންޓެންޓްތައް ޑިޖިޓަލް އަދި ބްރޯޑްކާސްޓިންގ މީޑިޔަމް ތަކުން ގެނެސްދެމުންދާނެއެވެ. އޭގެތެރޭގައި އަރޓިކަލްސް އާއި، ވީޑިއޯ، ކޮމާރޝަލް އަދި ސޯޝަލް މީޑިޔާ ކެމްޕެއިންތައް ގެނެސްދެމުންދާނެއެވެ.

2020 ވަނަ އަހަރު ދުނިޔެއަށް ކުރިމަތިވި ކޮވިޑްގެ ބަލިމަޑުކަމާ ގުޅިގެން ރާއްޖޭގެ ބޯޑަރުތައް ބަންދުކުރުމަށްފަހު ޖުލައި މަހުގެ މެދުތެރޭ ރާއްޖޭގެ ބޯޑަރުތައް ހުޅުވާލުމާއެކު އެމްއެމްޕީއާރުސީން ވަނީ ސީއެންއެން އާއެކު ރާއްޖެ އިޝްތިހާރުކުރުމަށް ފުރަތަމަ ފަހަރަށް އެއްބަސްވުމެއްގައި ސޮއިކޮށްފައެވެ. ފަހުން މިކެމްޕެއިން ކުރިޔަށްގެންގޮސްފައިވަނީ ކޮވިޑްގެ ޕެންޑަމިކްގައި ރާއްޖެއަކީ ފަތުރުވެރިން ދަތުރުކުރުމަށް އެންމެ ރައްކާތެރި މަންޒިލްކަމުގެ ގޮތުގައެވެ.