ހަ ނޫސްވެރިންގެ މައްސަލަ ކައުންސިލްގެ ސަމާލުކަމަށް ގެނެސްފައި ވަނީ ރައީސް އޮފީހުގެ ޗީފް ކޮމިއުނިކޭޝަން އޮފިސަރ
ރައީސް އޮފީހުން ހުށަހަޅާފައިވާ ކަމަށް ބުނާ މައްސަލަތަކުގައި ހިމެނޭ ރާއްޖެޓީވީގެ ނޫސްވެރިން
މީޑިއާގެ އެއްވެސް ފަރާތަކާއި ދެކޮޅަށް، ރައީސުލްޖުމްހޫރިއްޔާގެ އޮފީހުން، މޯލްޑިވްސް މީޑިއާ ކައުންސިލް (އެމްއެމްސީ) އަށް މައްސަލައެއް ހުށަހަޅާފައިނުވާނެކަމަށް ތަރުޖަމާނު އިބްރާހިމް މުއާޒު އަލީ ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އަބުރާއި ބެހިފައިވާކަމަށް ބުނެ، ރައީސުލްޖުމްހޫރިއްޔާގެ އޮފީހުގެ ޗީފް ކޮމިއުނިކޭޝަން އޮފިސަރަ، މޯލްޑިވްސް މީޑިއާ ކައުންސިލަށް ހުށަހެޅި ޝަކުވާތަކަކާއި ގުޅިގެން ގިނަ އަދަދެއްގެ ނޫސްވެރިންތަކެއްގެ މައްސަލަ ބަލަން ނިންމާ، ނޫސްވެރިންނަށް ވަކިވަކިން ސިޓީ ފޮނުވާފައިވާއިރު ރައީސް އޮފީހުގެ ތަރުޖަމާނު އިބްރާހިމް މުއާޒު އަލީ ކުރެއްވި ޓުވީޓެއްގައި ވިދާޅުވެފައިވަނީ ރައީސް އޮފީހުގެ ނަމުގައި އެއްވެސް މީޑިއާއަކާއި ދެކޮޅަށް އަދި ނޫސްވެރިޔަކާއި ދެކޮޅަށް އެއްވެސް މައްސަލައެއް އެއްވެސް މުއައްސަސާއަކަށް ހުށަހަޅާފައިނުވާނެކަމަށެވެ. އަދި އެކަން ވާނީ މިހާރު މޯލްޑިވްސް މީޑިއާ ކައުންސިލަށްވެސް އަނގާފައިކަމަށް މުއާޒު ވިދާޅުވެފައިވެއެވެ.
މިއާޒު އެގޮތަށް ވިދާޅުވިއިރު، މީޑިއާ ކައުންސިލުން ވަނީ "ރާއްޖެއެމްވީ"ގައި ލިޔެފައިވާ ލިޔުންތަކަކާ ގުޅިގެން ހަ ނޫސްވެރިއެއްގެ މައްސަލައެއް އެކައުންސިލްގެ ސަމާލުކަމަށް ގެނެސްފައިވާތީ އެ މައްސަލަތައް ކައުންސިލުން އިސް ނަގައިގެން ބަލަން ފަށާފައެވެ. އަދި މައްސަލަ ރައްދުވާ ފަރާތްތަކަށް ޖަވާބުދާރީވުމަށް ވަނީ ހަތް ދުވަހުގެ މުއްދަތެއް ދީފައެވެ. އޭގެއިތުރުން މިހާރު ނޫހާއި، ވީއެފްޕީ އޮންލާއިނާއި، ވަގުތު އޮންލައިންގެ ނޫސްވެރިންތަކަކާއި ދެކޮޅަށްވެސް ވަނީ މީޑިއާ ކައުންސިލް އިން މައްސަލަތަކެއް ބަލަން ފަށައިފަ އެވެ. އެ ނޫސް އިދާރާތަކުގެ އިތުރުން މޯލްޑިވްސް އިންޑިޕެންޑެންޓުގެ ނޫސްވެރިންގެ މައްސަލަތަކެއްވެސް މީޑިއާ ކައުންސިލަށް ހުށަހެޅި ބަލަމުންގެންދާކަން އެނގިފައިވެއެވެ. އެ ހުރިހާ މައްސަލައެއްގައިވެސް ވަނީ ރައީސުލްޖުމްހޫރިއްޔާގެ އަނބިކަނބަލުންގެ އަބުރާ ބެހުނުކަމަށް ބުނެ ހުށަހަޅާފައިވާ މައްސަލަތަކެވެ.
އެމައްސަލަތައް ރައީސް އޮފީހުގެ ފަރާތުން މީޑިއާ ކައުންސިލްގެ ސަމާލުކަމަށް ގެނެސްފައި ވަނީ ރައީސް އޮފީހުގެ ޗީފް ކޮމިއުނިކޭޝަން އޮފިސަރު ކަމަށް ކައުންސިލުން ބުނެއެވެ. އެ މައްސަލަތައް މީޑިއާ ކައުންސިލްގެ ސަމާލުކަމަށް ގެނައި ކަމަށް ބުނާ ތާރީހްތަކަށްބަލާއިރު، އޭރު ރައީސް އޮފީހުގެ ޗީފް ކޮމިއުނިކޭޝަން އޮފިސަރއަކަށް ހުންނެވީ އަލީ ހާލިދު އެވެ. ނަމަވެސް ރާއްޖެއެމްވީއަށް އެނގިފައިވާ ގޮތުގައި އަލީ ހާލިދު އެފަދަ މައްސަލަތަކެއް މީޑިއާ ކައުންސިލަށް ހުށަހަޅާފައެއް ނުވެއެވެ. އޭނާ މިހާރު ހުންނެވީ އެ މަގާމުން ދުރުކުރައްވާފައެވެ. މިކަމާ ބެހޭ ގޮތުން އަލީ ޚާލިދުގެ ރަސްމީ ބަހެއް ވަނީ ލިބޭ ގޮތް ނުވެފައެވެ.
ހޯމަ ދުވަހު މުއާޒު ކުރެއްވި އިތުރު ޓްވީޓެއްގައި ވިދާޅުވެފައި ވަނީ ރައީސުލްޖުމްހޫރިއްޔާގެ އަނބިކަނބަލުން އެއްވެސް މީޑިއާ ނުވަތަ ނޫސްވެރިޔަކާ ދެކޮޅަށް އެއްވެސް މުއައްސަސާއަކަށް އެއްވެސް މައްސަލައެއް ހުށަހަޅާފައި ނުވާ ކަމަށެވެ. އަދި ނޫސްވެރިންނަކީ ހިޔާލުފާޅުކުރުމުގެ މިނިވަންކަން އޮންނަންޖެހޭ ބައެއް ކަމަށް އެކަމަނާ ގަބޫލުކުރައްވާ ކަމަށް ވެސް މުއާޒްގެ ޓްވީޓްގައި ފާހަގަކުރެއްވިއެވެ.
ކައުންސިލުން ބަލަމުން ގެންދަނީ ރާއްޖެ ޓީވީގެ ނޫސްވެރިން ކަމަށްވާ ޢަލީ ޔޫސްފް، އަހްމަދު މުހްސިން، މުހައްމަދު ފަޒީން، އަޒްމޫން އަހުމަދު، މުހައްމަދު ވިސާމް އަދި ޢަބްދުﷲ ނަސީރު އިބްރާހިމްގެ މައްސަލައެވެ. އަދި ފަޒީނާއި އަޒްމޫންގެ މައްޗަށް ވަކިވަކިން ދެ މައްސަލައެއް ވަނީ ހުށަހަޅާފައެވެ.
ރާއްޖެ ޓީވީގެ ނިއުސް ޑައިރެކްޓަރ ޢަލީ ޔޫސުފްގެ މައްޗައް މައްސަލަ ހުށަހަޅާފައިވަނީ "މެޑަމް ފާތުންގެ މަޤްބޫލުކަން އިތުރުވަނީ. ދެންވާނީ ކިހިނެތް" މިނަމުގައި އޭނާ ލިޔެފައިވާ ރިޕޯޓާ ގުޅިގެންނެވެ.
ރާއްޖެ ޓީވީގެ އެސިސްޓެންޓް ނިއުސް ޑައިރެކްޓަރ ޢަބްދުﷲ ނަސީރު އިބްރާހިމާ ގުޅޭގޮތުން މައްސަލަ ހުށަހަޅާފައިވަނީ އޭނާ ލިޔެފައިވާ "ރެހެންދި ޚަދީޖާއަށްފަހު "ރެހެންދި ފާތުމަ" މިނަމުގައި ލިޔެފައިވާ ރިޕޯޓާ ގުޅިގެންނެވެ.
ރާއްޖެ ޓީވީގެ އެސިސްޓެންޓް އެޑިޓަރ އަހުމަދު މުހްސިންގެ މައްޗަށް ހުށަހަޅާފައިވާ މައްސަލައަކީ "މެޑަމް ފާތުން ދެވަނަ އަދީބަށް ވެދާނެބާ" މިމައުލޫގައި އޭނާ ލިޔެފައިވާ ރިޕޯޓް ލިޔެފައިވާތީއެވެ.
ރާއްޖެ ޓީވީގެ އެސިސްޓެންޓް އެޑިޓަރ އަޒްމޫން އަހުމަދުގެ މައްޗަށްވެސް ދެމައްސަލައެއް ހުށަހަޅާފައިވެއެވެ. އެއީ އަޒްމޫން ލިޔެފައިވާ "މެޑަމް ފާތުން އިންތިޒާމް ކުރައްވާ މައުރަޒަކަށް ފެނަކައިން ބައިލައްކަ ރުފިޔާ ދެނީ" މިނަމުގައި ލިޔެފައިވާ ޚަބަރާއި "ކަދުރު، ޕެނަޑޯލް،ދަބަސް، ޚިތާނު ކުރުން. މިއީ ހަމަ ފިސާރި މެޑަމެއް" މިނަމުގައި ލިޔެފައިވާ ރިޕޯޓާ ގުޅިގެންނެވެ.
ރާއްޖެ ޓީވީގެ ސީނިއަރ ވީޑިއޯ ޖާރނަލިސްޓް މުހައްމަދު ފަޒީނާ ގުޅޭގޮތުން ދެ މައްސަލަ ހުށަހަޅާފައިވާއިރު އެއް މައްސަލައަކީ "މެޑަމް ފާތުންގެ ކަންކަމުގައި ދައުލަތުގެ އިސްވެރިން ބައިވެރިވުން" މިނަމުގައި ލިޔެފައިވާ ރިޕޯޓެވެ. އަނެއް މައްސަލައަކީ "މެޑަމް ފާތުން ގއ ވިލިނގިއްޔަށް ވަޑައިގަންނަވާތީ ހުރިހާ މުވައްޒަފުން އެކަމަނާއަށް މަރުޙަބާ ކިއުމަށް ދިއުމަށް އަންގައިފި" މިނަމުގައި ލިޔެފައިވާ ޚަބަރު ލިޔެގެން ހުށަހަޅާފައިވާ މައްސަލައެވެ.
ރާއްޖެ ޓީވީގެ ސީނިއަރ ވީޑިއޯ ޖާރނަލިސްޓް މުހައްމަދު ވިސާމްއާ ގުޅޭގޮތުން މައްސަލަ ހުށަހަޅާފައިވަނީ "މެޑަމް ފާތުން ވަށާ ތޮވާފް ނުކޮށްފިނަމަ އެމީހަކު އަނދާ ހުސްވޭ: މަހްލޫފް" މިނަމުގައި އޭނާ ލިޔެފައިވާ ޚަބަރުގެ ސަބަބުންނެވެ.
ވަކިވަކިން ހުށަހަޅާފައިވީނަމަވެސް މައްސަލަ ހުށަހަޅާފައިވަނީ އެއްކަމަކާ ގުޅޭގޮތުންނެވެ. އެގޮތުން މައްސަލަ ތަކުގެ ޚުލާސާގެ ގޮތުގައި ބުނެފައިވަނީ މެޑަމް ފާތިމަތު އިބްރާހީމްގެ ޙައްޤަކަށް، ނަމަކަށް އަދި އަބުރަށް ގެއްލުން ލިބޭފަދަ އެއްޗެއް ހިމެނޭކަމަށް ފާހަގަ ކުރެވުން ކަމަށެވެ. މައްސަލައިގެ ގޮތުގައި ހުށަހަޅާފައިވާ ޝަކުވާގެ ބާވަތެއްގެ ގޮތުގައި ބުނެފައިވަނީ މީހެއްގެ ޙައްޤަކަށް/ ނަމަށް/އަބުރަށް ގެއްލުން ދިނުން ކަމަށެވެ.
މީގެ ކުރިންވެސް ވަނީ ރާއްޖެ ޓީވީން ގެނެސްދިން ޚަބަރަކާ ގުޅިގެން ލިޔުންތެރިއަކު 50،000ރ. އިން ޖޫރިމަނާކޮށް ރާއްޖެ ޓީވީ 2 ލައްކަ ރުފިޔާއިން ޖޫރިމަނާކޮށްފައެވެ. ރާއްޖެ ޓީވީން އެޖޫރިމަނާ ދެއްކި ދުވަހު ބްރޯޑްކާސްޓިންގ ކޮމިޝަނުން ވަނީ ރައީސް ޔާމީންގެ އަބުރުފުޅަށް ހުތުރުވާފަދަ ކޮންޓެންޓެއް ބްރޯޑްކާސްޓް ކުރިކަމަށް ބުނެ ރާއްޖެ ޓީވީ އެއް މިލިއަން ރުފިޔާއިން ޖޫރިމަނާކޮށްފައެވެ. އެފައިސާ ވެސް ރާއްޖެ ޓީވީން މިހާރު ވަނީ ދައްކާ ޚަލާސް ކޮށްފައެވެ.
