ކުރެވެނީ މަނީ ލޯންޑަރިންގެ ތުހުމަތުކަން ގާނޫނީ އިންޒާރުގައި އޮތް، ޔާމީނު ސޮއިވެސް ކުރެއްވި

ކުރީގެ ރައީސް އަބްދުﷲ ޔާމީނުގެ ތަހުގީގު ކުރިއަށްދިޔައިރު، ތުހުމަތު ކުރެވޭ ކުށް ބުނެދީފައި ނުވާކަމަށް ބުނެ އެމަނިކުފާނުގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފައިވާ ނުކުތާއަށް ދައުލަތުން ޖަވާބުދީފިއެވެ.

ޔާމީނުގެ ޖަލު ހުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި ކުރިއަށްދާއިރު، މިހާރު ކުރިއަށްދަނީ ދައުލަތުން އިސްތިއުނާފީ ނުކުތާތަކަށް ޖަވާބު ދިނުމުގެ މަރުހަލާއެވެ. އެގޮތުން މި މައްސަލައަކީ ތަހުގީގު މަރުޙަލާގައިވެސް ގޯސްތަކެއް ހަދާފައިވާ މައްސަލައެއްކަން ފާހަގަކޮށް ޔާމީނުގެ ވަކީލުން ވިދާޅުވީ، މި މައްސަލައިގެ ތަހުގީގު މަރުހަލާގައި ކުރިއަށްދިޔަ ސުވާލުތަކަކީ މަނީ ލޯންޑަރިންއާ ގުޅޭ ސުވާލުތަކެއް ނޫން ކަމަށެވެ. އަދި ތަހުގީގު މަރުހަލާއިން ފެށިގެން ދައުވާ ކުރުމުގެ މަރުހަލާއަށްވެސް ދައުލަތުން ޔާމީނުގެ މައްޗަށް ކުރެވޭ ތުހުމަތަކީ ކޮބައިކަން ސާފު ކޮށްދީފައިނުވާކަމަށް ވިދާޅުވިއެވެ. ޔާމީނުގެ ވަކީލުން ވަނީ މި މައްސަލައިގެ ގާނޫނީ އިންޒާރުގައި އެކަންކަން ބަޔާންކޮށްދީފައި ނުވާކަން ފާހަގަ ކުރައްވާފައެވެ.

އެ ނުކުތާއަށް ރައްދު ދެއްވައި ދައުލަތުގެ ފަރާތުން ސީނިއަރ ޕަބްލިކް ޕްރޮސެކިއުޓަރ އާއިޝަތު މުހައްމަދު ވިދާޅުވީ، ޔާމީނަށް ކުރެވެނީ މަނީ ލޯންޑަރިންގެ ތުހުމަތުކަން ގާނޫނީ އިންޒާރުގައިވެސް ބަޔާންކޮށްފައިވާ ކަމަށެވެ. އެގޮތުން 8 ޖެނުއަރީ 2019 ގެ އިންޓަރވިއު ރެކޯޑިންގ ޝަރީއަތާ ހިއްސާކޮށްފައިވާނެކަން ފާހަގަ ކުރައްވައި ވަކީލާ ވިދާޅުވީ، އެ ދުވަހުވެސް ގާނޫނީ އިންޒާރުގެ މާއްދާތައް ޔާމީނަށް ކިޔާދީފައިވާ ކަމަށެވެ. އަދި އޭގައި ޔާމީން ސޮއިކޮށްފައިވާކަންވެސް ދައުލަތުގެ ވަކީލާ ފާހަގަ ކުރެއްވިއެވެ.

އޭގެ އިތުރުން، މަނީ ލޯންޑަރިންއާ ގުޅޭ ތުހުމަތުތަކެއް ކުރެވުނުކަން ރައީސް ޔާމީނުގެ ބަޔާނުންވެސް ދޭހަވާކަން ދައުލަތުގެ ވަކީލާ ވިދާޅުވިއެވެ. އެގޮތުން މަނީ ލޯންޑަރިންގެ މައްޗަށް އެމަނިކުފާނަށް ތުހުމަތު ކުރާއިރު، އެމްއެމްއޭއިންވެސް ސުވާލެއް ކޮށްފައިނުވާކަން ރައީސް ޔާމީނު އަމިއްލަފުޅަށް ވިދާޅުވިކަން ބަޔާނުންވެސް ފެންނަން އޮތްކަމަށް ދައުލަތުގެ ވަކީލާ ވިދާޅުވިއެވެ. އަދި އެހެން އޮތުމުންވެސް ތަހުގީގުގައި މަނީ ލޯންޑަރިންގެ ކުށްކަން އަންގައި، ޖަވާބުދާރީވާން ވެސް ފުރުސަތު ދެވިފައިވާކަން އެނގޭކަމަށް ވަކީލާ ވިދާޅުވިއެވެ.

ވަކީލާ ވިދާޅުވީ، މި މައްސަލައިގައި 6 ޖެނުއަރީ 2019 ގައި ވެސް ތަހުގީގާ ގުޅިގެން ސުވާލު ކުރެވުނު ކަމަށެވެ. އެ ދުވަހުގެ ރެކޯޑިންގެ 53 މިނެޓު 19 ސިކުންތުން ފެށިގެން ޔާމީން ދައްކަވާފައިވާ ވާހަކަތަކަށް ބަލާއިރު، ކެމްޕޭން ފައިސާ އަކީ އެއްވެސް ލިއެކިއުމަކުން ފެންނަން އޮންނާނެ ފައިސާ ނޫންކަމަށް ވިދާޅުވެފައިވާކަން ވަކީލާ ފާހަގަ ކުރެއްވިއެވެ. އަދި އޭރުވެސް އެކަންކަން ސާބިތު ކުރުމަށް ހެކި ހުށައެޅުމުގެ ފުރުސަތު ދެވިފައިވާ ކަމަށް ވިދާޅުވިއެވެ.

މި މައްސަލައިގައި މީގެ ކުރިން 5 އަޑުއެހުމެއް ބާއްވައި ރައީސް ޔާމީނުގެ ފަރާތުން އިސްތިއުނާފު ނުކުތާތައް ވަނީ ހުށައަޅާފައެވެ. އެއާއެކު ބުރާސްފަތި ދުވަހުގެ އަޑުއެހުމުގައި ދައުލަތުން ވަނީ އިިސްތިއުނާފީ ނުކުތާތަކުގެ ޖަވާބު ދެއްވާފައެވެ.