ފަލަސްތީނުގެ ދިފާއުގައި ރައީސް ދެއްކެވި ވާހަކަފުޅަށް އެމްޑީޕީގެ ތައުރީފު!
އަބަދުވެސް ދެކެން ބޭނުންވި މަންޒަރެއް
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
އދ.ގެ އާންމު މަޖިލީހުގައި ފަލަސްތީނުގެ ދިފާއުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެއްކެވި ވާހަކަފުޅަށް މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ)ން މަރުހަބާ ކިޔައިފިއެވެ.
ރާއްޖެއެމްވީއަށް އެމްޑީޕީގެ ޗެއަރޕަރސަން ޙަސަން ލަޠީފް ވިދާޅުވީ, ފަލަސްތީނަކީ މިނިވަން ދައުލަތެއް ކަމަށް ވަކާލާތުކުރުމުގައި ދިވެހިން އަބަދުވެސް ދެމިތިބޭނެކަމުގެ ޔަގީންކަން ރައީސް ދެއްވުމަކީ އެކަމާ އެމްޑީޕީން އުފާ ކުރާކަމެއް ކަމަށާއި، އަބަދުވެސް ދެކެން ބޭނުންވި މަންޒަރެއް ކަމަށެވެ.
އދ.ގެ އާންމު މަޖިލީހުގައި މުޅި ދިވެހިރާއްޖެ ތަމްސީލު ކޮށްދެއްވައި، ދިވެހި ރައްޔިތުން ފަލަސްތީނާއެކު ތިބިކަން ތަމްސީލް ކޮށްދެއްވީތީ އެކަމަށްޓަކައި ޝުުކުރުވެރިވާ ކަމަށް ޗެއަރޕަރސަން ވިދާޅުވިއެވެ. އަދި ވިދާޅުވީ ރައީސްގެ ވާހަކަފުޅު ވަރަށް ފުރިހަމަ ކަމަށާއި، ފާހަގަކުރެއްވި ހުރިހާ ކަމަކަށް ތާއީދުކުރާ ކަމަށެވެ.
ރައީސްގެ ވާހަކަފުޅަށް އެމްޑީޕީން މަރުހަބާ ކިޔާފައިވާއިރު، ފަލަސްތީނުން ވެސް ވަނީ ރާއްޖެއަށް ޝުކުރު އަދާކޮށްފައެވެ.
ފަލަސްތީނުގެ ދައުލަތުގެ ޓްވިޓަރއިން ކުރެއްވި ޓްވީޓެއްގައި ވަނީ, ފަލަސްތީނަކީ މިނިވަން ދައުލަތެއްގެ ގޮތުގައި ހެދުމަށް ކުރެވޭ ބަހުސް 21 ސެޕްޓެމްބަރު 2021ގައި ރައީސް ޞާލިޙު ފައްޓަވައިދެއްވައިފައިވާ ކަމަށެވެ. އަދި އދ.ގެ އާންމު މަޖިލީހުގައި ފަލަސްތީނުގެ ވަކާލާތުގައި ދެއްކެވި ވާހަކަފުޅަށް ޝުކުރުއަދާ ކުރައްވާ ކަމަށް ވަނީ ބުނެފައެވެ.
އިޒްރޭލުން ފަލަސްތީނުގެ ރައްޔިތުންނަށް ކުރަމުންދާ އަނިޔާތަކުގެ ވާހަކައަށް އިޝާރާތްކުރައްވަމުން ރައީސް ވިދާޅުވީ، އިޒްރޭލުން ފަލަސްތީނުގެ އަންހެން, ފިރިހެން, އަދި ކުދިބޮޑު އެތައް ބައެއްގެ ހައްގު ތަކުރާރުކޮށް ނިގުޅައިގަންނަމުންދާ ކަމަށެވެ.
އަދުގެ ހޭލުންތެރި ޒުވާން ޖީލުގެ އެތައް ބަޔަކު އެތައް ގައުމަކުން ފަލަސްތީނުގެ ހައްގުގައި އެ ނުކުންނަނީ ބޭއިންސާފާއި ލާއިންސާނިއްޔަތަށް ނޫނެކޭ ބުނަމުންކަން ފާހަގަކުރައްވައި، ރައީސް ވިދާޅުވީ، އދ.ގެ އާންމު މަޖިލީހާއި ސެކިއުރިޓީ ކައުންސިލުން ފަލަސްތީނުގެ ހައްގުގައި ނެރުނު ޤަރާރުތަކާއި ނިންމުނު ނިންމުންތައް ގިނަ ނަމަވެސް، މަދު އެއްޗަކީ، އަދި އަމުދުން ނުވެސް ނެތް އެއްޗަކީ ފަލަސްތީނުގެ ހައްގުކަމަށެވެ.
ފަލަސްތީނުގެ ރައްޔިތުންގެ ހައްގުގައި ރައީސް ދެއްކެވި ވާހަކަފުޅު ނިންމަވާލައްވާފައިވަނީ ފަލަސްތީނުގެ ރައްޔިތުންނަށް އެމީހުންގެ މިނިވަންކަމާއި ހައްގުތަކާއި އިމްތިޔާޒާއި އިޚްތިޔާރުތައް ދޫކޮށްލައި ދިނުމަށް އެދިވަޑައިގަންނަވަމުންނެއެވެ. އަދި ފަލަސްތީނުގެ މިނިވަންކަމަށް ވަކާލާތުކުރުމުގައި ދިވެހިން އަބަދުވެސް ދެމިތިބޭނެ ކަމުގެ ޔަގީންކަން ދެއްވަމުންނެވެ.
