ފްރެންޗް ލީގުގައި މިދިޔަ އާދިއްތަ ދުވަހުގެރޭ ލިޔޯން އަތުން ޕީއެސްޖީ މޮޅުވި މެޗުގައި، އާޖެންޓީނާގެ ތަރި ލިއޮނެލް މެސީ ބަދަލުކުރީ އަނިޔާގެ މައްސަލައަކާ ގުޅިގެން ކަމަށް ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނެފިއެވެ.

އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗަކީ މި ފަހަރުގެ ޓްރާންސްފާ ބާޒާރުގައި ބާސެލޯނާ ދޫކޮށް ޕީއެސްޖީއަށް ބަދަލުވި މެސީ، އެ ޓީމުގެ އަމިއްލަ ދަނޑުގައި ކުޅުނު ފުރަތަމަ މެޗެވެ. އަދި މި މެޗަކީ ލީގުގައި ޕީއެސްޖީގެ ފުރަތަމަ އެގާރައިގައި ހިމެނިގެން މެސީ ކުޅުނު ފުރަތަމަ މެޗެވެ. މި މެޗުގެ ފުރަތަމަ ހާފުގައި މެސީ ރަނގަޅު ކުޅުމެއް ދެއްކި ނަމަވެސް، މެޗުގެ ދެވަނަ ހާފުގައި މެސީ ވަނީ ބަދަލުކޮށްފައެވެ. އެކަމާ ގުޅިގެން މެސީ ހިތްހަމަނުޖެހިފައި ހުރިއިރު، ބަދަލުކުރި ވަގުތު މެސީ ވަނީ ޕީއެސްޖީގެ ކޯޗު މައުރީސިއޯ ޕޮޗެޓީނޯ ދެއްކި ވާހަކަތަކަށް މާ ބޮޑު ސަމާލުކަމެއް ނުދީ ބެންޗަށް ގޮސްފައެވެ.

އެ މެޗަށްފަހު ޕޮޗެޓީނޯ ވަނީ މެސީ ބޭލުމުން ހިތްހަމަނުޖެހުންތަކެއް އުޅޭ ކަމަށް ދެކެވޭ ވާހަކަ ދޮގުކޮށްފައެވެ. އެކަމަކު އެ ފަހަރު މެސީއަށް އަނިޔާވި ކަމަށް ޕޮޗެޓީނޯ ބުނެފައެއް ނުވެއެވެ.

ނަމަވެސް ލީގުގައި ބުދަ ދުވަހުގެރޭ މެޓްޒްއާ ދެކޮޅަށް ޕީއެސްޖީ ކުޅެން އޮތް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޮޗެޓީނޯ ބުނީ އެ މެޗުގައި މެސީ ބަދަލުކުރަން ޖެހުނީ އޭނާގެ ވާތު ކަކުލަށް ލިބުނު އަނިޔާއަކާ ގުޅިގެން ކަމަށެވެ. އަދި އެ މެޗުގައި މެސީ ދެއްކި ކުޅުމާމެދު ވަރަށް ބޮޑަށް ހިތްހަމަޖެހޭ ކަމަށާއި، އެ މެޗުގައި އޭނާގެ ފަރާތުން މަދުވީ ހަމައެކަނި ގޯލެއް ކަމަށްވެސް ޕޮޗެޓީނޯ ވަނީ ބުނެފައެވެ.

އެ މެޗުގައިވެސް މެސީއަށް ލަނޑެއް ކާމިޔާބުކުރެވިފައި ނުވާއިރު، ޕީއެސްޖީގެ ޖާޒީގައި މިހާތަނަށް ކުޅުނު ތިން މެޗުގައިވެސް މެސީއަށް ލަނޑެއް ޖެހިފައެއް ނުވެއެވެ.

މެސީއަށް އަނިޔާވި ކަމަށް ޕޮޗެޓިނޯ ބުނިއިރު، މި އަނިޔާއާ ގުޅިގެން ލީގުގައި ބުދަ ދުވަހުގެރޭ މެޓްޒްއާ ދެކޮޅަށް ކުޅޭ މެޗުގައި މެސީއަށް ނުކުޅެވޭނެއެވެ. އަދި ޔުއެފާ ޗެމްޕިއަންސް ލީގުގައި އަންނަ ހަފުތާގައި މެންޗެސްޓާ ސިޓީއާ ދެކޮޅަށް ޕީއެސްޖީން ކުޅޭ މެޗަށްވެސް އޭނާ ފިޓުވާނެކަމާމެދު ވަނީ ސުވާލު އުފެދިފައެވެ.