މެލޭޝިއާގެ ބޮޑުވަޒީރުކަމަށް ނަޖީބު ރައްޒާގު އަލުން ވަޑައިގަންނަވަނީ؟

މެލޭޝިއާގެ ބޮޑުވަޒީރުކަމަށް އަލުން އެނބުރި އާދެވޭނެކަމަށާއި، އެކަމަށް މަސައްކަތް ކުރައްވާ ކަމަށް އެގައުމުގެ ކުރީގެ ބޮޑުވަޒީރު ނަޖީބު ރައްޒާގު ވިދާޅުވެއްޖެއެވެ.

ނަޖީބު ރައްޒާގު ނެރުއްވި ބަޔާނެއްގައި ވިދާޅުވީ އޭނާއަށް ތާއިދުކުރާ އެތަށް ހާސް ބަޔަކު މެލޭޝިއާގައި އެބަތިބި ކަމަށާއި، އަދި އޭނާގެ ޕާޓީ ޔުނައިޓެޑް މެލޭ ނޭޝަނަލް އޯގަނައިޒޭޝަން (އަމްނޯ) އަކީ އަދިވެސް އެގައުމުގައި އެންމެ މެމްބަރުން ގިނަ ޕާޓީ ކަމަށެވެ.

އަދި ކުރިޔަށް އޮތް ދެއަހަރު ދުވަހުގެ ތެރޭގައި މެލޭޝިއާގެ ބޮޑުވަޒީރު ކަމަށް އަލުން ވަޑައިގަންނަވާނެ ކަމަށް ނަޖީބު ރައްޒާގު ވިދާޅުވިއެވެ.

ނަޖީބު ރައްޒާގު މިހެން ވިދާޅުވިއިރު، އަމްނޯ އަކީ މެލޭޝިއާގައި މިހާރު ވެރިކަންކުރާ ކޯލިޝަނުގެ ހިމެނޭ އެންމެ ބޮޑު ޕާޓީއެވެ. އަދި މިހާރުގެ ބޮޑުވަޒީރު އިސްމާއީލް ސަބްރީއަކީވެސް އަމްނޯ އަށް ނިސްބަތްވާ ފަރާތެކެވެ.

ނަޖީބު ރައްޒާގާއި ދެކޮޅަށް މެލޭޝިއާގެ ދައުލަތުން ވަނީ ކޮރަޕްޝަނުގެ ދައުވާ އުފުލާފައެވެ. ނަޖީބު ރައްޒާގާއި ދެކޮޅަށް މެލޭޝިއާގެ ދައުލަތުން އުފުލާފައިވާ ދައުވާއަކީ އެގައުމުގެ ދައުލަތުގެ އިންވެސްޓްމެންޓް ފަންޑު ވަން އެމްޑީބީ ގެ ކޮރަޕްޝަނުގެ މައްސަލައަކާއި ގުޅިގެންނެވެ.