އަލީގެ ތުހުމަތުތަކަށް ރައީސްގެ ސްޓޭންޑް ބަދަލެއް ނުވޭ: "ކޮމްޕްރަމައިޒް ވާނެ ކަމެއް ނޯންނާނެ"
ރައީސް ޞާލިޙުގެ ސްޓޭންޑަށް ބަދަލެއް އައިސްފައި ނުވޭ
ޓޫރިޒަމް މިނިސްޓަރު އަލީ ވަހީދު ރައީސް ޞާލިޙާއެކު
ޖިންސީ ގޯނާގެ ބޮޑެތި ތުހުމަތުތަކާއެކު މަޤާމުން ވަކި ކުރައްވާފައިވާ ކުރީގެ ޓޫރިޒަމް މިނިސްޓަރ އަލީ ވަޙީދު، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ މައްޗަށް ކުރައްވަމުން ގެންދަވާ ތުހުމަތުތަކަށް ރައީސް ޞާލިޙުގެ ސްޓޭންޑް ބަދަލު ނުވާކަމަށް ރައީސް އޮފީހުން ބުނެފިއެވެ.
ހޯމަ ދުވަހުގެރޭ ބޭއްވި ނޫސްވެެރިންގެ ބައްދަލުވުމުގައި އަލީ ވަޙީދު ވަނީ ރައީސް ޞާލިޙަށް ވެސް އެމްއެމްޕީއާރްސީގެ ފައިސާ ލިބިވަޑައިގެންފައިވާކަމަށް ދޭހަވާ މޭރުމުން ތުހުމަތުތަކެއް ކުރައްވާފައެވެ. އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން ރައީސް އޮފީހުން ބުނީ ރައީސް ޞާލިޙުގެ ސްޓޭންޑަށް ބަދަލެއް އައިސްފައި ނުވާ ކަމަށެވެ. އެގޮތުން އެމަނިކުފާނު ކުރިން ވެސް ވިދާޅުވެފައިވާ ގޮތަށް، "ކޮމްޕްރޮމައިޒް" ވާނެ ފަދަ އެއްވެސް ކަމެއް ނޯންނާނެކަމަށް ރައީސް އޮފީހުން ބުނެއެވެ.
އަލީ ވަޙީދުގެ ތުހުމަތުތަކާއި ގުޅިގެން ރައީސް ޞާލިޙު ވަނީ މީގެ ކުރިން ވެސް ވާހަކަ ދައްކަވާފައެވެ. އެގޮތުން އެމަނިކުފާނު ދީލާލައްވައި އަމާންދެއްވަން ޖެހޭ ކަހަލަ އެއްވެސް ލިޔުމެއް ނުވަތަ އެއްވެސް އެއްޗެއް އެއްވެސް ބޭފުޅެއްގެ އަތުގައި ނޯންނާނެ ކަމަށާއި، އެކަމުގެ ޔަގީންކަން ރައްޔިތުންނަށް އަރުވާކަމަށް ރައީސް ޞާލިޙު ވަނީ ވިދާޅުވެފައެވެ.
"އަޅުގަނޑު ކޮމްޕްރަމައިޒް ވާކަހަލަ އެއްވެސް ލިޔުމެއް އެއްވެސް އެއްޗެއް އެއްވެސް ބޭފުޅެއްގެ އަތުގައި ނޯންނާނެ. އޮތްނަމަ ހަމަކުރައްވަންވީ."
އަލީ ވަހީދުގެ މައްސަލައަށް އަލިއަޅުއްވާލައްވާ ރައީސް ޞާލިޙް އޭރު ވިދާޅުވީ އެ މައްސަލައިގެ ޝަކުވާ އައުމާއެކު އެ މުވައްޒަފުންނާއެކު ބައްދަލުކުރެއްވި ކަމަށެވެ. ޖެންޑާ މިނިސްޓަރާއެކު ބޭއްވި އެ ބައްދަލުކުރެއްވުމަށްފަހު އެވަގުތު އެޅެން އޮތް ފިޔަވަޅު އެމަނިކުފާނު އެޅުއްވި ކަމަށާއި، އެގޮތުން އަލީ ވަހީދު މަގާމުން ވަކި ކުރައްވާ އެމައްސަލަ ތަހުގީގު ކުރުމަށް ފުލުހުންނަށް އެންގެވި ކަމަށް ރައީސް ޞާލިޙް ވިދާޅުވިއެވެ.
އެ މައްސަލަ އޮތީ ކޯޓު މަރުހަލާގައިކަން ފާހަގަކުރައްވައި ރައީސް ޞާލިޙް އޭރު ވިދާޅުވީ މިނިވަންކަމާއެކު ޝަރީއަތް ހިންގުމުގެ ޖާގަ ދެއްވާނެ ކަމަށާއި، އެކަމުގެ ތެރެއަށް އެމަނިކުފާނުގެ އެއްވެސް ނުފޫޒެއް ނުވަންނާނެ ކަމަށެވެ. ދައުލަތުގެ އެންމެ މަތީވެރިޔާގެ ހައިސިއްޔަތުން ފޯރުކޮށްދޭންޖެހޭ އެހީތެރިކަން ޤާނޫނުގެ ތަރަހައިގެ ތެރެއިން ފޯރުކޮށްދެމުންދާނެ ކަމަށްވެސް ރައީސް ޞާލިޙް ވިދާޅުވިއެވެ.
އަލީ ވަޙީދުގެ މައްޗަށް ޖިންސީ ގޯނާގެ ބޮޑެތި ދައުވާތަކެއް އުފުލާފައިވާއިރު، ސުޕްރީމް ކޯޓުގެ ހުރުމަތް ކެނޑުމުން އަލީ ވަހީދުގެ މައްޗަށް 2 މަހާއި 12 ދުވަހުގެ ޖަލު ހުކުމެއް ސުޕްރީމް ކޯޓުންވެސް ވަނީ އިއްވާފައެވެ. އަލީ ވަޙީދު މިހާރު ގެންދަވަނީ އިނގިރޭސިވިލާތުގައި ހުންނަވައިގެން ސަރުކާރަަށް ވަރަށް ބޮޑަށް ފާޑު ވިދާޅުވަމުންނެވެ.
