އެމްޑީޕީގެ ދާއިރާތަކުގެ އިންތިޚާބުގައި، ވޯޓުފޮށި ބަހައްޓާ މަރުކަޒުތަކާއި ވޯޓުލާ ވަގުތު އާންމުކޮށްފި
20 ސެޕްޓެމްބަރު 2021 | ހޯމަ 18:24ވޯޓުލާން ހަމަޖެހިފައިވާ ވަގުތަކީ 25 ސެޕްޓެމްބަރުވާ ހޮނިހިރު ދުވަހުގެ ހެނދުނު 9:00ން ހަވީރު 5:00ށް
އެމްޑީޕީގެ ގައުމީ މަޖިލީހުގެ ބައްދަލުވުމުގެ ތެރެއިން
ސެޕްޓެމްބަރުވާ 25 ވަނަ ދުވަހު އޮންނަ އެމްޑީޕީގެ އެތެރޭގެ އިންތިޚާބުގައި, ވޯޓު ފޮށި ބަހައްޓާ ތަންތަނާއި ވޯޓުލާ ވަގުތު އާންމުކޮށްފިއެވެ.
އެމްޑީޕީން ބުނީ ވޯޓުލާން ހަމަޖެހިފައިވާ ވަގުތަކީ 25 ސެޕްޓެމްބަރުވާ ހޮނިހިރު ދުވަހުގެ ހެނދުނު 9:00ން ހަވީރު 5:00ށް ކަމަށެވެ.
އެމްޑީޕީން ވަނީ ކުރިޔަށް އޮތް އިންތިޚާބުގައި ވޯޓުލާ މީހުންގެ ދާއިމީ ލިސްޓުވެސް އާންމުކޮށްފިއެވެ.
އެމްޑީޕީގެ އިންތިޚާބުގައި 733 ކެންޑިޑޭޓުން ވާދަކުރައްވައެވެ. އެތެރޭގެ އިންތިޚާބުގައި ވޯޓު ލުމުގެ ހައްގު ލިބިގެންވާ 93،165 މީހުން އެބަތިބިކަމަށް އެޕާޓީން ބުނެއެވެ.
ދާއިރާތަކުގެ އިންތިޚާބު ބޭއްވުމަށް ކުރިން ނިންމާފައި އޮތީ މެއި މަހުގެ ތެރޭގައެވެ. އެހެންނަމަވެސް ފަހުން ވަނީ ސެޕްޓެމްބަރަށް ފަސްކޮށްފައެވެ.
އެމްޑީޕީން މިނިންމުން ނިންމީ ޕާޓީގެ ރައީސް، ރައީސް މުޙައްމަދު ނަޝީދުގެ ފުރާނަފުޅު ދުއްވާލުމަށް ނުރައްކާތެރި ޓެރަރިސްޓް ހަމަލާއެއްދީ، އެމަނިކުފާނުގެ ހާލުކޮޅު ސީރިއަސްވެ، އެމަނިކުފާނު ފަރުވާ ހޯއްދަވަމުން ގެންދަވާތީ ދާއިރާތަކުގެ އިންތިޚާބު 29 މެއި 2021ގައި ބޭއްވުމަކީ ރަނގަޅު ކަމެއް ކަމުގައި ނުފެންނާތީއެވެ.
