ފަރަށް އެރި ބޯޓަށް ފުރޭނީ 109 މިލިއަން ރުފިޔާ ދެއްކުމުން
19 ސެޕްޓެމްބަރު 2021 | އާދީއްތަ 03:32ގާނޫނީ ގޮތުން ނަގަން ޖެހޭ ޒިންމާ ނަގާނެ ކަމަށް ކުންފުނިންދޭ ލިޔުމަކާއެކު 9 މިލިއަން ރުފިޔާގެ ޑިޕޮޒިޓެއް ބަހައްޓަން ޖެހޭ
ކ. ރަސްފަރީ ފަރަށް އެރި ބޯޓު
ކ. ރަސްފަރި ހުޅަނގު ފަރާތުން ފަރަށް އެރި ބޯޓަށް ފުރޭނީ 109 މިލިއަން ރުފިޔާ ދެއްކުމުން ކަމަށް އެންވަޔަރަންމަންޓް މިނިސްޓްރީން ބުނެފިއެވެ.
މިނިސްޓްރީން ބުނީ، ބޯޓަށް ފުރައިގެން ދެވޭނީ، ޖުރީމަނާއަށް ދައްކަން ކަނޑައަޅާފައިވާ 100 މިލިއަން ރުފިޔާގެ އިތުރުން ގާނޫނީ ގޮތުން ނަގަން ޖެހޭ ޒިންމާ ނަގާނެ ކަމަށް ކުންފުނިންދޭ ލިޔުމަކާއެކު 9 މިލިއަން ރުފިޔާގެ ޑިޕޮޒިޓެއް ބެހެއްޓުމަށްފަހުގައި ކަމަށެވެ.
ފަރަށް ލިބިފައިވާ ގެއްލުން ދިރާސާ ކުރުމުގެ މަސައްކަތް ކުރަމުން އަންނައިރު އެ މަސައްކަތް ލަސްވެފައިވަނީ މޫސުން ގޯސްވުމުގެ ސަބަބުން ކަމަށް އެންވަޔަރަންމެޓަލް ޕްރޮޓެކްޝަން އެޖެންސީ (އީޕީއޭ)އިން ވަނީ ބުނެފައެވެ.
ކ. ރަސްފަރި ފަރަކީ ހިމާޔަތްކޮށްފައިވާ ފަރަކަށްވާތީ ބޯޓު ފުންކުރެވުނުހާ އަވަހަކަށް ފަރަށް ލިބުނު ގެއްލުން ބަލަން ސަރވޭތައް ފަށާނެ ކަމަށް އީޕީއޭ އިން ވަނީ ބުނެފައެވެ. ބޯޓު ފުންކުރެވުމުގެ ކުރިންވެސް, މަތިން ފަރަށް ލިބުނު ގެއްލުން ބަލާފައިވާކަމަށް އީޕީއޭއިން ބުނެފައިވެއެވެ. އަދި ފަރަށް ލިބުނު ގެއްލުން ބަލައި، ބޮޑު އަދަދަކުން ބޯޓުގެ ވެރިފަރާތް ޖޫރިމަނާ ކުރާނެ ކަމަށް އީޕީއޭއިން ބުނެފައިވެއެވެ. ސަރވޭގެ ކުރިން ބޯޓު ފުރަން އެދޭނަމަ ޑިޕޮޒިޓެއްގެ ގޮތުގައި 100 މިލިއަން ރުފިޔާ ނަގާނެ ކަމަށް އީޕީއޭއިން މީގެ ކުރިން ބުނެފައިވެއެވެ. ބޯޓު ފުރަން އެދިފައިވާކަމުގެ މައުލޫމާތެއް އަދި ލިބިފައެއް ނުވެއެވެ.
ބޯޓު ފަރަށް އަރާފައިވަނީ އޮގަސްޓް މަހުގެ 19ވަނަ ދުވަހުއެވެ. މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓީމުން ބުނެފައިވެއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. ބޯޓު ފަރަށް އެރީ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ. އުޅަނދު ފަރަށް އެރުމުން ސަލާމަތްކުރުމަށް ކެޕްޓަން ކުރަންޖެހޭ ކަންކަން ކޮށްފައިނުވާކަމަށާއި، މިފަދަ މައްސަލައެއް ދިމާވިކަން އަންގާފައިނުވާކަމާއި، އަދި ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން މިހާތަނަށް ހޯދުނު ހޯދުންތަކުން ދައްކާފައިވެއެވެ.
