ފުވައްމުލައް ސިޓީ މޮނިޓަރިންގެ ހާލަތުން ނަގައިފިއެވެ.

ފުވައްމުލަކުން ކޮވިޑް-19ގެ ޕޮޒިޓިވް ކޭސްތަކެއް ފެނިގެން މޮނިޓަރިންގެ ހާލަތަށް ގެނެސްފައިވަނީ މިދިޔަ އޮގަސްޓު މަހުގެ 21 ވަނަ ދުވަހުއެވެ. ފުވައްމުލައް މޮނިޓަރިންގެ ހާލަތަށް ލީ އިރު އެރަށުން 200 އާ ގާތްކުރާ އަދަދަކަށް މީހުން ޕޮޒިޓިވްވެފައިވެއެވެ. އެއީ އެރަށުން ޕޮޒިޓިވްވި މީހުންގެ ކޮންޓެކްޓުންނާ އެކީގައެވެ.

މީގެ ކުރިންވެސް ފުވައްމުލަކުން ކޮވިޑްގެ ޕޮޒިޓިވް ކޭސްތަކެއް ފެނިގެން މެއި މަހުގެ 6 ވަނަ ދުވަހު ވެސް އެ ރަށް މޮނިޓަރިންގެ ހާލަތަށް ގެނެސްފއިވެއެވެ. އެފަހަރު 3 މަސް ދުވަސް ވަންދެން އޮތީ މޮނިޓަރިންގެ ހާލަތުގައެވެ. އޮގަސްޓު މަހުގެ 5 ވަނަ ދުވަހު މޮނިޓަރިންއިން ނެގުމަށްފަހު އޮގަސްޓު 21 ވަނަ އަނެއްކާވެސް ވަނީ މޮނިޓަރިންގެ ހާލަތަށް ލާފައެވެ.

އެޗްޕީއޭއިން އެންމެ ފަހުން އާންމުކޮށްފައިވާ މައުލޫމާތުގައިވާގޮތުން މިވަގުތު މޮނިޓަރިންގެ ހާލަތުގައި އޮތީ 18 ރަށެކެވެ. އެއީ ރ. ދުވާފަރު، ކ. ގާފަރު، ލ. މުންޑޫ، ށ. މިލަންދޫ، ވ. ތިނަދޫ، ހދ. ނޮޅިވަރަމް، ސ. ހިތަދޫ، ސ. މަރަދޫ، ސ. މަރަދޫފޭދޫ. ސ. ފޭދޫ، ސ. ހުޅުމީދޫ، ރ. ކިނޮޅަސް، ބ. މާޅޮސް، ކ. ގުޅި ގއ. ގެމަނަފުށި، ގއ. މާމެންދޫ، ތ. ވޭމަންޑޫ އަދި ތ. ދިޔަމިގިއްޔެވެ.

މި ރަށްރަށުގެ ތެރެއިން މޮނިޓަރިންގައި އޮންނަތާ އެންމެ ގިނަ ދުވަސް ވެފައިވަނީ ރ. ދުވާފަރެވެ. ދުވާފަރު މޮނިޓަރިންގެ ހާލަތަށް ގެނެސްފައިވަނީ މެއި މަހުގެ 25 ވަނަ ދުވަހުއެވެ. ދުވާފަރު މޮނިޓަރިންގެ ހާލަތުގައި އޮންނަތާ މިހާރު މިވަނީ 4 މަސް ވާން ކައިރިވެފައެވެ.