ދުނިޔޭގެ ފުޓްބޯޅައިގެ މައި އިދާރާ، ފީފާއިން މަހަކު އެއް ފަހަރު ނެރޭ ދުނިޔޭގެ ފުޓްބޯޅަ ރޭންކިންގެ ތިންވަނައަށް އިންގްލެންޑް ޖެހިލައިފިއެވެ.

ބުރާސްފަތި ދުވަހު ފީފާއިން ނެރުނު ރޭންކިންގެ ތިންވަނައިގައި އިންގްލެންޑް އޮތްއިރު، މިއީ 2012 ވަނަ އަހަރުގެ ސެޕްޓެމްބަރު މަހަށްފަހު ރޭންކިންގެ ތިންވަނައަށް އިންގްލެންޑް ޖެހިލި ފުރަތަމަ ފަހަރެވެ. 1992 ވަނަ އަހަރުން ފެށިގެން ފީފާއިން ފުޓްބޯޅަ ރޭންކިން ނެރެމުން އަންނައިރު، އިންގްލެންޑަށް މިހާތަނަށް ރޭންކިންގައި އެންމެ ކުރިއަށް ޖެހިލެވުނީވެސް ތިންވަނަ އަށެވެ.

މީގެ ކުރިން ރޭންކިންގެ ހަތަރުވަނައިގައި އިންގްލެންޑް އޮތްއިރު، އެ ގައުމުން ވަނީ މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތުގައި ފައިނަލުގައި ވާދަކޮށްފައެވެ. މިއީ ޔޫރޯގެ ތާރީޚުގައި ފައިނަލް މެޗުގައި އިންގްލެންޑް ވާދަކުރި ފުރަތަމަ ފަހަރެވެ. އަދި މިއީ 1966 ވަނަ އަހަރުގެ ފީފާ ވޯލްޑް ކަޕަށްފަހު ބޮޑު މުބާރާތެއްގެ ފައިނަލުގައި އިންގްލެންޑް ކުޅުނު ފުރަތަމަ ފަހަރެވެ. އެ މުބާރާތުގެ ފައިނަލުން އިންގްލެންޑް ބަލިވީ އިޓަލީ އަތުން ޕެނަލްޓީ ޖަހައިގެންނެވެ.

މީގެ އިތުރުން މިހާރު ކުރިއަށްދާ ފީފާ ވޯލްޑް ކަޕުގެ ޔޫރަޕް ކޮލިފައިންގައިވެސް އިންގްލެންޑުން ރަނގަޅު ނަތީޖާތަކެއް ނެރެމުން އަންނައިރު، ކޮލިފައިންގެ ގްރޫޕް އައިގައި ހިމެނޭ އިންގްލެންޑް އަދި މިހާތަނަށް މެޗަކުން ބަލިވެފައެއް ނުވެއެވެ. އެކަމަކު މި މަހު ޕޮލެންޑާ ދެކޮޅަށް ކުޅުނު މެޗުން އެއްވަރުވެ، އިންގްލެންޑުން ދަމަހައްޓަމުން އައި ސައްތައިން ސައްތަ ރިކޯޑަށް ވަނީ ނިންމުން އައިސްފައެވެ.

ބުރާސްފަތި ދުވަހު ފީފާއިން ނެރުނު ރޭންކިންގެ އެއްވަނައިގައި އޮތީ މީގެ ކުރިންވެސް އެ މަގާމުގައި އޮތް ބެލްޖިއަމެވެ. އަދި ދެވަނައިގައި ބްރެޒިލް އޮތްއިރު، ދުނިޔޭގެ އެންމެ ފަހުގެ ޗެމްޕިއަނުން ކަމަށްވާ ފްރާންސް ވަނީ ހަތަރުވަނައަށް ވެއްޓިފައެވެ. ރޭންކިންގެ ފަސްވަނައިގައި ޔޫރަޕުގެ ޗެމްޕިއަން އިޓަލީ އޮތްއިރު، ހަވަނައިގައި އޮތީ ދެކުނު އެމެރިކާގެ ޗެމްޕިއަން އާޖެންޓީނާއެވެ. އަދި ޕޯޗުގަލް ހަތްވަނައަށް ކުރިއަށް ޖެހިލިއިރު، ސްޕެއިން ވަނީ އަށްވަނައަށް ވެއްޓިފައެވެ. މީގެ އިތުރުން ރޭންކިންގެ ނުވަވަނައިގައި މެކްސިކޯ އޮތްއިރު، ޑެންމާކް ވަނީ މި ފަހަރުގެ ރޭންކިންގެ 10 ވަނައަށް ކުރިއަށް ޖެހިލާފައެވެ.