ޕްރޮސެކިއުޓަރ ޖެނެރަސް ހުސައިން ޝަމީމް ގެންދެވި ކަޅުދަބަހުގެ ތަފްޞީލު ހަފްތާއެއްގެ ތެރޭގައި ހާމަކުރައްވާނެ ކަމަށް ކުރީގެ ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

އިނގިރޭސިވިލާތުގެ އިމިގްރޭޝަންގެ ގާނޫނާ ޚިލާފުވެގެން ހައްޔަރުކޮށް އެ ގައުމުގެ ޑިޓެންޝަން ޖަލެއްގައި ބަންދުގައި ހުންނަވައި ކުރެއްވި ޓްވީޓެއްގައި އަލީ ވަހީދު ވިދާޅުވީ، އިންސާނެއްގެ މިނިވަންކަން ނުހައްޤުން ހިފަހެއްޓުމުގެ ޖާގަ ދައުލަތުގެ އެއްވެސް މުއައްސަސާއަކަށް ނޯންނާނެ ކަމަށެވެ. އަދި ރިފޯމްގެ ނަމުގައި އެއް ލޯފާމަކަށް ޖުޑީޝަރީ ޕްރައިވެޓައިޒްކޮށް ކިލަނބުކޮށްލާފައިވާ ކަމަށާއި، 25 އޮކްޓޯބަރ 2015 ގައި ޕީޖީ ހުސައިން ޝަމީމް ގެންދެވި ކަޅުދަބަހުގެ ތަފްޞީލު ހަފްތާއެއްގެ ތެރޭގައި ހާމަކުރައްވާނެ ކަމަށް ވިދާޅުވިއެވެ.

އަލީ ވަހީދު ގެންދަވަނީ މި ފަހަކަށް އައިސް ރާއްޖޭގެ ޝަރުއީ ނިޒާމަށް ފާޑުވިދާޅުވަމުންނެވެ. މީގެ ކުރިންވެސް އަލީ ވަހީދު ވަނީ އެމްއެމްޕީއާރުސީގެ ޚިޔާނާތުގެ ލިސްޓު ފެށެނީ ޕްރޮސެކިއުޓާ ޖެނެރަލް ހުސައިން ޝަމީމާ ހިސާބުން ކަމަށާއި ރެހެންދި ފްލެޓުން ކަޅު ދަބަސް ހިފައިގެން ނިކުތް މީހުން އޮޅިފައިނުވާކަމަށް ވިދާޅުވެފައެވެ.

އަލީ ވަހީދު ވިދާޅުވީ، ދިވެހިރާއްޖޭގައި މިވަގުތު މިނިވަން ޝަރުޢީ ނިޒާމެއް ނެތްކަމާއި، އޮތީ "ޝަމީމީ ނިޒާމެއް" ކަމަަށެވެ.

އަލީ ވަހީދު އިނގިރޭސިވިލާތުގެ އިމިގްރޭޝަން ގަވައިދާ ޚިލާފުވެފައިވާތީ ހައްޔަރުކޮށްފައިވަނީ އޮގަސްޓް މަހުގެ 25 ވަނަ ދުވަހުއެވެ.

އަލީ ވަހީދުގެ މައްޗަށް ކްރިމިނަލް ކޯޓުގައި ދައުވާ އުފުލާފައިވަނީ، މިނިސްޓަރު ކަމުގެ މަގާމުގައި ހުންނަވައި، އެ މިނިސްޓްރީގެ އަންހެން މުުވައްޒަފުންތަކަކަށް ޖިންސީ ގޯނާ ކުރި މައްސަލައެކެވެ. މިކަމާ ގުޅިގެން ޖުމްލަ 7 ދައުވާއެއް އޭނާގެ މައްޗަށް އުފުލާފައިވެއެވެ. ދައުވާތަކުގެ އަޑުއެހުން ކުރިއަށްދަނިކޮށް ރާއްޖެއިން ބޭރަށް ވަޑައިގެންނެވީ، ބޭސްފަރުވާއަށް ކަމަށް ވިދާޅުވެއެވެ.