ޕީއެސްޖީ އެއްވަރު، ރެއާލަށް މޮޅެއް

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ކުލަބު ބްރޫޖާއި ޕީއެސްޖީ ބައްދަލުކުރި މެޗު އެއްވަރުވިއިރު، އިންޓަ މިލާން އަތުން ފަހު ވަގުތު ރެއާލް މެޑްރިޑް މޮޅުވެއްޖެއެވެ.

ގްރޫޕް އޭގައި ހިމެނޭ ޕީއެސްޖީ އެއްވަރުވީ ބްރޫޖާ ވާދަކޮށް 1-1 ގެ ނަތީޖާއަކުންނެވެ.

ބްރޫޖުގެ ދަނޑުގައި ކުޅުނު މި މެޗުގައި ޕީއެސްޖީން ވަނީ އެ ޓީމުގެ ފުރަތަމަ އެގާރައިގައި އާޖެންޓީނާގެ ތަރި ލިއޮނެލް މެސީ ހިމަނާފައެވެ. މިއީ މި ފަހަރުގެ ޓްރާންސްފާ ބާޒާރުގައި ބާސެލޯނާ ދޫކޮށް ޕީއެސްޖީއަށް ބަދަލުވި މެސީ، އެ ޓީމުގެ ފުރަތަމަ އެގާރައިގައި ހިމެނިގެން ކުޅުނު ފުރަތަމަ މެޗެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޕީއެސްޖީންނެވެ. މެޗު ފަށައިގެން 15 ވަނަ މިނެޓުގައި ކީލިއަން އެމްބާޕޭ ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ އަންޑަ ހެރޭރާއެވެ. އެކަމަކު މެޗުގެ 27 ވަނަ މިނެޓުގައި އެޑުއާޑް ސޮބޮލް ތަނަވަސްކޮށްދިން ފުރުސަތަކުން ކެޕްޓަން ހަންސް ވަނަކެން ވަނީ ލަނޑެއް ޖަހައި ބްރޫޖަށް ނަތީޖާ އެއްވަރުކޮށްދީފައެވެ.

އޭގެ ފަހުން މި މެޗުގައި ޕީއެސްޖީއަށް އެންމެ އެދެވޭ ކުޅުމެއް ދެއްކިފައި ނުވި ނަމަވެސް، ފުރަތަމަ ހާފުގައި މެސީ ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އަދި މި މެޗުގައި ޕީއެސްޖީއަށް މައްސަލަތަކެއް ކުރިމަތިވީ ދެވަނަ ހާފުގެ ކުރީކޮޅު އަނިޔާއެއްގެ ސަބަބުން އެމްބާޕޭ ބަދަލުކުރަން ޖެހުމާ ގުޅިގެންނެވެ.

މީގެ އިތުރުން ޗެމްޕިއަންސް ލީގުގެ ގްރޫޕް ޑީގައި ހިމެނޭ މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް މޮޅުވީ އިންޓަ އަތުން 1-0 ގެ ނަތީޖާއަކުންނެވެ.

އިންޓަގެ ދަނޑުގައި ކުޅުނު މި މެޗުގައި ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މި މެޗުން ރެއާލް މޮޅުވީ ފަހު މިނެޓުގައި ޖެހި ލަނޑާއެކުއެވެ. ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން އެރި އެޑޮއާޑޯ ކަމަވިންގާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ރޮޑްރީގޯއެވެ.

މި މޮޅާއެކު ރެއާލުން މި ފަހަރުގެ މުބާރާތުގެ ފެށުން ރަނގަޅުކުރިއިރު، ބުދަ ދުވަހުގެރޭ ކުޅުނު މި ގްރޫޕުގެ އަނެއް މެޗުން ޝެރިފް ވަނީ އަމިއްލަ ދަނޑުގައި ކުޅެ 2-0 ގެ ނަތީޖާއަކުން ޝަޚްތާރު ޑޮނިއެސްކް ބަލިކޮށްފައެވެ.