ލިވަޕޫލާއި ސިޓީއަށް މޮޅެއް

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ކުޅުނު މެޗުތަކުން ލިވަޕޫލާއި މެންޗެސްޓާ ސިޓީ މޮޅުވެއްޖެއެވެ.

ގްރޫޕް ބީގައި ހިމެނޭ ލިވަޕޫލް މޮޅުވީ އޭސީ މިލާން އަތުން 3-2 ގެ ނަތީޖާއަކުންނެވެ.

ލިވަޕޫލުގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު ލިވަޕޫލުން ވަނީ ލީޑު ނަގާފައެވެ. މި ލަނޑަކީ މެޗު ފަށައިގެން ނުވަވަނަ މިނެޓުގައި މިލާނުގެ ފިކާޔޯ ޓޮމޯރީ އަތުން ބައިކޮޅަށް ވަން ލަނޑެކެވެ. އަދި އޭގެ ފަސް މިނެޓު ފަހުން ލީޑު ފުޅާކުރަން ލިވަޕޫލަށް ޕެނަލްޓީއެއް ލުބުނު ނަމަވެސް، އެ ޓީމުގެ މުހައްމަދު ސަލާހު ފޮނުވާލި ޕެނަލްޓީ މިލާނުގެ ގޯލްކީޕަރު މައިކް މައިންގްނަން ވަނީ މަތަކޮށްފައެވެ.

އެއާއެކު ފުރަތަމަ ހާފު ނިމެން ގާތް ވެފައި ވަނިކޮށް ދެ މިނެޓު ތެރޭ ދެ ލަނޑު ޖަހައި، މިލާނުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ އަންޓެ ރެބިޗް އާއި ބްރަހިމް ޑިއާޒެވެ. މި މެޗުގައި ލިވަޕޫލުން ނަތީޖާ އެއްވަރުކޮށްފައިވަނީ ދެވަނަ ހާފު ފަށައިގެން ހަތަރުވަނަ މިނެޓުގައި ސަލާހު ކާމިޔާބުކޮށްދިން ލަނޑުންނެވެ. އަދި މި މެޗުން ލިވަޕޫލް މޮޅުކޮށްދިން ލަނޑު މެޗުގެ 69 ވަނަ މިނެޓުގައި ކާމިޔާބުކޮށްދިނީ ކެޕްޓަން ޖޯޑަން ހެންޑަސަންއެވެ.

މި މެޗުން މިލާާން ބަލިވިއިރު، މި މެޗަކީ 2013-2014 ވަނަ އަހަރުގެ ސީޒަނަށްފަހު މިލާނުން ޗެމްޕިއަންސް ލީގުގައި ކުޅުނު ފުރަތަމަ މެޗެވެ.

ގްރޫޕް ބީގައި ކުޅުނު ފުރަތަމަ މެޗުން މިލާން އަތުން ލިވަޕޫލް މޮޅުވިއިރު، ބުދަ ދުވަހުގެރޭ ކުޅުނު މި ގްރޫޕުގެ އަނެއް މެޗުން އެތުލެޓިކޯ މެޑްރިޑާއި ޕޯޓޯ ވަނީ ލަނޑެއް ނުޖެހި އެއްވަރުވެފައެވެ.

މީގެ އިތުރުން ޗެމްޕިއަންސް ލީގުގެ ގްރޫޕް އޭގައި ހިމެނޭ ސިޓީ މޮޅުވީ އާރްބީ ލައިޕްޒީގް އަތުން 6-3 ގެ ނަތީޖާއަކުންނެވެ.

ސިޓީގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް އެ ޓީމުންނެވެ. މެޗުގެ 20 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ނޭތަން އަކޭއެވެ. އަދި މެޗުގެ 28 ވަނަ މިނެޓުގައި ސިޓީން ލީޑު ފުޅާކުރިއިރު، މި ލަނޑަކީ ލައިޕްޒީގުގެ ނޯޑީ މުކިއޭލޭ އަތުން ބައިކޮޅަށް ވަން ލަނދެކެވެ.

މި މެޗުގެ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ކްރިސްޓޮފާ އެންކުންކޫ ކާމިޔާބުކޮށްދިން ލަނޑުން ލައިޕްޒީގުން ފަރަގު ކުޑަކުރި ނަމަބެސް، މި ހާފުގެ އިތުރު ވަގުތުގައި ލިބުނު ޕެނަލްޓީއަކުން ރިޔާދު މާރޭޒް ވަނީ ސިޓީއަށް އަލުން ލީޑު ފުޅާކޮށްދީފައެވެ.

އަދި ދެވަނަ ހާފު ފަށައިގެން ހަވަނަ މިނެޓުގައި އެންކުންކޫ އިތުރު ލަނޑެއް ޖަހައި، ލައިޕްޒީގަށް އަލުން ފަރަގު ކުޑަކޮށްދިން ނަމަވެސް، އޭގެ ފަސް މިނެޓު ފަހުން ޖެކް ގްރީލިޝް ވަނީ ސިޓީގެ ހަތަރުވަނަ ލަނޑު ޖަހާފައެވެ. ނަމަވެސް މެޗުގެ 73 ވަނަ މިނެޓުގައި އެންކުންކޫ ވަނީ އިތުރު ލަނޑެއް ޖަހައި، މި މެޗުގައި ހެޓްރިކް ހަދާފައެވެ. އެއާއެކު އެންކުންކޫ ވެފައިވަނީ ޗެމްޕިއަންސް ލީގުގައި ހެޓްރިކެއް ހެދި ލައިޕްޒީގުގެ ފުރަތަމަ ކުޅުންތެރިޔާއަށެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި ސިޓީގެ އަނެއް ދެ ލަނޑު ކާމިޔާބުކޮށްދިނީ ޖޮއާއޯ ކަންސޭލޯ އާއި ގަބްރިއެލް ޖީސޫސްއެވެ. އަދި ލައިޕްޒީގުން މި މެޗު ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗުގެ 79 ވަނަ މިނެޓުގައި އެ ޓީމުގެ އެންޖެލީނޯއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ.