މިއަދު ފެނިގެން މިދަނީ ރައީސް ޞާލިޙްގެ ހާރިޖީ ސިޔާސަތު ބޭރު ދުނިޔެ ބަލައިގެންފައިވާ މިންވަރު
އދ.ގެ 76 ވަނަ އާންމު މަޖިލީހުގެ ރައީސް އަދި ރާއްޖޭގެ ޚާރިޖީ ވަޒީރު އަބްދުﷲ ޝާހިދު
މިއަދު ދިވެހިރާއްޖޭގެ ފެއްސާއި، ރަތާއި ހުދުގެ ފަޚުރުވެރި ދިދަ ވިހުރެމުން މިދަނީ ބައިނަލްއަގްވާމީ އެންމެ އުސް ކުރިބޯށީގައި ކަމަށް އދ.ގެ 76 ވަނަ އާންމު މަޖިލީހުގެ ރައީސް އަދި ރާއްޖޭގެ ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
އދ.ގެ 76 ވަނަ އާންމު މަޖިލީހުގެ ރައީސްގެކަމުގެ ހުވާކުރެއްވުމަށްފަހު ވާހަކަ ދައްކަވަމުން ޝާހިދު ވިދާޅުވީ އދ.ގެ ޢާންމު މަޖިލީހުގެ ރައީސްކަމުގެ ހުވާ ކުރެއްވުމަށްފަހު އެ ޢިއްޒަތްތެރި މަޖިލީހުގެ ކުރިމަތީގައި ހުއްޓިހުންނެވީ އެމަނިކުފާނަށް އެންމެހާ ބޭފުޅުން ދެއްވި އިތުބާރާއި، ހަވާލުކުރެއްވި ޒިންމާއާއި މަސްއޫލިއްޔަތުގެ މަތިވެރިކަން އިޙްސާސް ކުރައްވަމުން ކަމަށެވެ. އަދި ލޮބުވެތި ގައުމު، ދިވެހިރާއްޖެއަށް ދެއްވި ޢިއްޒަތާއި ޝަރަފަށްޓަކައި ނުހަނު އިޚްލާސްތެރި ކަމާއެކު ޝުކުރުވެރިވާ ކަމަށެވެ.
ޝާހިދު ވިދާޅުވީ ދިވެހިރާއްޖޭގެ ފެއްސާއި ރަތާއި ހުދުގެ ފަޚްރުވެރި ދިދަ ވިހުރެމުން މިދަނީ ބައިނަލްއަޤްވާމީ އެންމެ އުސް ކުރިބޯށީގައި ކަމަށެވެ. ދިވެހި ޤައުމުގެ ފަޚްރުވެރި އަބްޠާލުންގެ މަތިވެރި ޖިހާދާއި، ދިވެހި ރައްޔިތުންގެ ހިތްވަރުގަދަ ޤުރުބާނީގެ ސަބަބުން މިއަދު ދިވެހި ދައުލަތުގެ ނަން ވިދަމުން ދަނީ ބައިނަލްއަޤްވާމީ އުދަރެހުގެ އެންމެ އުހުގައި ކަމަށެވެ.
ޝާހިދު ވިދާޅުވީ އދ.ގެ 76 ވަނަ އާންމު މަޖިލީސް ވެގެންދާނީ އުންމީދީ މަޖިލީހަކަށް ކަމަށާއި، އަދި މި މަޖިލީހަކީ އިންސާނިއްޔަތުކަމަށް އަހައްމިއްޔަތުކަން ދޭނެ މަޖިލީހެއް ކަމަށް އެމަނިކުފާނު ވިދާޅުވިއެވެ.
އދ.ގެ ޢާންމު މަޖިލީހުގެ 75 ވަނަ ސެޝަންގައި ރައީސް ވޮލްކަން ބޮޒްކިރް، ދެއްކެވި ހިންގުންތެރި ކަމަށް ޝާހިދު ވަނީ އައްސަރިބަހާއި ސާބަސް ދެއްވާފައެވެ. އަދި ޕެންޑަމިކެއްގެ ތެރޭގައި ޢާންމު މަޖިލީހުގެ މަސައްކަތްތައް ކުރިއަށް ގެންދިޔުމަކީ ފަސޭހަ ކަމެއް ނޫންކަން ފާހަގަކުރައްވައި ޝާހިދު ވިދާޅުވީ ރައީސް ވޮލްކަން ބޮޒްކިރް، ހިފެހެއްޓެވި ފުރިހަމަ ޢަޒުމާއި، ކެރުމާއި ހިތްވަރަށްޓަކައި އެމަނިކުފާނާއި ޔޫއެންޖީއޭ މަޖިލީހުގެ މެންބަރުންގެ ނަމުގައި ޝުކުރުދަންނަވާ ކަމަށެވެ.
މީގެ އިތުރުން އެކަކު އަނެކަކާ ބައްދަލުވެ ދިމާވެގެން ކުރިއަށް ގެންދެވޭ ޑިޕްލޮމެޓިކް ޙަރަކާތްތަކުގެ ޗެމްޕިއަންކަން ޙާޞިލްކޮށް އދ.ގެ ޢާންމު މަޖިލިސް އަލުން ހުޅުވިގެން ދިޔަ ދިޔުމަކީ، މަލްޓިލެޓެރަލިޒަމްއަށް ރައީސް ވޮލްކަން ބޮޒްކިރް، ދެއްވާ އަހަމިއްޔަތުކަމުގެ އަލިގަދަ ހެއްކެއް ކަމަށް ޝާހިދު ވިދާޅުވިއެވެ.
ސެކްރެޓަރީ ޖެނެރަލް އެންޓޯނިއޯ ގުޓެރޭޝް، ދެވަނަ ދައުރު ފައްޓަވާއިރު، އެމަނިކުފާނު ހުންނެވީ ގާތުން މަސައްކަތް ކުރުމަށް ތައްޔާރުވެ، އެ އުންމީދުގައި ކަމަށް ޝާހިދު ވިދާޅުވިއެވެ. އަދި އެންޓޯނިއޯ ގުޓެރޭޝް އެންމެ އިސްކަންދެއްވާ ކަމަކީ "އިތުބާރު އާލާކުރުމާއި އުންމީދު އާކުރުން" ކަން ދެނެވަޑައިގަންނަވާ ކަމަށާއި، ދެ ޤައުމެއްގެ ދެމެދުގައި ޖެހޭ ޚާރިޖީ މައްސަލަތަކާއި، ދުނިޔޭގެ މޫސުމަށް އަންނަ ބަދަލުތަކާއި، ޢާލަމީ ވަބާތަކުގެ އިތުރުން ފަޤީރުކަން އަދި ނާއިންސާފުން ހިނގާ ކަންކަން ފަދަ މައްސަލަތައް ހައްލުކުރުމަށް ގުޓެރޭޝް ގެންގުޅުއްވާ އެންމެ މުހިންމު އެއް އުކުޅަކީ، އެކަމަކަށް ދުރާލާ ތައްޔާރުވެ ފިޔަވަޅު އެޅުއްވުން ކަމަށް ޝާހިދު ވިދާޅުވިއެވެ.
ވޭތުވެދިޔަ 18 މަހަކީ ކުރިމަތިވި ބޮޑު ގޮންޖެހުމެއް ކަމަށް ވިދާޅުވުމުން އަދި އެ ދުވަސްތައް އެންމެ ފުރިހަމައަކަށް ބަޔާން ކުރެވުނު ކަމަކަށް ނުވާނެ ކަމަށާއި، ކޮވިޑް-19 ގެ ސަބަބުން އިޙްސާސްކުރަން ޖެހުނު ކަންކަމުގެ އިތުރަށް ކޮންމެ ދުވަހަކު އިވެމުން ދަނީ ހާސްކަން އިތުރުކުރުވާ ޚަބަރުތައް ކަމަށް ޝާހިދު ވިދާޅުވިއެވެ. މިގޮތުން ދުނިޔޭގެ މޫސުމަށް އަންނަ ބަދަލުތަކުގެ ވާހަކައާއި، ކާރިސާތަކާއި، މަސްލަޙަތު ގެއްލި ދުނިޔޭގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތަކުގެ ޚަބަރުތައް ފަލަސުރުޚީތަކުން ފެންނަމުންދިޔަ ކަމަށް ޝާހިދު ވިދާޅުވިއެވެ. އަދި މިކަންކަން ބަދަލުކުރަން އެބަޖެހޭ ކަމަށާއި، ބަދަލުތައް ގެނައުމަށް ފަށައިގަންނަންވީ އަޅުގަނޑުމެން ކަމަށް ޝާހިދު ވިދާޅުވިއެވެ.
ރައްޔިތުން ކުރިއަށްދާނެ މަގު ހޯދަން ބައްލަވާނީ، އަދި އެމީހުންގެ ނަޒަރު ހުއްޓެނީ އެމީހުން ގެ ލީޑަރުންނަށާއި އަދި އިންތިޚާބުކޮށްފައިވާ އޮފިޝަލުންނަށް ކަމަށާއި، އެމީހުންގެ ފަރާތުން ޔަގީންކަން ކަށަވަރު ކުރައްވަން ބޭނުންފުޅުވާ ކަމަށާއި، ކަންކަން ރަނގަޅުވާނޭ ކަމުގެ އުއްމީދަކަށް އެދެނީ އެމީހުންގެ ކިބައިން ކަމަށް ޝާހިދު ވިދާޅުވިއެވެ. އަދި އަދަށްވުރެ ފަހި މާދަމާއެއް އޮތްކަމުގެ ސިގުނަލް ވެސް ހޯދަނީ އެމީހުންގެ ކިބައިން ކަމަށް ޝާހިދު ވިދާޅުވިއެވެ. ޝާހިދު ވިދާޅުވީ އދ. އަކީ މިކަންކަން ފުރިހަމަކުރުމުގައި އިސްދައުރެއް އަދާކުރާ ތަނެއް ކަމުގައި ވާންޖެހޭ ކަމަށެވެ.
ޝާހިދު ވިދާޅުވީ ކޮވިޑްގެ ބަލިމަޑުކަމާއެކު ކުރިން ތަޖުރިބާކޮށްފައި ނުވާފަދަ ކާރިސާއަކާ ކުރިމަތިވީނަމަވެސް، އެވަބާގެ ސަބަބުން ހިތްހެޔޮކަމާއި، އިންސާނިއްޔަތު ކަމުގެ ލާމަސީލު ނަމޫނާތަކެއް ވެސް ފެނިގެން ގޮސްފައިވާ ކަމަށެވެ. އަދި އެއާއެކު އިންސާނިއްތަށާއި، ޤައުމުތަކުގެ އެއްބައިވަންތަކަމަށް ކުރާ އުންމީދު އާވެ، އާލާވެގެން ހިނގައްޖެ ކަމަށެވެ. މި އިންސާނިއްތުގެ ބޭނުން އެންމެ ފުރިހަމައަށް ހިފުމަށް ޝާހިދު ވަނީ ގޮވާލައްވާފައެވެ.
ޝާހިދު ވިދާޅުވީ އެމަނިކުފާނުގެ ރިޔާސަތަށް ޚާއްސަކޮށްފައިވާ ތަޞައްވުރަކީ އުންމީދު ކަމަށެވެ. އަދި އެގޮތަށް ދަންނަވަނީ ނުވިސްނޭތީ، ނުވަތަ އެއީ އަޑު އަހާލަން ރީތި ލަފުޒަކަށް ވުމުން ނޫން ކަމަށާއި، އެހެން ދަންނަވަނީ، އުންމީދަކީ މި ދަނޑިވަޅަށް އެންމެ މުނާސަބު އިޙްސާސް ކަމަށް ވާތީ ކަމަށެވެ. އަދި އުއްމީދަކީ ކުރާ ކޮންމެ ކަމެއް ދޫކޮށްނުލާ ހިތްވަރާއެކު ގޮންޖެހުންތަކާ ކުރިމަތިލައިގެން މަސައްކަތް ކުރުމަށް މަގުފަހިކޮށްދޭ އިޙްސާސެއް ކަމަށެވެ. އުންމީދު ކުރައްވަނީ އިންސާނިޔަތަށްޓަކައި ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އެމަނިކުފާނު ގެނެސްދޭން ވަޢުދުވީ އުންމީދުގެ 5 ދޯދި ކަމަށެވެ. ކޮވިޑް-19ން އަރައިގަންނަމުންދާއިރު، އެންމެ ބޮޑު އިސްކަމެއް ދެއްވާނީ މުޅި ދުނިޔޭގެ އެންމެން ވެކްސިން ފުރިހަމަކުރުމުގެ މަގުފަހި ކޮށްދިނުމަށް ކަމަށެވެ. އަދި ވެކްސިން ލިބުމަށް ދިމާވާ އުނދަގޫތަކަށް ހައްލެއް ގެންނަން އެބަޖެހޭ ކަމަށާއި، މިއާއެކު، ޤައުމުތަކުގެ ލީޑަރުންނާއި ކަމާގުޅޭ ތަޖުރިބާކާރުންނާއެކު މި މައްސަލައާ ގުޅޭ މަތީ ފެންވަރުގެ ބަހުސެއް ކުރިއަށްގެންދަން ނިންމާފައިވާކަމަށް ޝާހިދު ވިދާޅުވިއެވެ.
