ހަމާސް އިން ހަތިޔާރު ދޫކޮށް، ޣައްޒާގެ ކޮންޓްރޯލް ފަލަސްޠީނު އޮތޯރިޓިއާ ހަވާލު ކުރަން ޖެހޭ: ފަލަސްޠީނުގެ ބޮޑު ވަޒީރު

ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން ހަތިޔާރު ދޫކޮށް، ޣައްޒާގެ ކޮންޓްރޯލް ފަލަސްޠީނުގެ އޮތޯރިޓީއާ ހަވާލު ކުރަން ޖެހޭ ކަމަށް ފަލަސްޠީނުގެ ބޮޑު ވަޒީރު މުޙައްމަދު މުސްޠަފާ ވިދާޅުވެއްޖެ އެވެ.

އެމެރިކާގެ ނިއު ޔޯކުގައި ބޭއްވުނު އދ ގެ ކޮންފަރެންސްގައި ވާހަކަ ދައްކަވަމުން މުސްޠަފާ ވިދާޅުވީ، ޣައްޒާގައި އަމާންކަން އަލުން ޤާއިމު ކުރުމަށް ޓަކައި ހަމާސް އިން އެ ސަރަހައްދުގެ ކޮންޓްރޯލް ދޫކޮށްލަން ޖެހޭ ކަމަށެވެ. އަދި ހަތިޔާރު ތަކާއި، ޣައްޒާގެ ކޮންޓްރޯލް ފަލަސްޠީނުގެ އޮތޯރިޓީއާ ހަވާލު ކުރަން ޖެހޭ ކަމަށް ވެސް އޭނާ ވިދާޅުވި އެވެ.

ފްރާންސް އާއި ސައުދީ އަރަބިއްޔާގެ އިސްނެގުމުގެ މަތިން ބޭއްވި އެ ކޮންފަރެންސްގައި ވާހަކަ ދައްކަވަމުން ފްރާންސްގެ ފޮރިން މިނިސްޓަރު ޖީން ނޯއެލް ބަރޮޓް ވިދާޅުވީ، ފަލަސްޠީނުގެ މައްސަލައިގައި އޮތީ ދެ ދައުލަތުގެ ޙައްލު ކަމަށާއި، އެ ނޫން އެހެން އެއްވެސް ޙައްލެއް ނެތް ކަމަށެވެ. އިސްރާއީލް އާއި އެމެރިކާ އިން ވަނީ އދ ގެ އެ ކޮންފަރެންސް ބޮައިކޮޓް ކޮށްފަ އެެވެ. 

ދާދި ފަހުން ފްރާންސްގެ ރައީސް އިމަނުއެލް މެކްރޮކް ވަނީ، ސެޕްޓެމްބަރު މަހުގެ ތެރޭގައި ފަލަސްޠީނުގެ މިނިވަން ދައުލަތް ބަލައި ގަންނާނެ ކަމަށް އިއުލާން ކޮށްފަ އެވެ. އެކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ ނުރުހުން ފާޅު ކޮށްފަ އެވެ. އަދި އިސްރާއީލް އިން ވެސް ވަނީ އެކަމަށް ފާޑު ކިޔައިފަ އެވެ. 

އެ ކޮންފަރެންސްގައި ވާހަކަ ދައްކަވަމުން އދ ގެ ސެކްރެޓަރީ ޖެނަރަލް އެންޓޯނިއޯ ގުޓަރޭސް ވިދާޅުވީ، ދެ ދައުލަތުގެ ހައްލު ދަނީ އެއްް ދުވަހުން އަނެއް ދުވަހަށް ދުރަށް ކަމަށެވެ. 

މިހާރުު އދގެ 193 މެމްބަރު ޤައުމު ތަކުގެ ތެރެއިން 142 ޤައުމަކުން ވަނީ ފަލަސްޠީނު ދައުލަތެއްގެ ގޮތުގައި ޤަބޫލު ކޮށްފަ އެވެ. ޣައްޒާގައި ހިނގަމުން އަންނަ ހަނގުރާމާ އާއި، ވެސްޓް ބޭންކުގައި އިސްރާއީލް އިން ކުރިއަށް ގެންދާ އާބާދު ކުުރުމުގެ މަސައްކަތްތަކާ ގުޅިގެން ފަލަސްޠީނުގެ ދައުލަތެއް ޤާއިމު ކުރުމަކީ ޖިއޯގްރަފިކަލީ ނުވެދާނެ ކަމެއް ކަމަށް ބައެއް ފަރާތްތަކުން ބުނެ އެވެ.

ސައުދީ އަރަބިއްޔާގެ ފޮރިން މިނިސްޓަރު ފައިސަލް ބިން ފަރުޙާން ވިދާޅުވީ، އެމެރިކާގެ ރައީސް ޓްރަމްޕް އަށް ޣައްޒާ ހަނގުރާމަ ނިންމުމުގައި މުހިންމު ދައުރެއް އަދާ ކުރެވިދާނެ ކަމަށެވެ.