އިންތިޚާބަކާނުލާ ހޮވުނު 165 ކެންޑިޑޭޓުންގެ ނަންތައް އާންމުކޮށްފި

އެމްޑީޕީގެ އެތެރޭގެ އިންތިޚާބުގައި ވާދަކުރާ ކެންޑިޓޭޓުންގެ ތެރެއިން އިންތިޚާބަކާ ނުލައި ހޮވޭ ކެންޑިޑޭޓުންގެ ނަންތައް އެޕާޓީން އާންމުކޮށްފިއެވެ.

މި ލިސްޓު އާންމުކޮށްފައިވާއިރު އިންތިޚާބަކާ ނުލައި ހޮވިފައިވާ 165 ކެންޑިޑޭޓުންގެ ނަންތައް އެމްޑީޕީން ވަނީ އާންމުކޮށްފައެވެ. އިންތިޚާބަކާއި ނުލައި ގޮނޑި ޔަގީންވެފައިވަނީ އެގޮނޑިއަކަށް އެންމެ ކެންޑިޑޭޓަކު ކުރިމަތިލައްވާފައިވާތީއެވެ.

އިންތިޚާބާ ބެހޭ އެންމެ ފަހުގެ މައުލޫމާތު ހިއްސާކުރެއްވުމަށް އެމްޑީޕީގެ އޮފީހުގައި އާދީއްތަ ދުވަހު އޮތް ނޫސްވެރިންގެ ބައްދަލުވުމުގައި ޙަސަން ލަޠީފް ވިދާޅުވީ، އިންތިޚާބުގެ ކަންކަން ވަރަށް ފުރިހަމައަށް ކުރިއަށްދާ ކަމަށެވެ. އަދި މި އިންތިޚާބަކީ ވެސް ފޯރިގަދަ އިންތިޚާބަކަށް ވެގެންދާނެ ކަމުގެ ޔަގީންކަން އެބައޮތް ކަމަށެވެ. މިހާރު ކުރިއަށްދަނީ އިންތިޚާބަށް އޮފިޝަލުން ހޮވުމުގެ މަސައްކަތް ކަމަށާއި، ކޮންމެ ރަށެއްގައި ވޯޓު ފޮއްޓެއް ބަހައްޓާއިރު، ރަށްރަށުގައި ތިބި އެމްޑީޕީ މެމްބަރުންގެ ފަރާތުން މިކަމުގައި އެއްބާރުލުން ބޭނުންވާ ކަމަށެވެ.

އޭނާ ވިދާޅުވީ އިންތިޚާބުގައި 733 ކެންޑިޑޭޓުން ވާދަކުރައްވާއިރު، މިހާރު ލިސްޓް އާންމު ކޮށްފައިވާނެ ކަމަށެވެ. އެތެރޭގެ އިންތިޚާބުގައި ވޯޓު ލުމުގެ ހައްގު ލިބިގެންވާ 93،165 މީހުން އެބަތިބި ކަމަށާއި، ޝަކުވާ ހުށަހެޅުމަށް ހުޅުވާލި ފުރުސަތުގައި ލިބުނު ޝަކުވާ ތަކަށް ބެލުމަށްފަހު މި މަހުގެ 11 ވަނަ ދުވަހު ފައިނަލް ލިސްޓް އާއްމު ކޮށްފައިވާނެ ކަމަށް ވިދާޅުވިއެވެ.

ޝަކުވާ ހުށަހެޅުމަށް ހުޅުވާލުމުން ލިބުނު ޝަކުވާތަކަށް ބަލައި، 918 މީހަކު ވޯޓު ލުމުގެ ހައްގު ލިބިފައިވާ މީހުންގެ ލިސްޓުން އުނި ކޮށްފައިވާ ކަމަށް ވެސް ޙަސަން ލަޠީފް ވިދާޅުވިއެވެ.

ވޯޓަރސް ލިސްޓަށް ޝަކުވާ ހުށަހެޅުމަށް 11 ސެޕްޓެމްބަރުވީ ހޮނިހިރު ދުވަހުން ފެށިގެން 13 ސެޕްޓެމްބަރުވާ ހޯމަ ދުވަހުގެ މެންދަމު 12:00އާ ހަމައަށް ވަނީ ފުރުސަތު ހުޅުވާލާފައެވެ. މިހާރު އާއްމުކޮށްފައިވާ ލިސްޓަކީ 25 އޭޕްރީލް 2021ގައި ލިސްޓަށް ޝަކުވާ ހުށަހެޅުމަށް ހުޅުވާލެވި، 28 އޭޕްރީލް 2021ގައި ޝަކުވާ ހުށަހެޅުއްވުމަށް ވަގުތު އިތުރުކޮށް, ދެވުނު ފުރުސަތުގައި ޝަކުވާ ހުށަހެޅި މީހުންގެ ޝަކުވާތައް ބަލައި, ގެންނަންޖެހޭ ބަދަލުތައް ގެނައުމަށްފަހު އާންމު ކޮށްފައިވާ ދާއިމީ ލިސްޓު ކަމަށް އެމްޑީޕީން ބުނެފައިވެއެވެ.

އެމްޑީޕީގެ ދާއިރާތަކުގެ އިންތިޚާބު 25 ސެޕްޓެމްބަރު ވާ ހޮނިހިރު ދުވަހު ބޭއްވުމަށް އެ ޕާޓީން ވަނީ ނިންމާފައެވެ. އެމްޑީޕީން، ކުރިން ދާއިރާތަކުގެ އިންތިޚާބު ބޭއްވުމަށް ނިންމީ މެއި މަހުގެ ތެރޭގައެވެ. އެހެންނަމަވެސް ފަހުން ވަނީ ސެޕްޓެމްބަރަށް ފަސްކޮށްފައެވެ.

އެމްޑީޕީން މިނިންމުން ނިންމީ ޕާޓީގެ ރައީސް، ރައީސް މުޙައްމަދު ނަޝީދުގެ ފުރާނަފުޅު ދުއްވާލުމަށް ނުރައްކާތެރި ޓެރަރިސްޓް ހަމަލާއެއްދިނުމުގެ ސަބަބުން އެމަނިކުފާނުގެ ހާލުކޮޅު ސީރިއަސްވެ، އެމަނިކުފާނު ފަރުވާ ހޯއްދަވަމުން ގެންދަވާތީ ދާއިރާތަކުގެ އިންތިޚާބު 29 މެއި 2021ގައި ބޭއްވުމަކީ ރަނގަޅު ކަމެއް ކަމުގައި ނުފެންނާތީއެވެ.