އެމްބާޕޭ އާއި ހާލަންޑް އެއްފަހަރާ ގަނެވޭނެ ފައިސާ ރެއާލުގައި އެބަހުރި: ޓެބާސް

ޕީއެސްޖީއަށް ކުޅެމުން އަންނަ ފްރާންސްގެ ޒުވާން ތަރި ކީލިއަން އެމްބާޕޭ އާއި ބޮރޫޝިއާ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ތަރި އާލިން ބްރައުޓް ހާލަންޑް އެއްފަހަރާ ގަނެވޭނެ ފައިސާ ރެއާލް މެޑްރިޑުގައި އެބަހުރި ސްޕެނިޝް ލީގުގެ ރައީސް ހަވިއޭ ޓެބާސް ވިދާޅުވެއްޖެއެވެ.

މިވަގުތު ދުނިޔޭގެ ފުޓްބޯޅައިގައި އެންމެ ވިދުން ގަދަ ޒުވާން ދެ ތަރިން ކަމަށްވާ އެމްބާޕޭ އާއި ހާލަންޑް ގަތުމަށް ރެއާލުން މީގެ ކުރިންވެސް ވަނީ މަސައްކަތްކޮށްފައެވެ. އެގޮތުން މި ފަހަރުގެ ޓްރާންސްފާ ބާޒާރުގައި އުމުރުން 22 އަހަރުގެ އެމްބާޕޭ ގަތުމަށް ރެއާލުން ވަނީ ތިން ފަހަރަށް ބިޑްކޮށްފައެވެ.

ހޫނު މޫސުމުގެ ޓްރާންސްފާ ބާޒާރުގައި އެމްބާޕޭ ގަތުމަށް ރެއާލުން އެންމެ ފުރަތަމަ ހުށަހެޅީ 160 މިލިޔަން ޔޫރޯގެ ބިޑެކެވެ. އޭގެ ފަހުން ބޯނަހާއެކު ޖުމްލަ 180 މިލިޔަން ޔޫރޯގެ ބިޑެއް ހުށަހެޅިއިރު، ރެއާލުން އެންމެ ފަހުން ހުށަހެޅީ 220 މިލިޔަން ޔޫރޯގެ ބިޑެކެވެ. އެކަމަކު އެމްބާޕޭ ވިއްކާލަން ޕީއެސްޖީގެ ރައީސް ނާސިރު އެލް-ޚެއްލާފީ ބޭނުންނުވާތީ، އެ ބިޑުވެސް އެ ކުލަބުން ބަލައިގެންފައެއް ނުވެއެވެ.

މީގެ އިތުރުން އުމުރުން 21 އަހަރުގެ ހާލަންޑް ގަތުމަށް ރެއާލުން މީގެ ކުރިން މަސައްކަތްކުރިއިރު، ހާލަންޑް ގަތުމަށް ރެއާލުން ޝައުގުވެރިވާ ކަމަށާއި، އޭނާ ގަތުމުގެ ފެންވަރު އެ ކުލަބުގައި އެބަހުރި ކަމަށް ހާލަންޑުގެ އޭޖެންޓް މިނޯ ރައިއޯލާ މީގެ ކުރިން ވަނީ ބުނެފައެވެ.

އެކަމަކު މާލީ ހާލަތު ގޯސްވެފައިވާ މި ދަނޑިވަޅުގައި އެ ދެ ކުޅުންތެރިން ގަތުމަށް ބޮޑު ހޭދައެއް ރެއާލަށް ކުރެވިދާނެ ކަމާމެދު ވަނީ ސުވާލުއުފެދިފައެވެ. އެކަމާ ގުޅޭ ގޮތުން ޓެބާސް ވިދާޅުވީ އެ ދެ ކުޅުންތެރިން އެއްފަހަރާ ގަނެވޭނެ ފައިސާ ރެއާލުގައި އެބަހުރި ކަމަށާއި، އެ ކުލަބަށް މާލީ ގޮތުން މާ ބޮޑު ގެއްލުމެއް ނުވާ ކަމަށެވެ.

ރެއާލުން ތިން ބިޑެއް ހުށަހެޅުމުންވެސް ޕީއެސްޖީން އެމްބާޕޭ ނުވިއްކި މައްސަލައިގައި ޓެބާސް ވިދާޅުވީ 400 މިލިޔަނުގެ ގެއްލުމެއްވެ، ކުޅުންތެރިންގެ މުސާރަ 500 މިލިޔަނަށްވުރެ މަތީގައި އުޅޭ ކުލަބަކުން އަގު ބޮޑު ބިޑެއް ގަބޫލުނުކުރަން ނިންމުމުން އެކަމާ ސުވާލު އުފެދޭ ކަމަށެވެ. އެކަމަކު ރެއާލުގެ ރައީސް ފްލޮރެންޓީނޯ ޕެރޭޒަކީ ބަލި ގަބޫލުކުރާނެ މީހެއް ނޫން ކަމަށާއި، އެގޮތުން އެމްބާޕޭ ގަންނަން ޕެރޭޒް އަދިވެސް މަސައްކަތްކުރާނެ ކަމަށް ޓެބާސް ވަނީ ވިދާޅުވެފައެވެ.

އެމްބާޕޭ އާއި ހާލަންޑް އެއްފަހަރާ ގަނެވޭނެ ފައިސާ ރެއާލުގައި އެބަހުރި ކަމަށް ޓެބާސް ވިދާޅުވިއިރު، ރެއާލުން ވަނީ 2019 ވަނަ އަހަރުގެ ހޫނު މޫސުމުގެ ޓްރާންސްފާ ބާޒާރުގެ ފަހުން މި ފަހަރުގެ ޓްރާންސްފާގައި ޚަރަދެއް ކޮށްފައެވެ. އެއީ 40 މިލިޔަން ޔޫރޯ ޚަރަދުކޮށްގެން ގެނައި ފްރާންސްގެ ޒުވާން މިޑްފީލްޑަރު އެޑޮއާޑޯ ކަމަވިންގާއަށެވެ.