ހިތްވަރު ހުރެއްޖަނަމަ ބޯޓްބިލްޑިންގެ ދާއިރާއިން ޒުވާނުންނަށް ކުރިއަށްދެވޭނެ

އަބަދުވެސް އަޑުއިވޭ ވާހަކައަކީ ފަންނަނީ ވަޒީފާތަކަށް މީހުން މަދު ވާހަކައެވެ. ފަންނީ ވަޒީފާތަކުގެ ފުރުސަތު ރާއްޖޭގައި އޮތްއިރު އެކަމަށް އެންމެ ގާބިލު މީހުން ނުލިބޭ ވާހަކައެވެ. އެހެންވުމުން ދެން އެ މަގާމުތަކަށް ގެންނަން ޖެހެނީ ރާއްޖެއިން ބޭރުން ބިދޭސީންނެވެ. އަޅުގަނޑުމެންގެ މި ރާއްޖޭގެ ބޯޓް ބިލްޑިން އަކީވެސް މި ދާއިރާއިން ކުރިއަށް ދެވޭނެ ދާއިރާއެކެވެ. ހިތްވަރާއި އަޒުމާއެކު ކުރިއަށް ގޮސްފިނަމަ ރަނގަޅު މުސާރައެއް ވެސް ލިބޭނެ ދާއިރާއެކެވެ.

ރާއްޖޭގެ ޒުވާން ޖީލަށް ބަލާލިޔަސް ހާމަވެގެންދާ އެއް ކަމަކީ ގިނަ މީހުން ބޭނުންވަނީ އެހާ ބުރަ މަސައްކަތް ކުރަން ނުޖެހޭ ވަޒީފާއެކެވެ. ކޮމްޕިއުޓަރު ކައިރީގައި، މޭޒު ދޮށުގައި އިނދެ މަސައްކަތް ކުރުމަށްފަހު ގެއަށް ދެވޭނެ ކަހަލަ ފަސޭހަ ވަޒީފާއެކެވެ. ކަން މިހެން ހުރިއިރު ބޯޓްޔާޑް ދާއިރާގައި އުފެދޭ ޒުވާނުން މަދުކަން އެ ދާއިރާގައި އިސްކޮށް ހަރަކާތްތެރިވާން މީހުން އަބަދުވެސް ފާހަގަކުރެއެވެ. އަދި ދާއިރާއާ ދޭތެރޭގައި މުޖުތަމައު ދެކޭ ގޮތް ވެސް މިހާރު ބަދަލުކުރަން ޖެހިފައިވާކަމަށް ވަނީ ބުނެފައެވެ. ގިނަ ފަހަރަށް މިދާއިރާއާ ގުޅޭ ޒުވާން ކުއްޖާ މި ގުޅެނީ ދެން އެނޫން ގޮތެއް ނެތީމައޭ ބައެއް މީހުންނަށް ހީވާ ކަހަލައެވެ. އަދި އެ ކުއްޖަކާ ދެތެރޭގައި ދެކޭގޮތް ވެސް ތަފާތުވެގެންދެއެވެ.

ކަން މިހެން ހުރިއިރު މިދާއިރާގައި އުޅޭ "ހަރު މީހުން" ގެ އުންމީދަކީ މި ވިސުނުން ބަދަލުވެ، އަންނަން އޮތް ޖީލުތަކާއި ހަމައަށް މި މަސައްކަތް ފޯރުކޮށްދެވޭނެ މަގެއް ހޯދައި ދިނުމެވެ.

މި ދާއިރާގެ މަސައްކަތްތަކާއި ގުޅޭގޮތުން ބޯޓު ބަނުމުގައި 35 އަހަރު އުޅެފައިވާ، އެމްއެމްއެސް ބޯޓްޔާޑްގެ ސީއީއޯ އަލީ ހަސަންގެ އުންމީދަކީ ވެސް މިއީއެވެ. އަލީ ހަސަން ވިދާޅުވީ މި ދާއިރާއަށް ޝައުގުވެރިން އުފެދިގެން ދިޔައީ މީގެ އެތައް އަހަރުތަކެއް ކުރިން އަލިފުއްޓަށް އައި ބޭރު ޓީމެއްގެ ސަބަބުން ކަމަށެވެ. އެގޮތުން އޭނާއަށް އިނގިރޭސި ބަހުން ވާހަކަ ދައްކަން އެނގޭތީ ބަސް ތަރުޖަމާ ކޮށްދޭ މީހެއްގެ މަގާމަށް ވަގުތީ ގޮތުން އޭނާއަށް ވަޒީފާ ދިން ކަމަށެވެ. އަދި އެ ޓީމުން ރާއްޖެއައި ދިރާސާ އެއް ހަދަންކަން ފާހަގަކޮށް ހަސަން ވިދާޅުވީ ބޯޓް ބިލްޑިންގ ސެޓަޕް ހަދަން އެޓީމުން އެކި ރަށްރަށަށް ދަތުރުކުރި ކަމަށެވެ. އެއަށްފަހު އަލިފުށީގައި ބޯޓްޔާޑެއް އެޅުމަށް ނިންމި ކަމަށެވެ. އެމީހުންނާއެކު އުޅުމުގެ ތެރޭގައި މި މަސައްކަތަށް ބޭނުންވާ ސާމާނުތަކާއި ބޯޓުތައް ފެނުމުން، މި ޝައުގުވެރިކަން އުފެދިގެން ދިޔަ ކަމަށް އޭނާ ވިދާޅުވިއެވެ.

މިހާރު އެ ކުންފުނިން ލަކުޑި ހުންނަ ގޮތަށް ފައިބަރުން ދޯނި ފަހަރު ބަނުމަށްފަހު ޑިޖިޓަލް ޕްރިންޓް ކުރާ ކަމަށާއި ރިސޯޓުތަކަށް ބޭނުންވާ އުޅަނދުތައް، ކަސްޓަމަރު ބޭނުންވާ ގޮތަށް ހަދައިދޭ ކަމަށް ވެސް ވަނީ ވިދާޅުވެފައެވެ. އެގޮތުން އެކި ދޯނި ފަހަރު ބަނދެފައިވާއިރު ރިސޯޓުތަކަށް ބޭނުންވާ ވޯޓަރ ސްލައިޑް ވެސް އެމީހުން ތައްޔާރުކޮށްދެއެވެ.

ހަސަން ވިދާޅުވީ މިއީ ދިވެހިންގެ ހުނަރު ބޭރުގެ މީހުންނަށް ދައްކާލުމުގެ ފުރުސަތު ލިބިގެންދާ ވަރަށް ރަނގަޅު ދާއިރާއެއް ކަމަށެވެ. މިދާއިރާގައި އެހާ ދިގު މުއްދަތަކަށް ހިދުމަތްކުރި މީހެއްގެ ހައިސިއްޔަތުން ޒުވާނުން ނެރެ، ބޯޓްބިލްޑިންގ ދާއިރާއަކީ ރާއްޖޭގައި ނަން ކިޔާލެވޭ ފެންވަރުގެ ދާއިރާއަކަށް ހަދަން ބޭނުންވާކަމަށް ވިދާޅުވިއެވެ.

މީހުން ބުނެ އުޅެއެވެ. އެއްވެސް މަސައްކަތަކީ ހަޑި މަސައްކަތެއް ނޫނެވެ. ހިތްވަރާއި އަޒުމު ހުރެއްޖެނަމަ ކޮންމެ ދާއިރާއަކުން ވެސް އެ މީހަކަށް ކުރިއަށް ދެވޭނެއެވެ. އުންމީދަކީ މި ދާއިރާއަށް ގިނަ ޒުވާނުން ނިކުމެ ރާއްޖޭގައިވެސް ކުޅަދާނަ މީހުން މި ދާއިރާއިން ވެސް ބިނާވެގެންދާނެކަން ސާބިތުކޮށްދިނުމެވެ. ހިތްވަރު ހުރެއްޖަނަމަ ބޯޓް ބިލްޑިންގެ ދާއިރާއިން ޒުވާނުންނަށް ކުރިއަށްދެވޭނެއެވެ.