ރ. އަލިފުށީ ބިންހިއްކުމާއި އެއަރޕޯޓް ތަރައްގީކުރުމުގެ މަޝްރޫއުގެ އެންވަޔަރަމަންޓަލް އިންފެކްޓް އެސެސްމަންޓް (އީއައިއޭ) ގެ މަސައްކަތަށް ގާތްގަނޑަކަށް ތިން މަސް ދުވަސް ނަގާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އާޒިމް ވިދާޅުވީ އަލިފުށީ އެއަރޕޯޓުގެ ހުރިހާ މަސައްކަތްތަކެއް އެމްޓީސީސީއާ ހަވާލު ކުރެވިފައި މިވަނީ ސަރުކާރާއި، ރައްޔިތުން ކުރާ އިތުބާރެއްގެ ބޮޑު ކަމުން ކަމަށެވެ. މިއީ ތާރީހުގައި ވެސް ފާހަގަކޮށްލެވޭ މަޝްރޫއެއް ކަމަށް އާޒިމް ވިދާޅުވިއެވެ.

މިމަޝްރޫއާ ގުޅިގެން އަލިފުށީގެ ކައުންސިލްއާ ވަރަށް ގާތުން މަޝްވަރާތައް ކުރެވޭކަން ފާހަގަކުރައްވައި އާޒިމް ވިދާޅުވީ އީއައިއޭގެ މަސައްކަތްތައް ކުރުމަށް ޚާއްސަ ޓީމެއް އެރަށަށް ފޮނުވަން ނިންމާފައިވާ ކަމަށެވެ. އީއައިއޭގެ މަސައްކަތްތަކަށް ގާތްގަނޑަކަށް ތިން މަސް ދުވަސް ހޭދަވާނެ ކަމަށް އާޒިމް ވިދާޅުވިއެވެ. އަދި ވިދާޅުވީ އެމަސައްކަތަށް ފަހު މަޝްރޫއުގެ އަމަލީ މަސައްކަތްތައް ފެށިގެންދާނެ ކަމަށެވެ.

މީގެ އިތުރުން އާޒިމް ވިދާޅުވީ މިމަޝްރޫއު ނިންމަން ކަނޑައަޅާފައިވާ ތާރީހުގައި ނިންމައި، ހަވާލުކުރާނެ ކަމަށެވެ.

ޑިޒައިން އެންޑް ބިލްޑް އުސޫލުން ހަވާލުކުރެވުނު މި މަޝްރޫއުގެ ދަށުން އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްގީކުރުމަށް ހިއްކޭ ބިމެކެވެ. މި މަޝްރޫއުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތް ވަނީ މިކުންފުންޏާ ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއް ވެސް ގާއިމު ކުރެވިގެންދާނެއެވެ.

މިއީ 451.61 މިލިއަން ރުފިޔާ ގެ މަޝްރޫއެކެވެ. މި މަޝްރޫއުގެ ނިންމުމަށް ހަމަޖެހިފައިވަނީ 750 ދުވަހުގެ ތެރޭގައެވެ.

މި މަޝްރޫއަކީ އަގުގެ ގޮތުންނާއި، މަޝްރޫއުގެ ދަށުން ކުރަންޖެހޭ މަސައްކަތުގެ ގޮތުން އެމްޓީސީސީގެ 40 އަހަރުގެ ދިގު ތާރީޚުގައި ސަރުކާރުން އެ ކުންފުންޏާ ހަވާލުކުރި އެންމެ ބޮޑު މަޝްރޫއެވެ.