ސަރުކާރަށް ދެ އަހަރު ވީއިރު ރައީސް މުއިއްޒަށް ކުރެވުނުހާ ކަމަކީ ރަށްތަކަށް އަރާ ސަޅި ކެނޑުމާ ފޮނިކެނޑުން
މާލޭ ސިޓީ މޭޔަރު އާދަމް އާޒިމް
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަށް ދެ އަހަރު ވީ އިރު ކުރެވުނު ހަމަ އެކަނި ކަމަކީ ރައްޔިތުންގެ ފައިސާއިން 110 ބިލިއަނަށް ވުރެ ގިނަ ރުފިޔާ ތަޅާ ބުރުވުން ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
އެކްސް ގައި ކުރެއްވި ޕޯސްޓެއްގައި އާޒިމް ވިދާޅުވީ ސަރުކާރަށް ދެ އަހަރު ވީއިރު ރައީސް ޑރ. މުހައްމަދު މުއިއްޒަށް ކުރެވުނުހާ ވެސް ކަމަކީ ރަށްތަކަށް އަރާ ސަޅި ކެނޑުމާ ފޮނިކެނޑުން ކަމަށެވެ.
އޭގެ އިތުރުން އެއްވެސް ކަމެއް ރައްޔިތުންނަށް ކޮށްނުދީ ކުރި ހަމަ އެކަނި ކަމަކީ 110 ބިލިއަނަށް ވުރެ ގިނަ ރުފިޔާ ރައްޔިތުންގެ ފައިސާ އިން ތަޅާ ބުރުވުން ކަމަށް ވެސް އާޒިމް ވިދާޅުވި އެވެ.
މޭޔަރު މިހެން ވިދާޅުވީ ސަރުކާރު ހިންގާ ޕީއެންސީ އިން ހުކުރު ދުވަހުގެ ރޭ ބާއްވި ޖަލްސާއަށް ފަހުގަ އެވެ. މި ޖަލްސާ އަށް މީހުން ގިނަ ކުރަން ރާއްޖޭގެ އެކި އެއަރޕޯޓްތަކުން އެތައް ޗާޓަރު ފްލައިޓެއް އޮޕަރޭޓް ކޮށްފައި ވާއިރު، ގައުމީ އެއާލައިން، މޯލްޑިވިއަން ގައި މިވަގުތު އޮތް އެންމެ ބޮޑު މަތިންދާ ބޯޓު ބުރާސްފަތި ދުވަހު އައްޑޫ ސިޓީ ގަމަށް ކުރި ފުރަތަމަ ދަތުރު ވެސް ވެގެން ދިޔައީ ޖަލްސާ އަށް މީހުން ބަލައި ކުރި ދަތުރަށެވެ.
މިއީ 264 މީހުންގެ ޖާގަ އޮތް ބޯޓެކެވެ. އޭގެ އިތުރުން ފެނަށް ޖެހިފައި އޮތް ފުވައްމުލަކު ސިޓީއަށް ބޯފެން ގެންދިޔުމަށް މޯލްޑިވިއަނުން އެ ރަށަށް ޗާޓަރުކޮށްގެން އަޅަމުންދާ ފްލައިޓުތަކުގައި ވެސް މާލެ އަށް މީހުން ގެނަސްފައިވާ ކަމަށާ އެއަރޕޯޓަށް އަންނަ މީހުން އުފުލުމަށް އެމްޓީސީސީގެ ބޮޑެތި ބަސްތައް ވެސް ބޭނުން ކޮށްފައިވާ ކަމަށް ބައެއް ފަރާތްތަކުން ބުނެފައި ވެއެވެ.
މައުލޫމާތު ލިބިފައިވާ ގޮތުގައި ޖަލްސާ އަށް އައި މީހުންނަށް ހިލޭ ދެކޮޅު ޓިކެޓް ދިނުމުގެ އިތުރުން، މާލޭގައި ތިބުމުގެ ޚަރަދާއި ޕޮކެޓް މަނީވެސް ވަނީ ހަމަޖައްސާ ދީފައެވެ.
