އެކި ފަރާތްތަކުން ވަކިވަކިން ލެންޑްޔޫސް ޕްލޭން ހެދުމުން އޮޅުން އަރާ ކަމަށާއި މާލޭ ސިޓީ ކައުންސިލާއި ނުގުޅި މާލޭގެ ލޭންޑްޔޫސް ޕްލޭނެއް ނުހެދޭނެ ކަމަށް މާލޭގެ މޭޔަރ އާދަމް އާޒިމް ވިދާޅުވެއްޖެއެވެ.

އާޒިމް މިހެން ވިދާޅުވީ، "ރީތިންކް މާލޭ"ގެ ނަމުގައި ކުރިއަށް ގެންދާ މާލޭގެ ލޭންޑް ޔޫސް ޕްލޭން (އެލްޔޫޕީ) އާއި މެދު މަޝްވަރާކުރުމުގެ ބައްދަލުވުން، ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.

އެޗްޑީސީ އިންނާއި ރާއްޖެ އިން ބޭރުން ބަޔަކު ގެނެސްގެން މާލޭގެ ސަރަހައްދުގައި ޕްލޭންތަކެއް ހަދަމުންދާ ކަމަށް އާޒިމް ވިދާޅުވިއެވެ. އެހެން ނަމަވެސް އެއްކަމެއްގައި ތަފާތު އެކި ޕްލޭންތައް ހެދުމުގެ ބަދަލުގައި އެންމެން އެކައްޗެއް ކިޔައިގެން ގައުމީ ތަރައްޤީގެ ޕްލޭނާއި އެއް ހަމައަކަށް ކަންކަން ބައްޓަން ކުރަން ޖެހޭ ކަމަށް އާޒިމް ވަނީ ވިދާޅުވެފައެވެ. އެހެން އެކަން ނުވާ ނަމަ އޮޅުންބޮޑުވެ އަމަލު ކުރަންވީ ކޮން ޕްލޭނަކަށް ކަން ނުނިންމޭ ހިސާބަށް ކަންކަން ބޮއްސުން ލާފާނެ ކަމަށް އާޒިމް ވިދާޅުވިއެވެ. ވަކިވަކިން ލޭންޑްޔޫސް ޕްލޭން ހެދުމުގެ ނަތީޖާ އަކީ އެކި ޕްލޭންތަކުގައި މުޅިން ތަފާތު ގޮތްގޮތަށް ލޭންޑް ޔޫސް ގެ މަސައްކަތް ޕްލޭންކޮށްފައި ވުމުން، މަސައްކަތް ކުރާނެ ގޮތަކާއި މެދު ސުވާލު އުފެދުން ކަމަށް އޭނާ ވިދާޅުވިއެވެ.

މާލޭ ސިޓީ މިއަށް ވުރެ ދިރިއުޅެން ފަސޭހަ ތަނަކަށް ހެދުމަށް ގެންނަން ޖެހޭ ބަދަލުތައް އެބަހުރި ކަމަށާއި އެކަމަށްޓަކާ އެކަށީގެންވާ ލޭންޑްޔޫސް ޕްލޭނެއް މުހިންމު ކަމަށް އާޒިމް ވިދާޅުވިއެވެ. އިދާރާތަކާއި މުއައްސަސާތަކަށް ބޭނުންވާ ބިން ނެތުމުގެ ސަބަބުން އެ އިދާރާތަކާއި މުއައްސަސާތަކުގެ މަސައްކަތަށް ބުރު އަރާ ކަމަށް އާޒިމް ވިދާޅުވިއެވެ. އެފަދަ ބައެއް ތަންތަނުގެ ތެރޭގައި ފުލުހުން، އެމްޓީސީސީ، ސްޓޭލްކޯ ފަދަ ތަންތަން ހިމެނޭ ކަމަށް އާޒިމް ވިދާޅުވިއެވެ. އެ ތަންތަނަށް ބޭނުންވާ ބިން ނުލިބިއްޖެ ނަމަ ރައްޔިތުންނަށް ފޯރުކޮށްދެމުންދާ އަސާސީ އަދި ޒަރޫރީ ޚިދުމަތްތަކަށް ބުރު އެރުމުގެ ފުރުސަތު އެބަ އޮތް ކަމަށް އާޒިމް ވަނީ ފާހަގަކުރައްވާފައެވެ.

"މިސާލަކަށް އެމްޓީސީސީގައި [ފަސިންޖަރުން] ބަހުގެ ބޭރުގައި ބައިތިއްބައިގެން އެ ތިބެނީ. ސްޓެލްކޯ އަށް ބިން ބޭނުންވޭ. ފުލުހުން މިހެން ގޮސް އެތައް ތަނެއް އެބަ ހުރި. އެކަން ނުކުރެވޭ ނަމަ ޚިދުމަތްތައް ހުއްޓޭ ހިސާބަށް ކަންކަން ހިނގައިދާނެ." އާޒިމް ވިދާޅުވިއެވެ.

ގުޅީފަޅާއި ގިރާވަރުފަޅަށް އާއްމުން ދަތުރުކުރަން ފަށަން ވާއިރަށް ކަނޑުމަގުގެ ރަނގަޅު ޕްލޭނެއް އެކުލަވާލުމަކީ ވެސް މުހިންމު ކަމެއް ކަމަށް އާޒިމް ވިދާޅުވިއެވެ. އެކަން އެހެން ނުކޮށްފި ނަމަ މާލެ ސަރަހައްދުގެ ކަނޑުދަތުރުފަތުރަށް ވަރަށް ބޮޑަށް އަސަރުކުރުން އެކަށީގެންވާ ކަމަށް އާޒިމް ވަނީ ވިދާޅުވެފައެވެ. މާލޭ ސިޓީގައި އިންތިހާ އަށް ބިމުގެ ދަތިކަން އެބަ ހުރި ކަމަށާއި، ރަނގަޅު ލޭންޑްޔޫސް ޕްލޭނެއް ނުހެދިއްޖެ ނަމަ އެކަމުގެ ނޭދެވޭ ނަތީޖާ ނުކުމެދާނެ ކަމަށް އާޒިމް ވަނީ ވިދާޅުވެފައެވެ.

30 ސްޓޭކް ހޯލްޑަރުންނާއި މަދަނީ ޖަމިއްޔާތަކާއި އަމިއްލަ ފަރުދުންނަށް އެ ބައްދަލުވުމަށް ވަނީ ދައުވަތު ދީފައެވެ.