ދަގަނޑޭ އަނެއްކާވެސް ނިއުރޭޑިއަންޓާ ގުޅިއްޖެ

ރާއްޖޭގެ ގައުމީ ޓީމުގެ ކެޕްޓަން އަލީ އަޝްފާގް (ދަގަނޑޭ) ނިއުރޭޑިއަންޓް ސްޕޯޓްސް ކްލަބާ ގުޅިއްޖެއެވެ.

ދަގަނޑޭ ނިއުރޭޑިއަންޓާ ގުޅުނު އިރު އޭނާ މެލޭޝިއާގެ ކްލަބަކާ ގުޅެން އުޅޭ ކަމުގެ އަޑުތަކެއްވެސް ވަނީ މިފަހުން ފެންމަތިވެފައެވެ. އެހެން ނަމެވެސް އޭނާ ވަނީ ނިއުއާއެކު މި ސީޒަންގެ ނިޔަލަށް އެއްބަސްވުމަކަށް އައިސްފައެވެ.

ދަގަނޑޭގެ އިތުރުން ރާއްޖޭގެ އެންމެ ހުނަރުވެރި މިޑްފީލްޑަރު އިބްރާހިމް ފަޒީލް (އޮއްޕޮ) ވެސް ވަނީ އެޓީމާ ގުޅި ފަރިތަކުރުންތަކުގައި ބައިވެރިވާން ފަށާފައެވެ.

ދިގު މުއްދަތަކަށް ކުޅުމާ ދުރުގައި ހުރުމަށްފަހު ދަގަނޑޭ ނިއުއާ ގުޅުނު އިރު އޭނާއަށް އެޓީމާއެކު މެޗެއް ކުޅެވޭނީ އަންނަ ޖުލައި މަހުގެ 14 ގައި ފެށޭ މިޑް ޓްރާންސްފާ ބްރޭކަށްފަހު އެވެ.

މިއަހަރުގެ ސީޒަން ފެށުމުގެ ކުރިންވެސް އަޝްފާގުގެ ސޮއި ހޯދަން ނިއު އިން މަސައްކަތްކުރި އިރު، އެފަހަރު އޭނާއާއެކު އެއްބަސްވުމަކަށް އާދެވިފައި ނުވަނީ އަނިޔާގެ މައްސަލައެއް ހުރުމުން ކަމަށް ބުނެއެވެ.

ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ ދަގަނޑޭ ވަނީ މީގެ ކުރިން ވެސް ދެފަހަރެއް މަތިން ނިއުއަށް ކުޅެފައެވެ.

ދަގަނޑޭ ފުރަތަމަ ނިއުއާ ގުޅުނީ 2006 ވަނަ އަހަރުއެވެ. އެއަހަރު އޭނާގެ މޮޅު ކުޅުމާއެކު ނިއުއިން ވަނީ އެފްއޭކަޕާއި ދިވެހި ޕުރިމިއާ ލީގު ކާމިޔާބުކޮށްފައެވެ. އަދި ޖެހިގެން އައި އަހަރު ޕްރެސިޑެންޓްސް ކަޕާއި އެފްއޭކަޕް ނިއުއަށް ކާމިޔާބުކޮށްދިނުމުގައި އޭނާގެ ދައުރު ވަރަށް ބޮޑެވެ.

ދަގަނޑޭއަކީ ނިއުގެ އެންމެ ކާމިޔާބު ސީޒަންތަކުގައި އެޓީމުގައި ހިމެނުނު މުހިންމު ކުޅުންތެރިއެކެވެ. އެގޮތުން އޭނާގެ ކެޕްޓަން ކަމުގެ ދަށުން އެ ކްލަބު ވަނީ 2012 ވަނަ އަހަރު އެއްވެސް މެޗަކުން ބަލިނުވެ ލީގު ކާމިޔާބުކޮށްފައެވެ.

ޖެހިގެން އައި 2013 ވަނަ އަހަރުގެ ސީޒަންގެ ހުރިހާ ތައްޓެއް 100 ޕަސެންޓް މޮޅުވުމުގެ ރެކޯޑަކާއެކު ނިއުއިން ކާމިޔާބުކުރުމުގައި ދަގަނޑޭ ވަނީ މުހިންމު ދައުރެއް އަދާކޮށްފައެވެ. އެ އަހަރުގެ އޭއެފްސީ ކަޕްގައި ވެސް ދަގަނޑޭ ކާމިޔާބުކޮށްދިން ގިނަ ގޯލްތަކާއެކު ނިއު ވަނީ ކުއާޓާ ފައިނަލަށް ދަތުރުކޮށްފައެވެ.

2014 ވަނަ އަހަރު ދަގަނޑޭ ވަނީ މެލޭޝިއާގެ ޕްރެމިއަ ލީގުގައި ކުޅެ އެ ސީޒަންގެ އެންމެ މޮޅު ބިދޭސީ ކުޅުންތެރިޔާގެ މަގާމުވެސް ހޯދާފައެވެ.

މެލޭޝިޔާގައި ކާމިޔާބު ދެސީޒަނެއް ހޭދަކުރުމަށްފަހު ދަގަނޑޭ ރާއްޖެ އައީ މިދިޔަ އަހަރުގެ މެދުތެރެއިންނެވެ. މިދިޔަ ސީޒަންގެ ފަހުބައިގައި އޭނާ ކުޅުނީ މާޒިޔާ އަށެވެ.