ކުރީގެ ރައީސް ޔާމީން އަބްދުލް ގައްޔޫމްގެ މައްޗަށް އިއްވާފައިވާ ހުކުމާ ގުޅިގެން ސުޕްރީމް ކޯޓުގައި އިސްތިއުނާފް ކޮށްފައިވާ މައްސަލައިގައި ދައުލަތާއި ދިފާއުން އައު ހެކިތަކެއް ހުށަހަޅައިފިއެވެ.

އަލަށް ހުށަހެޅި ހެކިތަކާ ގުޅޭ ގޮތުން އިސް ގާޒީ ވިދާޅުވީ، ހެކިތައް ކޯޓަށް ލިބިފައިވާ ކަމަށާއި، އާދީއްތަ ދުވަހުގެ އަޑުއެހުމުގައި ހެކިތައް ބަލައިގަތުމަށް ނިންމާފައި ނުވާ ކަމަށެވެ. އެހެންނަމަވެސް އެއީ މި މަރުހަލާގައި ބަލައިގަންނަން ފެންނަ ހެކިތަކެއްތޯ ބަލައި، އެއަށް ގޮތެއް ނިންމަވާނެ ކަމަށެވެ.

މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.

ފުރަތަމަ އަޑު އެހުން ސުޕްރީމް ކޯޓުގައި އާދީއްތަ ދުވަހު ކުރިއަށް ގެންދިޔައިރު، ދިފާއުންވަނީ 22 އިސްތިއުނާފީ ނުކުތާއެއް ހުށަހަޅާފައެވެ. ރައީސް ޔާމީނުގެ ފަރާތުން 2 ހުށަހެޅުމެއް ވަނީ ހުށަހަޅުއްވާފައެވެ. މި 2 ހުށަހެޅުމަކީ ކަފާލާތާއި، ޙުކުމް ތަންފީޒު ކުރުން ފަސްކޮށްދިނުމާ ގުޅޭ 2 ހުށަހެޅުމެކެވެ. މި ހުށަހެޅުންތައް އިއްވަވަމުން ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ ޖަމީލް ވިދާޅުވީ، ކަފާލާތަށް އެދުމުން ހޮނިހިރު ދުވަހުގެ ފަހުގެ ވަގުތެއްގައި ދައުލަތުން އެކަމަށް ޖަވާބެއް ދީފައިވާ ކަމަށާއި، ނަމަވެސް އެ ޖަވާބާ ގުޅިގެން ބަލަންޖެހޭ ކަންކަން ބެލުމަށް 2 ދުވަސް ބޭނުންވާ ކަމަށެވެ. އެއާއެކު ޝަރީއަތުން ވަނީ އެ ހުށަހެޅުންތަކާއެކު ކުރިއަށް ދިއުމަށް 2 ދުވަހުގެ މުއްދަތެއް ދީފައެވެ.

ހުލާސާ ގޮތެއްގައި 22 ނުކުތާ ހުށަހެޅުމަށްފަހު ތަފްސީލީ ގޮތެއްގައި 7 ނުކުތާވަނީ ހުށަހަޅާފައެވެ.

އިސްތިއުނާފީ ނުކުތާތަކާ ގުޅިގެން ވާހަކަ ދެއްކުމުގެ ކުރިން ޑރ. ޖަމީލް ވަނީ ޚުލާސާ ގޮތެއްގައި ބައެއް ނުކުތާތައް ފާހަގަކުރައްވާފައެވެ. ޑރ. ޖަމީލް ވިދާޅުވީ، މި މައްސަލައަކީ ތަހުގީގު މަރުޙަލާގައި ވެސް ގޯސްތަކެއް ހަދާފައިވާ މައްސަލައެއް ކަމަށެވެ. އެގޮތުން މި މައްސަލައިގެ ތަހުގީގު މަރުޙަލާގައި ކުރިއަށްދިޔަ ސުވާލުތަކަކީ މަނީ ލޯންޑަރިންގ އާ ގުޅޭ ސުވާލުތަކެއް ނޫން ކަމަށާއި، ތަހުގީގު މަރުޙަލާއިން ފެށިގެން ދައުވާ ކުރުމުގެ މަރުޙަލާއަށްވެސް ދައުލަތުން ޔާމީނުގެ މައްޗަށް ކުރެވޭ ތުހުމަތަކީ ކޮބައިކަން ސާފު ކޮށްދީފައިނުވާކަމަށް ވިދާޅުވިއެވެ.