ދިވެހި ރާއްޖޭގެ ސުޕްރީމް ކޯޓުގެ ފަނޑިޔާރު ކަމުން އަލްއުސްތާޛް މަހާޒް އަލީ ޒާހިރު އާއި ޑޮކްޓަރު އަލްމިރަލްދާ ޒާހިރު ވަކި ކުރުމާ ދެކޮޅަށް، ޖުޑީޝަލް ސާވިސް ކޮމިޝަން (ޖޭއެސްސީ)ގައި ހިމެނި ވަޑައިގަންނަވާ ހައި ކޯޓާއި، ދަށު ކޯޓުގެ ފަނޑިޔާރުން ވޯޓު ދެއްވައިފި އެވެ.

ފަނޑިޔާރު ކަމުގެ މަޤާމުން މަހާޒް އާއި އަޒްމިރަލްދާ ވަކި ކުރުމަށް ރައްޔިތުންގެ މަޖިލީހަށް ފޮނުވުމާ މެދު ގޮތެއް ނިންމުމަށް، ޖޭއެސްސީގެ ބައްދަލުވުން ބޭއްވީ އާދީއްތަ ދުވަހު އެވެ.

އާދީއްތަ ދުވަހުގެ މެންދުރު ފަހު ބޭއްވި އެ ބައްދަލުވުމުގައި ފާސްކޮށްފައި ވަނީ ފަނޑިޔާރު ކަމުން މަހާޒް އާއި އަޒްމިރަލްދާ ވަކި ކުރުމަށް ރައްޔިތުންގެ މަޖިލީހަށް ފޮނުވުމަށެވެ.

ވޯޓުގައި ބައިވެރި މެމްބަރުންގެ ތެރެއިން މަހާޒް އާއި އަޒްމިރަލްދާ ވަކި ކުރުމަށް ފެންނަ ކަމަށް ވޯޓު ދެއްވީ ފަސް މެމްބަރުންނެވެ.

އެއީ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲގެ އިތުރުން، ދާދި ފަހުން ސުޕްރީމް ކޯޓަށް އައްޔަން ކުރެއްވި ފަނޑިޔާރު އަލްއުސްތާޛް ޙުސެއިން ޝަހީދު، ޖޭއެސްސީ އަށް ރައީސުލްޖުމްހޫރިއްޔާ އައްޔަން ކުރައްވާފައިވާ މެމްބަރު ޔަޒްމީދު މުޙައްމަދު، ޤާނޫނީ ވަކީލުންގެ ތެރެއިން ޖޭއެސްސީގައި އިންނަވާ މެމްބަރު ޢަލީ ޢަބްދުއް ލަޠީފް އަދި ސިވިލް ސާވިސް ކޮމިޝަންގެ ރައީސް މުޙައްމަދު ނާސިޙު އެވެ.

މަހާޒް އާއި އަލްމިރަލްދާ ވަކި ކުރުމަށް ނުފެންނަ ކަމަށް ވޯޓު ދެއްވީ ހައި ކޯޓު އަދި ދަށު ކޯޓުގެ ފަނޑިޔާރުންނެވެ. އެއީ ހައި ކޯޓުގެ ފަނޑިޔާރު މުޙައްމަދު ނިޔާޒު އާއި ދަށު ކޯޓުތައް ތަމްސީލު ކުރައްވާ ސިވިލް ކޯޓުގެ ގާޒީ ފަރުޙާދު ޝަރީފް އެވެ.

ކޮމިޝަންގައި ހިމެނި ވަޑައިގަންނަވާ އެހެން މެމްބަރުންގެ ތެރެއިން، ބަންޑާރަ ނައިބު އަލްއުސްތާޛް އަޙުމަދު އުޝާމް ކޮމެޓީގެ ބައްދަލުވުމަށް ވަޑައިފެންފައި ނުވާ ކަމަށް މައުލޫމާތު ލިބެ އެވެ.

މީގެ އިތުރުން އާންމުންގެ ތެރެއިން ޖޭއެސްސީ އަށް ކަނޑައަޅާފައި އިންނަވާ މެމްބަރު، ޑޮކްޓަރު އާމިނަތު އުލްމު ކުލްސޫމް ވަކި ގޮތަކަށް ވޯޓު ދެއްވާފައި ނުވެ އެވެ.

ދެން ކޮމިޝަންގައި ހިމެނި ވަޑައިގަންނަވަނީ ކޮމިޝަންގެ ރައީސް، އަދި ރައްޔިތުންގެ މަޖިލީހުގެ މާފުށީ ދާއިރާގެ މެމްބަރު ޙުސެއިން ރިޟާ އާދަމް އެވެ. އޭނާ އިންނެވީ ރިޔާސަތުގަ އެވެ.

ފަނޑިޔާރު މަހާޒް އާއި އަޒްމިރަލްދާއާ ދެކޮޅަށް މައްސަލަތަކެއް ބައްލަވާ ކަމަށް ބުނެ، އެ ދެ ފަނޑިޔާރުން ސަސްޕެންޑު ކޮށްފައި ވަނީ ފެބްރުވަރީ މަހުގެ 26 ވަނަ ދުވަހު އެވެ. އެއީ އޭރު ސުޕްރީމް ކޯޓަށް ހުށަހަޅާފައި އޮތް ދުސްތޫރީ މައްސަލައިގެ ޝަރީއަތެއް ފަށަން ކުޑަތަންވެފައި ވަނިކޮށެވެ.

އެ ދެ ފަނޑިޔާރުންނާ އެކު، އޭރު ސުޕްރީމް ކޯޓުގެ ފަނޑިޔާރު ކަމުން އަލްއުސްތާޛް ޙުސްނު ސުއޫދު ވެސް ސަސްޕެންޑު ކުރެއްވި އެވެ. ނަމަވެސް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ޝަރުއީ ދާއިރާ އަށް ނުފޫޒު ފޯރުވާ ކަމަށް ވިދާޅުވެ، އެކަމާ އިހުތިޖާޖު ކުރެއްވުމުގެ ގޮތުން ސުއޫދު ވަނީ ފަނޑިޔާރު ކަމުން އިސްތިއުދާ ދެއްވާފައި އެވެ.