ޔާމީން އެދިވަޑައިގަތީ ކަފާލާތުގެ ދަށުން ދޫކޮށްލެއްވުމަށް!
ފަސް އަހަރު ދުވަހުގެ ޖަލު ހުކުމެއް ގެންދަވަނީ ތަންފީޒު ކުރައްވަމުން
ރައީސް ޔާމީނުގެ ޖަލު ޙުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި ކުރިއަށްދަނީ
މަނީ ލޯންޑަރިން ގެ ކުށް ސާބިތުވެ، ޖަލު ޙުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނުގެ ފަރާތުން އެ މައްސަލައިގެ ޙުކުމް ތަންފީޒު ކުރުން ފަސްކޮށްދިނުމާއި، ކަފާލާތުގެ ދަށުން ދޫކޮށްލެއްވުމަށް އެދި ސުޕްރީމް ކޯޓަށް ހުށަހަޅުއްވައިފިއެވެ.
އާދިއްތަ ދުވަހު ސުޕްރީމް ކޯޓުގައި ކުރިއަށްދިޔަ މި އަޑުއެހުމަކީ ރައީސް ޔާމީނުގެ މައްޗަށް ދަށު ކޯޓުން އިއްވާފައިވާ ޖަލު ޙުކުމަށް ހައިކޯޓުން ތާއީދު ކުރުމުން، ސުޕްރީމް ކޯޓުގައި އެމަނިކުފާނުގެ ފަރާތުން އިސްތިއުނާފު ކޮށްފައިވާ މައްސަލައިގެ ފުރަތަމަ އަޑުއެހުމެވެ. އެގޮތުން ރައީސް ޔާމީނުގެ ފަރާތުން 2 ހުށަހެޅުމެއް ވަނީ ހުށައަޅުއްވާފައެވެ. މި 2 ހުށައެޅުމަކީ ކަފާލާތާއި، ޙުކުމް ތަންފީޒު ކުރުން ފަސްކޮށްދިނުމާ ގުޅޭ 2 ހުށައެޅުމެކެވެ. މި ހުށައެޅުންތަކަށް ފަހު ވަނީ މި މައްސަލައިގެއިސްތިއުނާފީ ނުކުތާތައްޚުލާސާ ގޮތެއްގައި ހުށަހަޅުއްވާފައެވެ. އެގޮތުން 22 އިސްތިއުނާފީ ނުކުތާއެއް ރައީސް ޔާމީނުގެ ޤާނޫނީ ވަކީލުންގެ ޓީމުން ފާހަގަކޮށްފައިވެއެވެ.
މި ހުށަހެޅުންތައް އިއްވަވަމުން ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ. ޖަމީލް ވިދާޅުވީ، ކަފާލާތަށް އެދުމުން ހޮނިހިރު ދުވަހުގެ ފަހުގެ ވަގުތެއްގައި ދައުލަތުން އެކަމަށް ޖަވާބެއް ދީފައިވާ ކަމަށާއި، ނަމަވެސް އެ ޖަވާބާއި ގުޅިގެން ބަލަންޖެހޭ ކަންކަން ބެލުމަށް 2 ދުވަސް ބޭނުންވާ ކަމަށެވެ. އެއާއެކު ޝަރީއަތުން ވަނީ އެ ހުށަހެޅުންތަކާއެކު ކުރިއަށް ދިއުމުގެ ކުރިން 2 ދުވަހުގެ މުއްދަތެއް ދީފައެވެ.
ކަފާލާތުގެ ދަށުން ދޫކޮށްލެއްވުމާއި، ޙުކުމް ތަންފީޒު ކުރުން ފަސްކޮށްދިނުމުގެ އަމުރަކަށް ރައީސް ޔާމީނުގެ ފަރާތުން އެދިފައިވާއިރު، މިހާރުވެސް ކްރިމިނަލް ކޯޓުގައި، ރ. ފުއްގިރި މައްސަލާގައި މަނީ ލޯންޑަރކުރުމާއި ރިޝްވަތު ގަބޫލުކުރުމުގެ ކުށުގެ ދައުވާގެ ޝަރީޢަތުގެ އަޑުއެހުންތަކެއް ކުރިއަށްދެއެވެ. އޭގެއިތުރުން ވެސް، އެމްއެމްޕީއާރުސީގެ މައްސަލަތަކެއް ފުލުހުންނާއި އެސެޓް ރިކަވަރީ ކޮމިޝަން އަދި އެންޓި ކޮރަޕްޝަން ކޮމިޝަން ގުޅިގެން ތަހުގީގު ކުރަމުންދެއެވެ.
މާފުށީ ޖަލުގައި ކޮވިޑް ފެތުރޭތީއާއި ގައިދީންގެ ބަލި ހާލަތު ހުރިގޮތުން, ކޮވިޑުގެ ސަބަބުން ނުރައްކާތެރި ގޮތެއް މެދުވެރިވެދާނެ މީހުންނަށް ބަލައިގެން ކަރެކްޝަން ސަރވިސްއިން ވަނީ ވަގުތީގޮތުން ރައީސް ޔާމީން ގޭ ބަންދަށް ބަދަލުކޮށްފައެވެ. ނަމަވެސް ގެއަށް ބަދަލު ކުރުމުގައި ކަރެކްޝަންސްއާމެދު ވެފައިވާ އިޤުރާރަށް ރައީސް ޔާމީނު ޚިލާފުވެވަޑައިގެންފައިވާކަމަށް ބުނެ ކަރެކްޝަންސް އިން ވަނީ އެ މައްސަލައިގައި އަޅުއްވަންޖެހޭ ފިޔަވަޅުތައް އަޅުއްވާނެކަމަށް ބުނެފައެވެ.
ގެކޮޅުގައި ހުންނަވައި ރައީސް ޔާމީނު ސިޔާސީ ޙަރަކާތްތައް ހިންގަވާކަމުގެ އަޑުތައް ގަދަވެފައިވަނިކޮށް ހުކުރު ދުވަހުގެ މުޒާހަރާގައި ރައީސް ޔާމީން ބައިވެރިވެވަޑައިގެންނެވީ ގޭގައި ހުންނަވައިގެންނެވެ. މުޒާހަރާގެ ބައިވެރިން ރައީސް ޔާމީނުގެ ގޭގެ ކުރިމައްޗަށް އެއްވުމުން އެމީހުންނަށް ފެންނަ ގޮތަށް ކުޑަދޮރެއްގެ ކައިރީގައި ހުންނަވައި އިޝާރާތުން ހިތްވަރުދެއްވައި ސިޔާސީ މެސެޖުތައްވެސް ދެއްވިއެވެ. ޕީޕީއެމްގެ ދިދައާއި ގައުމީ ދިދަ ހޫރުއްވިއެވެ.
