އެމްއެމްޕީއާރުސީގެ ހިޔާނާތުގައި ހިމެނޭ ރަށެއް ކުށްޔަށް ދޫކޮށްގެން ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރެއްވި ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އިއްވާފައިވާ ޖަލު ހުކުމް ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގައި 22 އިސްތިއުނާފީ ނުކުތާއެއް ހުށަހަޅައިފިއެވެ.

މި މައްސަލައިގެ އިސްތިއުނާފީ އަޑުއެހުން ސުޕްރީމް ކޯޓުގައި ކުރިއަށް ގެންގޮސްފައިވާއިރު، މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.

ޔާމީނުގެ ފަރާތުން 2 ހުށައެޅުމެއް:

ރައީސް ޔާމީނުގެ ފަރާތުން 2 ހުށަހެޅުމެއް ވަނީ ހުށައަޅުއްވާފައެވެ. މި 2 ހުށައެޅުމަކީ ކަފާލާތާއި، ޙުކުމް ތަންފީޒު ކުރުން ފަސްކޮށްދިނުމާއި ގުޅޭ 2 ހުށައެޅުމެކެވެ. މި ހުށައެޅުންތައް އިއްވަވަމުން ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ ޖަމީލް ވިދާޅުވީ، ކަފާލާތަށް އެދުމުން ހޮނިހިރު ދުވަހުގެ ފަހުގެ ވަގުތެއްގައި ދައުލަތުން އެކަމަށް ޖަވާބެއް ދީފައިވާ ކަމަށާއި، ނަމަވެސް އެ ޖަވާބާއި ގުޅިގެން ބަލަންޖެހޭ ކަންކަން ބެލުމަށް 2 ދުވަސް ބޭނުންވާ ކަމަށެވެ. އެއާއެކު ޝަރީއަތުން ވަނީ އެ ހުށައެޅުންތަކާއެކު ކުރިއަށް ދިއުމަށް 2 ދުވަހުގެ މުއްދަތެއް ދީފައެވެ.

އިސްތިއުނާފުގެ ޚުލާސާއެއް ހުށައެޅުން:

މި މައްސަލައިގައި ރައީސް ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށައަޅާފައިވާއިރު، ތަފްސީލީ ގޮތެއްގައި އިސްތިއުނާފީ ނުކުތާތަކާއި ގުޅިގެން ވާހަކަ ދެއްކުމުގެ ކުރިން ޑރ ޖަމީލް ވަނީ ޚުލާސާ ގޮތެއްގައި ބައެއް ނުކުތާތައް ފާހަގަ ކުރައްވާފައެވެ. ޑރ ޖަމީލް ވިދާޅުވީ، މި މައްސަލައަކީ ތަހުގީގު މަރުޙަލާގައިވެސް ގޯސްތަކެއް ހަދާފައިވާ މައްސަލައެއް ކަމަށެވެ. އެގޮތުން މި މައްސަލައިގެ ތަހުގީގު މަރުޙަލާގައި ކުރިއަށްދިޔަ ސުވާލުތަކަކީ މަނީ ލޯންޑަރިންގ އާ ގުޅޭ ސުވާލުތަކެއް ނޫން ކަމަށާއި، ތަހުގީގު މަރުޙަލާއިން ފެށިގެން ދައުވާ ކުރުމުގެ މަރުޙަލާއަށްވެސް ދައުލަތުން ޔާމީނުގެ މައްޗަށް ކުރެވޭ ތުހުމަތަކީ ކޮބައިކަން ސާފު ކޮށްދީފައިނުވާކަމަށް ވިދާޅުވިއެވެ.

ޑރ ޖަމީލް ވިދާޅުވީ، ދައުލަތުން ކުރާ ތުހުމަތަކީ ކޮބައިކަން ދަށު ކޯޓުން ސުވާލު ކުރުމުން އޭރު ރައީސް ޔާމީނުގެ މައްޗަށް ތުހުމަތު ކުރަނީ ކޮރަޕްޝަންގެ ކުށްކަމަށް ދައުލަތުން ފާހަގަކުރި ކަމަށެވެ. ޚުލާސާ ގޮތެއްގައި ޑރ ޖަމީލް ވިދާޅުވަމުން ގެންދެވި ވާހަކަތަކަކީ އިސްތިއުނާފީ ނުކުތާތަކުގައިވެސް ހިމެނޭކަމަކަށްވާތީ ސުޕްރީމް ކޯޓުން ވަނީ ވަގުތު ކުޑަ ކުރުމުގެ ގޮތުން އެކަމަށް ސަމާލުކަން ދެއްވުމަށް ދަންނަވާފައެވެ. ނަމަވެސް ބައެއް ނުކުތާތަކަށް ޚުލާސާ ގޮތެއްގައި ވާހަކަ ދައްކަވަން ބޭނުންވާކަން ޑރ ޖަމީލް ވިދާޅުވުމާއެކު، ތަކުރާރު ނުކުރެއްވުމަށް ދަންނަވައި ފަނޑިޔާރު އަނެއްކާވެސް ޑރ ޖަމީލްއަށް ފުރުސަތު ދެއްވިއެވެ.

ޑރ ޖަމީލް ވިދާޅުވީ، މި މައްސަލައިގައި ދަށު ކޯޓުން އިޖުރާއީ ގޯސްތަކެއްވެސް ހަދާފައިވާ ކަމަށެވެ. އަދި މުޅި ދަށު ކޯޓުން މައްސަލަ ނިމިގެން ދިޔައިރުވެސް ކުށުގެ ތަފްސީލުތައް ސާފުކޮށްދީފައި ނުވާކަމަށް ޑރ ޖަމީލް ވިދާޅުވިއެވެ. އެގޮތުން މައްސަލައިގައި ހިމެނެނީ ގއ ވޮޑަމުލާގެ ފައިސާކަމަށް ވަކި ހިސާބަކުން ދައުލަތުން ވިދާޅުވި ނަމަވެސް، ރައީސް ޔާމީނަށް ލިބިވަޑައިގަތީ ވޮޑަމުލާގެ ފައިސާކަން އަންގައި ނުދެވުނުކަމަށް ޑރ ޖަމީލް ވިދާޅުވިއެވެ. އަދި މިހާރު ހުށައަޅާފައިވާ އިސްތިއުނާފީ މައްސަލައިގެ ޖަވާބުގައިވެސް ދައުލަތަށް އެކަން ސާފުކޮށްދެވިފައި ނުވާކަމަށް ޑރ ޖަމީލް ވިދާޅުވިއެވެ.

ޑރ ޖަމީލް ވިދާޅުވީ، މި މައްސަލައިގައި ދަށު ކޯޓުންނާއި ހައިކޯޓުންވެސް ގޯސްތައް ހަދާފައިވާ ކަމަށެވެ. އެގޮތުން ވޮޑަމުލާގެ ފައިސާ ރައީސް ޔާމީނުގެ އެކައުންޓަށް ޖަމާވިކަން ދެ މަރުޙަލާގައިވެސް ދައުލަތަށް ސާބިތު ކޮށްދެވިފައިނުވާކަމަށް ޑރ ޖަމީލް ވިދާޅުވިއެވެ. އަދި މި މައްސަލައިގައި އަދީބާއި ޒިޔަތުގެ އިތުރުން މުއައްވިޒު ރަޝީދުގެ ހެކިބަސްތަކެއްވެސް ނަގާފައިވާއިރު، މިއަދާ ހަމައަށްވެސް އެ ހެކިބަސްތަކުގައި ހިމެނޭ ކަންކަން ސާފު ކޮށްދެވިފައިނުވާކަން ޑރ ޖަމީލް ފާހަގަ ކުރެއްވިއެވެ.

ޑރ ޖަމީލް ވިދާޅުވީ، މި މައްސަލައިގައި ހައިކޯޓުންވެސް ހެކިބަސްތަކާއި ގުޅިގެން ނިންމާފައިވަނީ "ކޮމަން ލޯ" ގެ އުސޫލުތަކާއި އެއްގޮތަކަށް ނޫން ކަމަށެވެ. އެގޮތުން އަދީބާއި ޒިޔަތާއިއެކު ދައުލަތުން އެއްބަސްވުން އެކުލަވާލާފައިވާއިރު، އެއާއި ގުޅިގެން ކަންކަން ހިނގާ ދިޔައީ އިންސާފުވެރިކަމާއެކު ނޫންކަން ޑރ ޖަމީލް ވިދާޅުވިއެވެ. ޑރ ޖަމީލް ވަނީ މި މައްސަލަައިގައި އެނގިވަޑައިނުގެން ހުންނަވަނިކޮށް ރައީސް ޔާމީން "ދަލެއްގައި ބައްދާލާފައިވާކަމަށް" ސިފަ ކުރައްވާފައެވެ. އަދި މަނީ ލޯންޑަރިންގ ޤާނޫނު ވުޖޫދަށް އައީ ނޭނގި މީހުން ކުށްވެރިކުރަން ނޫންކަމަށް ޑރ ޖަމީލް ވިދާޅުވިއެވެ.

ޔާމީން ފާހަގަ ކުރެއްވި ކަންކަން:

ރައީސް ޔާމީން މި އަޑުއެހުމުގައި ވާހަކަ ދައްކަވަމުން ވިދާޅުވީ، އެމަނިކުފާނު ކުރެއްވި ކަމެއްކަމަށް ތުހުމަތުކޮށް ހުށައަޅާފައިވަނީ ވަރުގަދަ އެއް ހެކި ކަމަށެވެ. އެއީ މި ފައިސާއަކީ ތުހުމަތު ކުރެވޭ ފައިސާތަކެއްކަން އޭސީސީން ރައީސް ޔާމީނަށް އެންގި އެންގުންކަމަށް ރައީސް ޔާމީން ވިދާޅުވިއެވެ. ރައީސް ޔާމީނު ވިދާޅުވީ އެމަނިކުފާނު އަބަދުވެސް ހިންގެވީ ޤާނޫނުގެ މަގުން ކަމަށެވެ.

ރައީސް ޔާމީންގެ އެކައުންޓަށް ޖަމާކޮށްފައިވާ އެ އެއް މިލިއަން ޑޮލަރަކީ ދައުލަތަށް ލިބެންޖެހޭ ފައިސާކަމަށް ބެލެވޭތީ، އެފައިސާ އަނބުރާ ދައުލަތާ ހަވާލުކުރަން ފެންނަކަމަށް ރައީސް ޔާމީނަށް އޭސީސީން އެންގިކަމަށް މުއައްވިޒު ރަޝީދު ވިދާޅުވެފައިވެއެވެ. ނަމަވެސް އެއީ ތެދެއް ނޫންކަމަށް ރައީސް ޔާމީނު ވިދާޅުވިއެވެ.

އިސްތިއުނާފުގައި ހުށައެޅި ބައެއް ނުކުތާތައް:

އެމްއެމްޕީއާރުސީގެ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީކުރުމަށް ކުށްޔަށް ދޫކުރި ގއ. ވޮޑުމުލާގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރުމުގެ ކުށް، ރައީސް ޔާމީންގެ މައްޗަށް ސާބިތުވެ، އެމަނިކުފާނު ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، އެފައިސާ ހަ މަސްދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019ގައެވެ. ކްރިމިނަލް ކޯޓުން ކުރި ހުކުމް ރަނގަޅު ނޫންކަމަށް ބުނެ، ރައީސް ޔާމީންގެ ފަރާތުން ހައިކޯޓުގައި އެ މައްސަލަ އިސްތިއުނާފްކުރިއެވެ.

ހައިކޯޓުގައި އިސްތިއުނާފްކުރި އެ މައްސަލާގައި މިދިޔަ ޖެނުއަރީ މަހުގެ 21 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ރައީސް ޔާމީންގެ މައްޗަށް އިއްވާފައިވާ ހުކުމަށް ތާއީދުކޮށް، ދަމަހައްޓާފައެވެ.

އެހެންކަމުން، ރައީސް ޔާމީންގެ ފަރާތުން، އެމަނިކުފާނުގެ ގާނޫނީ ޓީމުން އެ މައްސަލަ ސުޕްރީމް ކޯޓުގައި އިސްތިއުނާފު ކުރީއެވެ.