ލުކާކޫގެ ދެ ލަނޑާއެކު ޗެލްސީއަށް ފަސޭހަ މޮޅެއް

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ތަޖުރިބާކާރު ފޯވާޑް ރޮމެލޫ ލުކާކޫ ކާމިޔާބުކޮށްދިން ދެ ލަނޑާއެކު އެސްޓަން ވިލާ އަތުން ޗެލްސީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 3-0 ގެ ނަތީޖާއަކުންނެވެ.

މި މެޗުގައި ޗެލްސީން މޮޅު ކުޅުމެއް ދެއްކިއިރު، މެޗުގެ 15 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މަޓެއޯ ކޮވަޗިޗް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ލުކާކޫއެވެ. އަދި ދެވަނަ ހާފު ފަށައިގެން ހަތަރުވަނަ މިނެޓުގައި ކޮވަޗިޗް ވަނީ ލަނޑެއް ޖަހައި، ޗެލްސީގެ ލީޑު ފުޅާކޮށްދީފައެވެ. މި މެޗުގައި ޗެލްސީން ކާމިޔާބުކުރި ތިންވަނަ ލަނޑު މެޗުގެ އިތުރު ވަގުތުގައި ސެޒާ އެޒްޕަލިކުއެޓާ ދިން ޕާހަކުން ކާމިޔާބުކޮށްދިނީ ލުކާކޫއެވެ.

މި މެޗުގައި ލުކާކޫ ދެ ލަނޑު ޖެހިއިރު، މިއީ އަލުން އަނބުރާ ޗެލްސީއަށް ބަދަލުވެ ލުކާކޫ ކާމިޔާބުކޮށްދިން ތިންވަނަ ލަނޑެވެ. މި ފަހަރުގެ ޓްރާންސްފާގައި ޗެލްސީން ލުކާކޫގެ ސޮއި ހޯދާފައިވަނީ 98 މިލިއަން ޕައުންޑުގެ ފީއަކަށެވެ. އެއާއެކު ލުކާކޫ ވެފައިވަނީ ޗެލްސީގެ ތާރީޚުގައި އެ ޓީމުން އެންމެ އަގުބޮޑުކޮށް ގެނައި ކުޅުންތެރިޔާއަށެވެ.

މި މެޗުން ހޯދި މޮޅާއެކު ޗެލްސީ އޮތީ ތާވަލުގެ ދެވަނައިގައި ކުޅުނު ހަތަރު މެޗުން ލިބުނު 10 ޕޮއިންޓާއެކުއެވެ. އަދި ޗެލްސީ އަތުން ބަލިވި ވިލާ އޮތީ ތާވަލުގެ 12 ވަނައިގައި ހަތަރު މެޗުން ހަތަރު ޕޮއިންޓާއެކުއެވެ.