ދެކުނު އެމެރިކާ ކުޅުންތެރިންގެ ސަސްޕެންޝަން އުވާލައިފި

އިނގިރޭސި އެކި ޑިވިޝަންތަކުގެ ކުލަބުތަކަށް ކުޅޭ ދެކުނު އެމެރިކާގެ ކުޅުންތެރިންނަށް ފީފާއިން ދިން ސަސްޕެންޝަން އުވާލައިފިއެވެ.

އިންގްލެންޑުން ކަނޑައަޅާފައިވާ ރެޑް ލިސްޓުގައި އޮތް ގައުމުތަކުގެ ތެރޭގައި ބްރެޒިލާއި ދެކުނު އެމެރިކާގެ ގިނަ ގައުމުތައް ހިމެނޭއިރު، އެ ގައުމަށް ގޮސްފައި އެނބުރި އިންގްލެންޑަށް އައިސް 10 ދުވަހުގެ ކަރަންޓީނެއް ވާން ޖެހެއެވެ. އެހެންކަމުން މި ފަހަރުގެ ބައިނަލްއަގުވާމީ ބްރޭކުގައި ކުޅުނު ފީފާ ވޯލްޑް ކަޕުގެ ދެކުނު އެމެރިކާ ކޮލިފައިން މެޗުތަކަށް އިނގިރޭސި ޕްރިމިއާ ލީގާއި އިނގިރޭސި އެކި ޑިވިޝަންތަކުގެ ކުލަބުތަކުން އެ ކުޅުންތެރިން ދޫކޮށްފައެވެ.

ގައުމީ ޓީމަށް އިނގިރޭސި ކުލަބުތަކުން ދެކުނު އެމެރިކާގެ ކުޅުންތެރިން ދޫކޮށްފައި ނުވާއިރު، މީގެ ކުރިން ފީފާއިން ވަނީ ގައުމީ ޓީމަށް ކުޅުންތެރިން ދޫކުރަން އިލްތިމާސްކޮށްފައެވެ. ފީފާގެ ގަވާއިދުގައިވާ ގޮތުން ކުލަބަކުން ގައުމީ ޓީމަށް ކުޅުންތެރިއަކު ދޫކުރަން ދެކޮޅު ހަދައިފިނަމަ، އެ ގައުމެއްގެ ފުޓްބޯޅަ އެސޯސިއޭޝަނުން އެދުމުން އެ ކުޅުންތެރިއަކު ފަސް ދުވަހުގެ މުއްދަތަކަށް ސަސްޕެންޑްކުރެވެއެވެ.

އެއާއެކު މިދިޔަ ބުދަ ދުވަހު ބްރެޒިލުގެ ފުޓްބޯޅަ ފެޑެރޭޝަނުން ވަނީ އިނގިރޭސި ކުލަބުތަކަށް ފިޔަވަޅު އަޅައި ދިނުމަށް ފީފާގައި އެދެފައެވެ. އަދި ފަހުން ދެކުނު އެމެރިކާގެ އެހެން ގައުމުތަކުންވެސް ވަނީ އެކަމަށް އެދެފައެވެ. ނަމަވެސް މި ހަފުތާ ބަންދުގެ މެޗުތައް ފެށުމުގެ ކުރިން ބްރެޒިލް، މެކްސިކޯ، ޗިލީ އަދި ޕެރަގުއޭއިން ވަނީ ފީފާއަށް ހުށަހެޅި ޝަކުވާ އަނބުރާ ގެންގޮސްފައެވެ.

ފީފާއިން މީގެ ކުރިން ދިން އަދަބަށް ލުޔެއް ނުލިބުނު ނަމަ މެޗުތައް ގެއްލޭނެ ކުޅުންތެރިންނަކީ ލިވަޕޫލުގެ ގޯލްކީޕަރު އެލިސަން ބެކާ އާއި، މިޑްފީލްޑަރު ފަބީނިއޯ އާއި، ފޯވާޑް ރޮބާޓޯ ފިރްމީނޯ އާއި، މެންޗެސްޓާ ސިޓީގެ ގޯލްކީޕަރު އެޑަސަން އާއި، އެ ޓީމުގެ ފޯވާޑް ގަބްރިއެލް ޖީސޫސް އަދި ޗެލްސީގެ ޑިފެންޑަރު ތިއާގޯ ސިލްވާ އާއި، މެންޗެސްޓާ ޔުނައިޓެޑުގެ މިޑްފީލްޑަރު ފްރެޑާއި، އެވަޓަންގެ ފޯވާޑް ރިޗާލިސަން އާއި، ލީޑްސް ޔުނައިޓެޑުގެ މިޑްފީލްޑަރު ރަފީނިއާ އާއި، ވަޓްފޯޑްގެ ފްރާންސިސްކޯ ސިއަރެލްޓާ، ނިއުކާސަލްގެ މިގޭލް އަލްމިރޯން އާއި، ވުލްވްސްގެ ފޯވާޑް ރައުލް ހިމެނޭޒް އަދި ބްލެކްބާން ރޯވާސްގެ ބެން ބްރެރެޓަނެވެ.

މި ފަހަރުގެ ބައިނަލްއަގުވާމީ ބްރޭކަށް ޕްރިމިއާ ލީގުގެ ކުލަބުތަކުން ދެކުނު އެމެރިކާގެ ކުޅުންތެރިން ދޫނުކުރަން ނިންމި ނަމަވެސް، ޕްރިމިއާ ލީގުގައި ކުޅޭ އާޖެންޓީނާގެ ހަތަރު ކުޅުންތެރިއަކު ވަނީ ކުލަބުތަކުން ހުއްދަދިނުމުން ކޮލިފައިން މެޗުތަކުގައި ކުޅެފައެވެ. އެގޮތުން ކޮލިފައިންއަށް އާޖެންޓީނާއިން އެކުލަވާލި ސްކޮޑުގައި ޕްރިމިއާ ލީގުގެ ހަތަރު ކުޅުންތެރިއަކު ހިމެނުނެވެ. އެއީ ޓޮޓެންހަމް ހޮޓްސްޕާއަށް ކުޅެމުން އަންނަ ޖިއޮވާނީ ލޮ ސެލްސޯ އާއި، ކްރިސްޓިއަން ރޮމޭރޯ އަދި އެސްޓަން ވިލާގެ ގޯލްކީޕަރު އެމިލިއާނޯ މާޓީނޭޒް އަދި އެމީ ބުއެންޑީއާއެވެ.

އެކަމަކު ކޮލިފައިންގައި ބްރެޒިލާއި އާޖެންޓީނާ ބައްދަލުކުރި މެޗަށް މި ކުޅުންތެރިން ބްރެޒިލަށް ދިޔުމާއެކު، އެ މެޗު ފެށިތާ ފަސް މިނެޓު ތެރޭ ފުލުހުންނާއެކު ސިއްހީ އޮފިޝަލުން ވަނީ ދަނޑަށް އަރައި މެޗު ހުއްޓުވާފައެވެ. އެއާއެކު އެ މެޗު ސަސްޕެންޑްކުރިއިރު، ފީފާގެ ޑިސިޕްލިނަރީ ކޮމިޓީން އަންނަނީ އެ މައްސަލަ ތަހުގީގުކުރަމުންނެވެ.

އާޖެންޓީނާގެ ފުޓްބޯޅަ އެސޯސިއޭޝަނުން ހާމަކޮށްފައިވާ ގޮތުން ބްރެޒިލުގެ ކަރަންޓީން އުސޫލާ ޚިލާފުވި ހަތަރު ކުޅުންތެރިން މިހާރު ވަނީ އެނބުރި އިންގްލެންޑަށް ދިޔުމަށް ނިންމާފައެވެ. އޭގެ ތެރެއިން މާޓިނޭޒާއި ބުއެންޑީއާ ނިންމާފައިވަނީ އިންގްލެންޑަށް އައުމުގެ ކުރިން ކްރޮއޭޝިއާގައި ވަކި މުއްދަތެއް ވަންދެން ތިބުމަށް ކަމަށް ރިޕޯޓުތައް ބުނެއެވެ. އެކަމަކު އިންގްލެންޑުގެ ކަރަންޓީނު އުސޫލުތަކާ ގުޅިގެން އެ ހަތަރު ކުޅުންތެރިންނަށްވެސް މި ހަފުތާ ބަންދުގައި ކުޅޭ ޕްރިމިއާ ލީގުގެ މެޗުތައް ގެއްލޭނެއެވެ.