ހެޓްރިކް ހަދައި ޕެލޭގެ ރިކޯޑެއް މެސީ މުގުރާލައިފި

ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ބޮލިވިއާ އަތުން މޮޅުވި މެޗުގައި ހެދި ހެޓްރިކާއެކު ބްރެޒިލުގެ ލެެޖެންޑް ޕެލޭ ހަދާފައިވާ ރިކޯޑެއް އާޖެންޓީނާގެ ތަރި ލިއޮނެލް މެސީ މުގުރާލައިފިއެވެ.

ބުރާސްފަތި ދުވަހުގެރޭ އަމިއްލަ ގައުމުގައި ކުޅުނު މެޗުން އާޖެންޓީނާ މޮޅުވީ 3-0 ގެ ނަތީޖާއަކުންނެވެ.

މި މެޗު ފަށައިގެން 14 ވަނަ މިނެޓުގައި ލެއަންޑްރޯ ޕަރޭޑޭސްގެ އެހީއާއެކު އޭރިއާ ބޭރުން ފޮނުވާލި ހަމަލާއަކުން މެސީ ވަނީ އާޖެންޓީނާއަށް ލީޑު ނަގައިދީފައެވެ. އޭގެ ފަހުން މެޗުގެ 64 ވަނަ މިނެޓުގައި މެސީ ކާމިޔާބުކޮށްދިން ދެވަނަ ލަނޑާއެކު އާޖެންޓީނާއިން ލީޑު ފުޅާކުރިއިރު، މެޗު ނިމެން ދެ މިނިޓަށް ވެފައި ވަނިކޮށް މެސީ ވަނީ އޭނާގެ ހެޓްރިކް ފުރިހަމަކޮށްފައެވެ.

މި މެޗުގައި ހެދި ހެޓްރިކާއެކު މެސީ ވަނީ ދެކުނު އެމެރިކާގެ ގައުމީ ޓީމަކަށް އެންމެ ގިނަ ލަނޑު ޖެހުމުގެ ރިކޯޑު ހަދާފައެވެ. މީގެ ކުރިން މި ރިކޯޑު އޮތް ޕެލޭ ވަނީ ބްރެޒިލަށް ކުޅެދިން 92 މެޗުގައި 77 ލަނޑު ޖަހާފައެވެ. މެސީ އެ ރިކޯޑު މުގުރާލީ އާޖެންޓީނާގެ ގައުމީ ޓީމަށް ކުޅެދިން 153 މެޗުން 79 ލަނޑު ހަމަކޮށްގެންނެވެ.

ބުރާސްފަތި ދުވަހުގެރޭ ކުޅުނު މެޗުން ބޮލިވިއާ އަތުން އާޖެންޓީނާ މޮޅުވިއިރު، ކޮލިފައިންގައި ބުރާސްފަތި ދުވަހުގެރޭ ކުޅުނު މެޗުން ބްރެޒިލްވެސް ވަނީ މޮޅުވެފައެވެ. އަމިއްލަ ގައުމުގައި ކުޅުނު މެޗުން ބްރެޒިލް މޮޅުވީ ޕެރޫ އަތުން 2-0 ގެ ނަތީޖާއަކުންނެވެ.

މި ނަތީޖާތަކާއެކު ދެކުނު އެމެރިކާގެ ކޮލިފައިން ބުރުގެ އެއްވަނައިގައި ބްރެޒިލް އޮތީ ސައްތައިން ސައްތަ ރިކޯޑަކާއެކުއެވެ. މިހާތަނަށް ކުޅުނު އަށް މެޗުންވެސް މޮޅުވެފައިވާ ބްރެޒިލަށް 24 ޕޮއިންޓް ލިބިފައިވާއިރު، ދެވަނައިގައި އޮތް އާޖެންޓީނާއަށް އަށް މެޗުން ލިބިފައިވަނީ 18 ޕޮއިންޓެވެ. ތިންވަނައިގައި އޮތީ ބުރާސްފަތި ދުވަހުގެރޭ އެކުއެޑޯ އަތުން 1-0 ގެ ނަތީޖާއަކުން މޮޅުވި އުރުގުއޭއެވެ. އުރުގުއޭއަށް ނުވަ މެޗުން ވަނީ 15 ޕޮއިންޓް ލިބިފައެވެ.