ބޯހިޔާވަހިކަމުގެ ހާލަތު މި ހިސާބަށް އައީ ވެސް ކުރީ ސަރުކާރުގެ ސަބަބުން - ޔައުޤޫބް
ކުރީ ސަރުކާރުގައި އެންމެ ފަހު ދޮޅު އަހަރުގެ ތެރޭގައި ފްލެޓުގެ މަސައްކަތް ކުރަމުންދިޔަ
ޔައުޤޫބް ޢަބްދުﷲ - ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު
ބޯހިޔާވަހިކަމުގެ ހާލަތު މި ހިސާބަށް އައީ ވެސް ކުރީ ސަރުކާރުގެ ސަބަބުން ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔައުޤޫބް ޢަބްދުﷲ ވިދާޅުވެއްޖެއެވެ.
މެންބަރު މިހެން ވިދާޅުވީ، ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި، މާލޭގެ ރައްޔިތުންނަށް ސަރުކާރުން ވެފައިވާ ބޯހިޔާވަހިކަމުގެ ވަޢުދު ނުފުދި ލަސްވާތީ ހުށަހަޅާފައިވާ މައްސަލައަށް ބަހުސް ކުރައްވަމުންނެވެ. މެންބަރު ވިދާޅުވީ, ސަރުކާރުން ވަޢުދުވީ 5 އަހަރުގެ ތެރޭގައި ބޯހިޔާވަހިކަމަށް ހައްލެއް ހޯދައި ދިނުމަށް ކަމަށެވެ. އަދި ފަސް އަހަރު ނުނިމޭ ކަމަށާއި، އަދިވެސް ދުވަސް އެބައޮތް ކަމަށެވެ. އަދި އެ މުއްދަތުގެ ތެރޭގައި ބޯހިޔާވަހިކަމަށް ހައްލު ހޯދައިދޭނެ ކަމުގެ ޔަގީންކަން އެބައޮތް ކަމަށް ވިދާޅުވިއެވެ. ކުރީ ސަރުކާރުގައި އެންމެ ފަހު ދޮޅު އަހަރުގެ ތެރޭގައި ފްލެޓުގެ މަސައްކަތް ކުރަމުންދިޔަކަން މެންބަރު ފާހަގަކުރެއްވިއެވެ.
މެންބަރު ވިދާޅުވީ، މާލޭގެ ބޯހިޔާވަހިކަމުގެ ހާލަތު މި ހިސާބަށް އައީ ވެސް ފާއިތުވި ސަރުކާރުގެ ތެރޭގައި އެއް ރަށަކަށް، އެއްތަނަކަށް ތަރައްޤީގެ ހުރިހާ މަޝްރޫޢެއް ޖަމާކުރަމުންދިއުމުގެ ސަބަބުން ކަަމަށެވެ. އޭގެ ނަތީޖާއެއްގެ ގޮތުން މިއަދު ދިމާވެގެން މިއުޅޭ އިޖުތިމާޢީ، އިޤުތިޞާދީ އަދި އެހެނިހެން ހުރިހާ މައްސަލަތައް މާލޭގައި ދިމާވެފައިވާ ކަމަށާއި، ޚާއްޞަކޮށް ބޯހިޔާވަހިކަމުގެ މައްސަލަ ދިމާވެގެން މިއުޅެމީ އެކަމުގެ ސަބަބުން ކަމަށެވެ.
ރާއްޖޭގެ ހުރިހާ ރަށަކަށް ވެސް ތަރައްޤީގެ ހުރިހާ މަޝްރޫއެއް ހަމަހަމަ ކަމާއެކު ކުރިއަށްގެންދަން ޖެހޭނެ ކަމަށާއި، މާލޭގެ ރައްޔިތުންނަށް ވެސް ބޯހިޔާވަހިކަމަށް ހައްލު ލިބެންޖެހޭނެ ކަމަށް ވިދާޅުވިއެވެ.
ރައީސް ޔާމީންގެ ސަރުކާރުގައި މަސްވެރިންނަށް ދިހަ ހާސް ރުފިޔާ، ބެޔަސްނުބެޔަސް ދޭން ވައުދުވެ އެކަން ނުވުމުން އެއީ ތިމަންނަމެން ކުރި ކަމެއް ނޫން ކަމަށް ބުނެ، އެއީ ފޮތި ޕްރިންޓުކުރި ކުދިން ކުރި ކަމެކޭ ބުނި ގޮތަށް މި ސަރުކާރުން ވެފައިވާ ވައުދު ހަނދާން ނައްތާލައި، އެކަމާ ހަވާލު ނުވާން ނޫޅޭނެ ކަމަށް ވިދާޅުވިއެވެ.
ސަރުކާރުގެ ވިސްނުމަކީ، ރާއްޖޭގެ ހުރިހާ ސަރަޙައްދަކަށް ވެސް، އަދި މީހުން ދިރިއުޅޭ ހުރިހާ ސަރަޙައްދަކަށް ވެސް އެއް ހަމަޔަކުން ކަންކަން ކުރަމުންދިއުން ކަމަށެވެ. މި ދައުރުގައި ބާކީ މި އޮތް 2 އަހަރުގެ ތެރޭގައި މާލޭގެ ރައްޔިތުންނަށް ކޮށްދޭންޖެހޭ ހުރިހާ ކަމެއް، އަދި ވީ ހުރިހާ ވަޢުދެއް ރަނުން ރަނަށް ފުއްދާނެކަމުގެ ޔަގީންކަން އެބައޮތްކަމަށް ވިދާޅުވިއެވެ.
