އަންހެނަކަށް ވީތީ އެހެން މީހުންގެ ފަރާތުން ދެރަ ބަސްތައް އިވޭނެ، ފަރުވާލެއް ނުދީ ކުރިއަށްދޭ!

އެންމެ ކުރިން ފެށިގެން ވެސް މި މުޖުތަމައުގައި މީހުންގެ ވިސްނުމާއި ފިކުރު ހުންނަ ގޮތުން މަސައްކަތުގެ މާހައުލުގައި އަންހެނުންނާއި ފިރިހެނުންނަށް ޚާއްސަ މަސައްކަތްތަކެއް ވަނީ ކަނޑައެޅިފައެވެ. މީހެއްގެ ގާބިލިއްޔަތަށް ބެލުމެއް ނެތި މިވެނި މަސައްކަތަކީ އަންހެނަކަށް ނުކުރެވޭނެ މަސައްކަތެކޭ، އެއީ ފިރިހެނުން ކުރާ ކަމެކޭ ބުނާ އަޑު އަބަދުވެސް އިވެއެވެ. ގާބިލިއްޔަތަށް ބަލައިފިނަމަ ގިނަ ފަހަރަށް އަންހެނުންގެ ގާބިލްކަން ފިރިހެނުންނަށްވުރެ އެތައް ގުނައެއް ބޮޑެެވެ. އެހެންނަމަވެސް ޒަމާނުއްސުރެ މި ވާހަކަތައް މިގޮތަށް ދެކެވެމުން އައިސް މިއަދުވެސް މިގޮތަށް މި ވާހަކަތައް ދައްކާ ބަޔަކު އުޅޭނަމަ އެ މީހުންގެ ވިސްނުން ބަދަލުކުރުން ވާނީ ވަރަށް އުނދަގޫ ކަމަކަށެވެ.

މިގޮތަށް "ފިރިހެނުންނަށް ޚާއްސަ" ދާއިރާއެއްގެ ގޮތުގައި ކަނޑައަޅާފައިވާ އެއް ދާއިރާއަކީ އާކިޓެކްޗަރަލް ދާއިރާއެވެ. މިއީ އަންހެނުންނަށް ކުރިއަށް ނުދެވޭނެ ދާއިރާއެއްގެ ގޮތުގައި ފިރިހެނުން ސިފަކުރާ ދާއިރާއެކެވެ. ހަމައެކަނި ފިރިހެނުންނެއް ނޫނެވެ. މިހެން ބުނާ ބަޔަކު އަންހެނުންގެ ތެރޭގައި ވެސް އުޅެއެވެ. އެހެންނަމަވެސް ރާއްޖޭގެ އާކިޓެކްޗަރަލް ދާއިރާއަށް ބަލާލާއިރު މި ފެންނަނީ މިފަދަ ބަސްތައް ބުނާ މީހުންގެ ސަބަބުން ހިތްވަރު އެލުވާލައި، ދާއިރާ ދޫކޮށްލި ކަނބަލުންނެއް ނޫނެވެ. އެމީހުންގެ އެ ބުނުމަށް ގޮންޖައްސަވައި، ގިނަ ދުވަސްތަކެއް މި ދާއިރާގައި ހޭދަކުރި ކަނބަލުންނެވެ. މިގޮތުން ފާހަގަކޮށްލެވޭ އެއް ކަނބަލަކީ ސައިންސް, ޓެކްނޮލޮކީ, އިންޖީނިއަރިން އަދި މެތަމެޓިކްސް (ސްޓެމް) ދާއިރާއިން ރެހެންދި އެވޯޑު ޙާސިލްކުރެއްވި ޒީނިއާ އަހުމަދު ހަމީދެވެ.

ސްޓެމް ދާއިރާއިން ޒީނިއާ މަސައްކަތްކުރަނީ ކޮންސްޓްރަކްޝަން އަދި އާކިޓެކްޗަރ ރޮނގުންނެވެ. 2006 ވަނަ އަހަރު އެސިސްޓެންޓް އާކިޓެކްޓެއްގެ ގޮތުގައި ސަރުކާރުގެ ވަޒީފާއާ ގުޅިވަޑައިގެންނެވި ޒީނިއާ މިހާރު ފުރުއްވަމުން ގެންދަވަނީ މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ޕާމަނަންޓް ސެކްރެޓަރީގެ މަގާމެވެ.

މި ދާއިރާއިން 15 އަހަރު ދުވަހުގެ ޚިދުމަތެއް ކޮށްދެއްވާފައިވާ ޒީނިއާ ވަނީ އާކިޓެކްޗަރަލް ޑިޒައިން މަސައްކަތް އާކިޓެކްޓުން ކުރާ ގޮތަށް، އަދި ސްޓްރަކްޗަރަލް ޑިޒައިން މަސައްކަތް އިންޖީނިއަރުން ކުރާ ގޮތަށް ބަދަލުގެނައުމުގައި އިސް ދައުރެއް އަދާކުރައްވާފައެވެ. 2017 ވަނަ އަހަރު ރާއްޖޭގައި އިމާރާތްކުރުމުގެ ގާނޫނު ވުޖޫދަށް ގެނައުމުގައި ގިނަ މަސައްކަތްތަކެއް ކޮށްދެއްވާފައިވާއިރު، ޒިނިއާގެ ބެލުމުގެ ދަށުގައި ސަރުކާރުގެ ގިނަ މަޝްރޫއުތަކެއް ނިންމައި، އިމާރާތްކުރުމުގައި ގެންގުޅޭ ހެލްތް އެންޑް ސޭފްޓީ މިންގަނޑު ވެސް ވަނީ އެކުލަވާލާފައެވެ. އަމިއްލަ މަސައްކަތުގެ ތެރެއިން ހޮސްޕިޓަލު، ޔުނިވާސިޓީ، ފެރީ ޓާމިނަލް ފަދަ ތަންތަން ކުރަހައިދީފައިވާއިރު، މިހާތަނަށް ޒީނިއާ ވަނީ 200 އަށްވުރެ ގިނަ ޕްރޮޖެކްޓުގައި މަސައްކަތްކުރައްވާފައެވެ. މީގެ އިތުރުން ގެސްޓް ލެކްޗަރާއެއްގެ ގޮތުގައި، މި ރޮނގުން ލިބިފައިވާ އިލްމު އެހެން މީހުންނަށް ފޯރުކޮށްދިނުމުގެ މަސައްކަތް ވެސް ޒީނިއާ ކުރައްވައެވެ.

ރެހެންދި އެވޯޑު ދިނުމަށް ބޭއްވި ހަފްލާގައި ވާހަކަދައްކަވަމުން ޒީނިއާ ވިދާޅުވީ ކިޔެވުމުގެ މުހިންމުކަން އެނގުނީ އޯލެވެލް ނިމި، ފަސް އަހަރު ފަހުން ކުރިއަށްދާނެ ދާއިރާއެއް ކަނޑައެޅުނު ހިސާބުން ކަމަށެވެ. އެ ހިސާބުން ފެށިގެން އާކިޓެކްޗަރަލް ދާއިރާއިން ކިޔަވަން ފެށީ ކަމަށް ޒީނިއާ ވިދާޅުވިއެވެ. ޒީނިއާ ވިދާޅުވީ އޭނާ ޑިގްރީ ހެދުމަށް ފައުންޑޭޝަންގެ 6 މަހުގެ ޕްރޮގްރާމެއް ފުރިހަމަކޮށްފައިވާ ކަމަށެވެ. އެ ކޯހުން ފާސްވެ، ޑިގްރީ އަދި މާސްޓަރސް ހެދީ އާކިޓެކްޗަރަލް ދާއިރާއިންނެވެ. ޕޯސްޓް ގްރެޖުއޭޓް ޑިޕްލޮމާ ހެދީ އާބިޓްރޭޝަން ދާއިރާއިން ކަމަށާއި، 2006 ވަނަ އަހަރު ސަރުކާރު ވަޒީފާއަށް ދިޔައީ އާކިޓެކްޗަރ ޕާޓް 2ގެ މާސްޓަރސް ހަދައިގެން ކަމަށް ޒީނިއާ ވިދާޅުވިއެވެ.

ޒީނިއާ ވިދާޅުވީ އޭނާ އާކިޓެކްޗަރަލް ދާއިރާއަށް ނުކުތް އިރު، މި ދާއިރާގައި މަސައްކަތްކުރަނީ މުޅިއެކު 7 މީހުން ކަމަށެވެ. އޭގެތެރޭގައި ހިމެނެނީ 2 އަންހެނުން ކަމަށް އޭނާ ވިދާޅުވިއެވެ. މިވީ 15 އަހަރުތެރޭގައި ވެސް މި ދާއިރާއަށް މާސްޓަރސް ހަދައިގެން ނުކުމެފައިވަނީ ދެ އަންހެން ބޭފުޅުންކަމީ ހިތާމަކުރާ ކަމެއް ކަމަށް ޒީނިއާ ވިދާޅުވިއެވެ.

ޒީނިއާ ވިދާޅުވީ ކުރިއާއި މިހާރާ އަޅާ ބަލާއިރުވެސް އާކިޓެކްޗަރަލް ދާއިރާއަކީ އަންހެނުންނަށް ގޮންޖެހުން ބޮޑު ދާއިރާއެއް ކަމަށެވެ. މި ދާއިރާއަކީ ފިރިހެނުންނަށް ޚާއްސަ ދާއިރާއެއްގެ ގޮތުގައި ކަނޑައަޅާފައިވާ ދާއިރާއެއް ކަމަށް ޒީނިއާ ވިދާޅުވިއެވެ. ޒީނިއާ ވިދާޅުވީ ވަޒީފާގެ މާހައުލުންނާއި ވަޒީފާ ހޯދުމުގެ ތެރެއިން ކުރިމަތިވާ އެކި ގޮންޖެހުންތަކުގެ ސަބަބުން އަންހެނުންނަށް ވަޒީފާތަކުގައި ދެމިތިބުމަކީ ފަސޭހަކަމެއް ނޫން ކަމަށެވެ. ތިމާ މާޔޫސްކުރުވަނިވި އެތައް ބަހެއް މީހުންގެ ފަރާތުން އިވޭނެ ކަމަށް އޭނާ ވިދާޅުވިއެވެ. އެހެންނަމަވެސް ހިތްވަރާއެކު މަސައްކަތްކޮށްފިނަމަ އަންހެނަކަސް ކޮންމެ ދާއިރާއަކުންވެސް ކުރިއަށްދެވޭނެ ކަމަށް ޒީނިއާ ވަނީ ވިދާޅުވެފައެވެ.

އެކި ދާއިރާތަކުން ކުރިއަށްދިއުމުގައި އަންހެނުންނަށް ހުރި ހުރަސްތައް ކުޑަކުރުމަށް މި ސަރުކާރުން ގިނަ މަސައްކަތްތަކެއް ކުރެއެވެ. މިގޮތުން ސަރުކާރުގެ އިދާރާތަކަށް ބަލައިލި ނަމަވެސް އެ ތަންތަނުގެ މަތީ މަގާމުތައް ފުރުއްވަން އަންހެން ބޭފުޅުން ތިއްބަވައެވެ. އަދި ލޯކަލް ކައުންސިލްތަކަށް ބަލައިލި ނަމަވެސް އަންހެނުންގެ ތަރައްގީއަށް މަސައްކަތްކުރުމަށް ކޮމިޓީތަކެއް ވަނީ އެކުލަވާލައިފައެވެ. އަދި އާންމުކޮށް އަންހެނުން މަސައްކަތްކޮށް ނޫޅޭ ދާއިރާތަކުން އަންހެން ކަނބަލުން ނެރުމަށް ސަރުކާރުން ކުރާ މަސައްކަތަކަކީ ވަޒީފާގެ މާހައުލުގައި އަންހެނުންނާއި ފިރިހެނުންނާ ދެމެދު އޮންނަ ފަރަގު ކުޑަކުރަން މި ސަރުކާރުން ގިނަ މަސައްކަތްތަކެއް ކުރާކަމުގެ ހެއްކެކެވެ.