ރިބެރީ އަލަށް ޕްރޮމޯޓުވި ސަލެރްނިޓާނާއަށް

އިޓާލިއަން ލީގަށް އަލަށް ޕްރޮމޯޓުވި ސަލެރްނިޓާނާއަށް ބަދަލުވާން ފްރާންސްގެ ތަޖުރިބާކާރު މިޑްފީލްޑަރު ފްރޭންކް ރިބެރީ އެއްބަސްވެއްޖެއެވެ.

ޖަރުމަނުގެ ބަޔާން މިއުނިކުގައި 12 އަހަރު ހޭދަކުރުމަށްފަހު އުމުރުން 38 އަހަރުގެ ރިބެރީ މިދިޔަ ދެ ސީޒަނުގައި ކުޅުނީ އިޓަލީގެ ފިއޮރެންޓީނާއަށެވެ. ހިލޭ ޓްރާންސްފާއެއްގެ ދަށުން 2019 ވަނަ އަހަރުގެ އޯގަސްޓް މަހު އޭނާ އެ ކުލަބާ ގުޅުނުއިރު، މިދިޔަ ޖޫން މަހު ވަނީ ރިބެރީގެ އެއްބަސްވުމުގެ މުއްދަތު ހަމަވެފައެވެ.

އެއާއެކު މި ސީޒަނަށް ހިލޭ ޓްރާންސްފާއެއްގެ ދަށުން ރިބެރީ ސަލެރްނިޓާނާއަށް ބަދަލުވާން މިހާރު އެއްބަސްވެފައިވާ ކަމަށް އިޓަލީގެ މީޑިއާތަކުން ވަނީ ރިޕޯޓުކޮށްފައެވެ. މި ސީޒަނަށް ރިބެރީ ސަލެރްނިޓާނާއާ ގުޅޭއިރު، މި ފަހަރުގެ ޕްރީ-ސީޒަނުގައި އޭނާ ވަނީ ބަޔާނުގެ އައު ކޯޗު ހޫލިއަން ނާގަލްސްމަނުގެ ސްކޮޑާއެކު ފަރިތަކޮށްފައެވެ. އެކަމަކު އެ ފަހަރު ދިން އިންޓަވިއުއެއްގައި ބަޔާނުގެ ސީއީއޯ އޮލިވާ ޚާން ވިދާޅުވީ ރިބެރީގެ ސޮއި ހޯދުމުގެ ވިސްނުމެއް ބަޔާނުން މިހާރު ނުގެންގުޅޭ ކަމަށެވެ.

އުމުރުން 38 އަހަރުގައި ފުޓްބޯޅަ ކުޅުން ހުއްޓާނުލައި ރިބެރީ ޓީމަކާ ގުޅޭއިރު، މީގެ ކުރިން ގަލަސަތަރާއި އާއި މާސޭއަށް ކުޅެފައިވާ ރިބެރީ އެންމެ ފުރަތަމަ ބަޔާނަށް ބަދަލުވީ 2007 ވަނަ އަހަރުގެ ސީޒަނުގައެވެ. އޭނާ ވަނީ މީގެ ކުރިން ބަޔާނަށް ކުޅެދިން 425 މެޗުގައި 124 ލަނޑު ކާމިޔާބުކޮށްފައެވެ. ބަޔާނާއެކު ރިބެރީ 20 އަށްވުރެ ގިނަ ތަށި ހޯދިފައިވާއިރު، އޭގެ ތެރޭގައި ޖަރުމަން ލީގު ނުވަ ފަހަރު ހިމެނެއެވެ. އަދި ވަނީ ބަޔާނާއެކު ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.

ބަޔާން ދޫކޮށްލުމަށްފަހު ރިބެރީ ފިއޮރެންޓީނާގައި ދެ ސީޒަން ހޭދަކުރިއިރު، އޭނާ ވަނީ އެ ޓީމަށް ކުޅެދިން 51 މެޗުގައި ފަސް ލަނޑު ޖަހާފައެވެ. މީގެ އިތުރުން ފްރާންސް ގައުމީ ފުޓްބޯޅަ ޓީމާއެކު 2006 ވަނަ އަހަރުގެ ފީފާ ވޯލްޑް ކަޕުގެ ރަނަރަޕްކަން ހޯދި ރިބެރީ ވަނީ ގައުމީ ޓީމަށް ކުޅުނު 81 މެޗުގައި 16 ލަނޑު ކާމިޔާބުކޮށްފައެވެ. ރިބެރީ ގައުމީ ޓީމަށް ކުޅުން ހުއްޓާލާފައިވަނީ 2014 ވަނަ އަހަރުގެ ތެރޭގައެވެ.