ބަޔާންއާއެކު ހަދާފައިވާ އެއްބަސްވުން ރިބެރީ އާކޮށްފި

ބަޔާން މިއުނިކަށް ކުޅެމުން އަންނަ ފްރާންސްގެ ވިންގަރ ފްރޭންކް ރިބެރީ އެ ޓީމާއެކު ހަދާފައިވާ އެއްބަސްވުން އާކޮށްފިއެވެ.

ބަޔާންއާއެކު ރިބެރީ ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާއިރު ކޮންޓްރެކްޓް އާކުރުމުގެ ކުރިން އޭނާ ވަނީ ތަކުރާރުކޮށް އެ ޓީމުގައި މަޑުކުރަން ބޭނުންވާ ކަމަށް ބުނެފައެވެ. އޭނާ ބަޔާންއާއެކު ސޮއިކޮށްފައިވަނީ އެއް އަހަރު ދުވަހުގެ އެއްބަސްވުމެއްގައެވެ. އުމުރުން 35 އަހަރުގެ ރިބެރީއަށް އަނިޔާގެ ސަބަބުން މި ސީޒަނުގައި ގިނަ މެޗުތަކެއް ގެއްލުނުއިރު އޭނާ ވަނީ ކުޅުނު 32 މެޗުގައި ބަޔާންއަށް ހަ ލަނޑު ޖަހައިދީފައެވެ.

ބަޔާންގެ ސްޕޯޓިން ޑިރެކްޓަރު ހަސާން ސަލިހަމިޑްޒިޗް ރިބެރީ ކޮންޓްރެކްޓް އާކުރުމާއި ގުޅިގެން ބުނެފައިވަނީ މި ސީޒަނުގައި ބަޔާން ކުޅުނު ހުރިހާ މުބާރާތެއްގައި ވެސް ރިބެރީ މޮޅު ކުޅުމެއް ދައްކާފައިވާ ކަމަށާއި އޭނާއަކީ ވަރަށް ކޮލިޓީ ކުޅުންތެރިޔެއްކަން ކްލަބްގެ ހުރިހާ އެންމެން ވެސް ގަބޫލްކުރާ ކަމަށެވެ. ހަމައެހެންމެ އޭނާއަކީ ނަތީޖާ ބަދަލުކުރެވޭ ފެންވަރުގެ ކުޅުންތެރިޔެއް ކަމަށާއި އޭނާއަކީ ސަޕޯޓަރުން ވެސް ވަރަށް ގަޔާވާ ކުޅުންތެރިޔެއް ކަމަށް ސަލިހަމިޑްޒިޗް ބުނެފައިވެއެވެ.

ކޮންޓްރެކްޓް އާކުރުމަށްފަހު ވާހަކަ ދައްކަމުން ރިބެރީ ބުނެފައިވަނީ ބަޔާން ފަދަ ބޮޑު ޓީމެއްގައި އިތުރު އަހަރެއް މަޑުކުރަން ފުރުސަތު ލިބުމަކީ އޭނާއަށް ލިބޭ ބޮޑު ޝަރަފެއް ކަމަށާއި މިއުނިކަކީ އޭނާގެ އަމިއްލަ ސިޓީއެއްގެ ގޮތުގައި ދެކޭ ކަމަށެވެ. އަދި އަންނަ ސީޒަނުގައި ބަޔާންގެ ޖާޒީއާއެކު އޭނާއަށް ކުޅުމުގެ ފުރުސަތު ލިބުމަކީ ލިބޭ އެންމެ ބޮޑު ހިތްހަމަޖެހުމުގެ ގޮތުގައި ރިބެރީ ވަނީ ސިފަކޮށްފައެވެ.

ރިބެރީ ކޮންޓްރެކްޓް އާކޮށްފައިވާއިރު އޭނާއާއެކު ބަޔާންގައި މުހިންމު ދައުރެއް އަދާކުރަމުން އަންނަ ނެދަލޭންޑްސްގެ ވިންގަރ އާޔެން ރޮބެންގެ ކޮންޓްރެކްޓް އާކުރުމުގެ މަސައްކަތް އެ ކްލަބުން އަންނަނީ ކުރަމުންނެވެ. ރޮބެން ވެސް ބަޔާންއާއެކު ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވާނެއެވެ.

ބަޔާންގެ ޗީފް އެގްޒެކްޓިވް ކާލް ހެއިންޒް ރުމެނިގާ ބުނެފައިވަނީ ރޮބެންގެ ކޮންޓްރެކްޓް އާކުރުމާމެދު ދައްކަން ޖެހޭ މާ ގިނަ ވާހަކަތަކެއް ނެތް ކަމަށެވެ. އޭނާ ބުނީ މި މަހުގެ ތެރޭގައި ރޮބެންއާއެކު ވެސް ކޮންޓްރެކްޓް އާކުރުމުގެ މަޝްވަރާތައް ކުރިޔަށް ގެންދާނެ ކަމަށާއި އެކަމަށް ރޮބެން ވެސް އެއްބަސްވެފައިވާ ކަމަށެވެ. ހަމައެހެންމެ ބަޔާންއާ އެކު ހަދާފައިވާ ކޮންޓްރެކްޓްގެ މުއްދަތު ހަމަވުމާ ގާތްވުމަކީ މާބޮޑު މައްސަލައެއް ކަމުގައި ރޮބެން ނުދެކޭ ކަމަށް އޭނާ ބުންޏެވެ.

އެހެން ނަމަވެސް އުމުރުން 34 އަހަރުގެ ރޮބެން ނޫސްވެރިންނާއި ވާހަކަ ދައްކަމުން ބުނީ މިއީ އޭނާ ބަޔާންގައި ހޭދަކުރާ އެންމެފަހު ސީޒަނަށް ވުމަކީ ވެސް އެކަށީގެންވާ ކަމެއް ކަމަށާއި ކޮންމެ ކަމެއް ވެސް މި ދަނޑިވަޅުގައި ވުމަކީ އެކަށީގެންވާ ކަމެއް ކަމަށެވެ. އޭނާ ބުނީ މިހާރު ކުރިޔަށް ވާންހުރި ކަންކަމާމެދު ނުވިސްނާ ކަމަށާއި މިހާރު ވިސްނަމުންދަނީ ސީޒަނުގައި ކާމިޔާބު ހޯދުމަށް ކަމަށެވެ.

ރޮބެން އަދި ރިބެރީގެ މޮޅު ކުޅުމާއެކު ބަޔާނުން ބުންޑެސްލީގާގެ ތަށި ޔަގީންކޮށްފައިވާއިރު އެ ޓީމަށް ޖަރުމަނު ކަޕް ކާމިޔާބު ކުރުމުގެ ފުރުސަތު ވެސް މި ސީޒަނުގައި ވަނީ ހުޅުވާލެވިފައެވެ.