ސްޕެނިޝް ލަލީގާގައި އަލަށް ޕްރޮމޯޓްވި ޖިރޯނާ އަތުން މިދިޔަ ސީޒަނުގެ ޗެމްޕިއަން ރެއާލް ބަލިވެއްޖެއެވެ.
ސްޕެއިންގެ މައި ސަރުކާރުން ވަކިވެގަތުމަށް މަސައްކަތް ކުރަމުން އަންނަ ކެޓަލޯނިއާއަށް ނިސްބަތްވާ ޓީމެއް ކަމަށްވާ ޖިރޯނާ އަތުން ރެއާލް ބަލިވެފައި ވަނީ 2-1 ގެ ނަތީޖާއަކުންނެވެ. ސްޕެނިޝް ލީގުގައި އެންމެ މަދު ސްޕޯޓަރުންނަށް ވަދެވޭ ޖިރޯނާގެ ސްޓޭޑިއަމްގައި ކުޅުނު މި މެޗުގައި ރެއާލްގެ ފަރާތުން ފެނިގެން ގޮސްފައި ވަނީ ދަށް ކުޅުމެކެވެ.
ޖިރޯނާއިން ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައިވާއިރު މެޗުގެ ފުރަތަމަ ލަނޑު ޖަހާ ލީޑު ނަގާފައި ވަނީ ރެއާލް އިންނެވެ. އެގޮތުން މެޗުގެ 12 ވަނަ މިނެޓުގައި މި ލަނޑު އެ ޓީމަށް ޖަހައިދިނީ އިސްކޯއެވެ. މި ލަނޑަކީ ޖިރޯނާއިން އުފެއްދި ހަމަލާއެއް ކައުންޓާ އެޓޭކަށް ބަދަލު ކޮށްލައިގެން ރެއާލްއިން ކާމިޔާބު ކޮށްދިން ލަނޑުންނެވެ. މި ލަނޑަށް ފަހު ވެސް ރެއާލްއަށް މެޗުގެ ކޮންޓްރޯލް ނެގިފައި ނުވާއިރު 35 ވަނަ މިނެޓުގައި ޖިރޯނާއިން އުފެއްދި ހަމަލާއެއް އަމާޒުވީ ރެއާލްގެ ގޯލުގެ ދަނޑިއަށެވެ.
ފުރަތަމަ ހާފު 1-0 ގެ ނަތީޖާއަކުން ރެއާލް ކުރީގައި އޮވެގެން ނިމުނު އިރު ދެވަނަ ހާފުގައި ވެސް ޖިރޯނާއިން ވަނީ މެޗުގެ ކޮންޓްރޯލް ދަމަހައްޓާފައެވެ. ދެވަނަ ހާފު ފެށިގެން އެ ޓީމުގެ ކުޅުން އިތުރަށް ރަނގަޅު ކުރިއިރު ޖިރޯނާއަށް ނަތީޖާ ހަމަހަމަ ވެގެން ދިޔައީ 54 ވަނަ މިނެޓުގައި ކްރިސްޓިއަން ސްޓުއާނީ ކާމިޔާބު ކޮށްދިން ލަނޑުންނެވެ. މި މެޗުގެ ލީޑު ޖިރޯނާއަށް ލިބިގެން ދިޔައީ 58 ވަނަ މިނެޓުގައި ޕަބްލޯ މަފެއޯގެ އެހީތެރި ކަމާއެކު ކްރިސްޓިއަން ޕޯޓޫ ކާމިޔާބު ކޮށްދިން ލަނޑުންނެވެ.
ސްޕެނިޝް ލީގުގައި ސެވިއްޔާ ވަނީ 2-1 ގެ ނަތީޖާއަކުން އަމިއްލަ ދަނޑުގައި ލެގަނޭސް ބަލިކޮށްފައެވެ. މެޗުގައި ވިސާމް ބެން ޔަދާރްއާ ޕަބްލޯ ސަރާބިއާ ސެވިއްޔާއަށް ލަނޑުތައް ޖަހައިދިން އިރު ލެގަނޭސްގެ ހަމައެކަނި ލަނޑު ލިބުނު ޕެނަލްޓީއަކުން ކާމިޔާބު ކޮށްދިނީ އެލެކްސެންޑާ ސިޒްމަނޯސްކީއެވެ.
ގެޓާފޭ ވެސް އަމިއްލަ ދަނޑުގައި 2-1 ގެ ނަތީޖާއަކުން ރެއާލް ސޮސިއެޑާޑް އަތުން މޮޅުވިއިރު މަލާގާ ވެސް ވަނީ އަމިއްލަ ދަނޑުގައި 2-1 އަކުން ސެލްޓަ ވީގޯ ބަލިކޮށްފައެވެ. އެއިބާއާ ލެވަންޓޭ ބައްދަލުކުރި މެޗު ނިމިފައިވަނީ 2-2 ގެ ނަތީޖާއަކުން އެއްވަރުވެގެންނެވެ.
ސްޕެނިޝް ލަލީގާގެ ޕޮއިންޓް ތާވަލަށް ބަލާލާއިރު އެއްވަނައިގައި 28 ޕޮއިންޓާއެކު ބާސާ އޮތްއިރު 24 ޕޮއިންޓާއެކު ދެވަނައިގައި އޮތީ ވެލެންސިއާއެވެ. އަދި 20 ޕޮއިންޓާއެކު ފައިދާ ލަނޑު އިތުރު ވުމުން ރެއާލްއަށް ތިންވަނަ ލިބޭއިރު ހަތަރު ވަނަ ލިބެނީ އެޓްލެޓިކޯ މެޑްރިޑަށެވެ.
