ޔާމީނަށް ޙުކުމްކުރަން އަންގައި، ވަޒީރެއްގެ ސީކްރެޓް ޗެޓެއް ހައިލަމްއަށް ފޮނުވިކަމަށް ބުނާ ޓްވީޓު ސައްޙައެއް ނޫން
6 ސެޕްޓެމްބަރު 2021 | ހޯމަ 10:00ނަޖީބް ހައިލަމްއަށް ބޮޑެތި ތުހުމަތުތަކެއް ކުރައްވާފައިވޭ
ކްރިމިނަލް ކޯޓުގެ ކުރީގެ އިސްގާޒީ އަހުމަދު ހައިލަމް
ކުރީގެ ރައީސް އަބްދުﷲ ޔާމީނުގެ މައްސަލައިގައި ވަކި ގޮތަކަށް ޙުކުމްކުރުމަށް ސަރުކާރުގެ ވަޒީރެއްގެ އެންގުމެއް އޭރުގެ އިސްގާޒީ އަހުމަދު ހައިލަމްއަށް ލިބިވަޑައިގެންފައިވާކަމަށް ބަޔާންކޮށް، ހައިލަމްގެ ނަމުގައި ދައުރުކުރަމުންދަނީ ސައްޙަ ޓްވީޓެއް ނޫންކަމަށް އޭނާ ވިދާޅުވެއްޖެއެވެ.
ކްރިމިނަލް ކޯޓުގެ ކުރީގެ ގާޒީ ޙަސަން ނަޖީބު ހިމެނޭގޮތަށް ކުރީގެ ބައެއް ގާޒީން ބޭއްވި ނޫސްވެރިންގެ ބައްދަލުވުމެއްގައި ހައިލަމްއަށް ބޮޑެތި ތުހުމަތުތަކެއް ކުރައްވާފައިވާއިރު، މި ތުހުމަތުތައް ކުރެއްވިތާ މާ ގިނައިރު ނުވަނީސް ހައިލަމްގެ ނަމުގައި ޓްވީޓެއް ދައުރުވާން ފެށިއެވެ. އެގޮތުން ސަރުކާރުގެ ވަޒީރަކު ރައީސް ޔާމީނަށް ޙުކުމް ކުރެއްވުމަށް އަންގަވައި ޓެލެގްރާމް "ސީކްރެޓް ޗެޓް" ގައި މެސެޖުކުރެއްވި ކަމަށާއި، އެ މެސެޖަށް ރިޕްލައި ކުރައްވާފައި ނުވާނެކަމަށް ބަޔާންކޮށްފައިވާ ޓްވީޓެއް ވަނީ ދައުރުވެފައެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ހައިލަމް ވިދާޅުވީ، ދައުރުވަމުންދާ ޓްވީޓަކީ އޭނާގެ ޓްވިޓަރ އެކައުންޓާ ދާދި އެއްގޮތަކަށް ނަން ޖަހައި، އޭނާގެ ފޮޓޯ ޖަހައިގެން ހަދާފައިވާ ފޭކް އެކައުންޓަކުން ކޮށްފައިވާ ޓްވީޓެއް ކަމަށެވެ. އެގޮތުން ދަައުރުވަމުންދާ އެކައުންޓުގައި އިނގިރޭސި އަކުރުތަކުގެ ތެރެއިން ހައިލަމްގެ ނަމުގެ "އެލް" އަކުރުގެ ބަދަލުގައި ކެޕިޓަލް އަކުރުން "އައި" ލިޔެފައިވާކަން ހައިލަމް ފާހަގަކުރެއްވިއެވެ. އެގޮތުން އެ ޓްވީޓު ކުރުމަށްފަހު މިހާރު ޓްވީޓު ކުރި އެކައުންޓު ވެސް ވަނީ ޑީއެކްޓިވޭޓް ކޮށްލާފައެވެ.
ހައިލަމް ވަނީ އޭނާގެ ޓްވިޓަރ އެކައުންޓުން އެކަމުގެ ޙަޤީޤަތް ބަޔާން ކުރައްވައި ޓްވީޓެއް ވެސް ކުރައްވާފައެވެ.
ހައިލަމް ވިދާޅުވީ، މިއީ ނޫސްވެރިންގެ ބައްދަލުވުމުގައި ދެއްކެވި ވާހަކަތަކަަށް ބާރު ދިނުމުގެ ގޮތުން ބަޔަކު ރާވައިގެން ކޮށްފައިވާ ކަމެއް ކަމަށެވެ.
