އެލްޖީއޭ ބޯޑަށް މަޖިލީހުން އައްޔަން ކުރާ 3 މެމްބަރުންނަށް ރުހުން ދީފި
6 ސެޕްޓެމްބަރު 2021 | ހޯމަ 08:20ތިން ދާއިރާއަކުން މެމްބަރުން އައްޔަން ކުރެއްވުމަށް ރައީސް ފޮނުއްވާފައިވަނީ 5 ނަންފުޅެއް
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ލޯކަލް ގަވަރމެންޓް އޮތޯރިޓީގެ ބޯޑަށް ރައްޔިތުންގެ މަޖިލީހުން އައްޔަން ކުރާ ތިން މެމްބަރުންނަށް މަޖިލީހުން ރުހުން ދީފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގައި ބަޔާންކޮށްފައިވާ ގޮތުގެމަތިން، ލޯކަލް ގަވަރމަންޓް އޮތޯރިޓީގެ ބޯޑުގެ މެންބަރުކަމަށް 3 ބޭފުޅަކު ޢައްޔަންކުރެއްވުމަށްޓަކައި، ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ލާމަރުކަޒީ ކޮމިޓީން ދިރާސާކުރުމަށްފަހު މަޖިލީހުގެ ތަޅުމަށް ފޮނުވުމުން އެ ނަންފުޅުތަކަށް ވޯޓަށް އަހާފައިވަނީ ހޯމަ ދުވަހުއެވެ.
ތިން ދާއިރާއަކުން މެމްބަރުން އައްޔަން ކުރެއްވުމަށް ރައީސް ފޮނުއްވާފައިވަނީ 5 ނަންފުޅެކެވެ. އޭގެތެރޭގައި ހިމެނެނީ އަންހެން ބޭފުޅުންނެވެ. މިބޭފުޅުންގެ ތެރެއިން ރައްޔިތުންގެ މަޖިލީހުގެ ލާމަރުކަޒީ ކޮމިޓީން އިންޓަރވިއު ކުރެއްވި ބޭފުޅުންގެ ތެރެއިން ތަޅުމަށް ފޮނުވީ 3 ނަންފުޅެކެވެ.
ރައްޔިތުންގެ މަޖިލީހުން ލޯކަލް ގަވަމެންޓް އޮތޯރިޓީގެ ބޯޑަަށް މެމްބަރުން އައްޔަން ކުރާ 3 ދާއިރާއަަކީ، ޖެންޑަރ އިކުއަލިޓީ ދާއިރާއާއި ގަވަރނެންސްގެ ދާއިރާ އަދި މަދަނީ ޖަމްއިއްޔާތަކުން މެމްބަރެކެވެ.
ޖެންޑަރ އިކުއަލިޓީ ދާއިރާއިން އައްޔަން ކުރުމަށް މަޖިލީހުން ފާސްކުރީ، އަޒްހާ ޒަމީރު، މ. ލިލީސް އެވެ. އަޒްހާ އައްޔަން ކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 43 މެމްބަރުންގެ އިއްތިފާގުންނެވެ. ގަވަރނެންސްގެ ދައިރާއިން އައްޔަން ކުރުމަށް ފާސްވީ، ފާތިމަތު ނިއުމާ، ގ. ހިމާލިޔާގެ އެވެ. ނިއުމާ އައްޔަން ކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 43 މެމްބަރުންގެ އިއްތިފާގުންނެވެ. މަދަނީ ޖަމްއިއްޔާތަކުން އައްޔަން ކުރުމަށް ފާސްވީ، ފާތިމަތު ޒީނާ، ހ. ރައިޒިންސަން އެވެ. ޒީނާ އައްޔަން ކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެެ.
ލޯކަލް ގަވަރމަންޓް އޮތޯރިޓީގެ ބޯޑު އެކުލެވިގެންވަނީ 9 މެމްބަރުންގެ މައްޗަށެވެ.
