މިނިސްޓްރީ އޮފް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން މިހާރުވެސް 251 ޕްރޮޖެކްޓެއް ކުރިއަށް ގެންދާކަމަށް މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، މެމްބަރުންގެ ފަރާތުން މިނިސްޓަރ އަސްލަމާ ކުރެއްވި ސުވާލުތަކަށް ޖަވާބު ދެއްވަމުންނެވެ. ހޯމަދުވަހުގެ ޖަލްސާއަށް އެޖެންޑާ ކޮށްފައި އޮތީ، ކަނޑިތީމު ދާއިރާގެ މެންބަރު ޢަބްދުﷲ ޝަހީމް ޢަބްދުލްޙަކީމްގެ ފަރާތުން ފޭދޫ، ބިލެތްފަހި، ގޮއިދޫ، އަދި ނޫމަރާގެ ފެނާއި ނަރުދަމާގެ މަސައްކަތް ނުފެށި ލަސްވާ ސަބަބާއި، އަމަލީ މަސައްކަތް ފެށޭނެ ދުވަހާ ގުޅޭ ގޮތުން ސުވާލު ކުރެއްވުމެވެ.

މިނިސްޓަރ އަސްލަމް ވިދާޅުވީ، ފޭދޫގެ ފެނާއި ނަރުދަމާއަކީ، އޮފިޑް ފޭސް 3 ގެ ދަށުން ކުރިއަށްދާ މަސައްކަތެއް ކަމަށާއި، މަސައްކަތުގެ ސާރވޭ ނިމިފައިވާކަަމަށެވެ. އަދި ޕަމްޕް ސްޓޭޝަން ތަކާއި، އަދި އޮފީސް އިމާރާތް އެޅުމަށް ބިން ހޯދުމުގެ މަސައްކަތް ކުރިއަށްދާ ކަމަށެވެ. މަޝްރޫއުގައި 180 ދުވަސް ޑިޒައިން ފޭސްއަށް ކަނޑައަޅާފައިވާ ކަމަށާއި، އެއްކޮށް މަޝްރޫއު ނިންމުމަށް ކަނޑައަޅާފައިވަނީ ދޮޅު އަހަރު ކަމަށެވެ. އެ މަޝްރޫއުގެ މަސައްކަތް ކުރިއަށްދާ ކަން މިނިސްޓަރު ފާހަގަކުރެއްވިއެވެެ.

ބިލެެތްފަހީގެ ފެނާއި ނަރުދަމާގެ މަޝްރޫއަކީ، ޕީއެސްއައިޕީގެ ދަށުން ކުރިއަށް ގެންދަން ނިންމާފައިވާ މަޝްރޫއެއްކަމަށާއި، ދެފަހަރެއްގެ މަތިން ޓެންޑަރަށް ހުޅުވާލި ކަމަށެވެ. އެހެންނަމަވެސް އެކަށީގެންވާ ކޮންޓްރެކްޓަރެއް ލިބިފައި ނުވާ ކަން މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ، ދެން ބަލަން ޖެހޭނީ، އެސްއޯއީއަކާ ހަވާލުކޮށްގެން މަޝްރޫއު ކުރިއަށް ގެންދިޔުމަށް ކަމަށެވެ. ބިލެތްފަހި ހިމެނޭ ގޮތަށް 11 ރަށެއްގެ ފެނާއި ނަރުދަމާ ވެސް މީގެތެރޭގައި ހިމެނޭ ކަމަށް އަސްލަމް ވިދާޅުވިއެވެ. އަސްލަމް ވިދާޅުވީ، އެސްއޯއީތަކާއެކު މިކަމުގައި މަޝްވަރާ ކުރާނެ ކަމަށެވެ.

މެމްބަރުންވަނީ އެ މެމްބަރުންގެ ދާއިރާގައި ހިނގަމުންދާ ތަރައްގީގެ މަޝްރޫއުތަކާ ގުޅޭގޮތުން މިނިސްޓަރާ ސުވާލު ކުރައްވާފައެވެ. މިނިސްޓަރ ވިދާޅުވީ، އެ މަޝްރޫއުތަކާ ގުޅޭ ގޮތުން މެމްބަރުންނަށް ވަކިން ބައްދަލު ކުރެއްވުމުގެ ފުރުސަތު އޮންނާނެ ކަމަށެވެ. ހޯމަ ދުވަހުގެ ޖަލްސާއަށް ވަޑައިގެންނެވީ ހަމައެކަނި ފެނާއި ނަރުދަމާގެ މަޝްރޫއުތަކާ ގުޅޭގޮތުން ކުރައްވާ ސުވާލުތަކަށް ތައްޔާރުވެވަޑައިގެން ކަމަށެވެ. މި ދައުރުގަައި މިނިސްޓަރާ އަދިވެސް އިތުރު ސުވާލު ކުރުމަށް ހަމަޖެހިފައިވާކަން ރިޔާސަތުން ފާހަގަކުރެއްވިއެވެ.