އޯޑިއޯތަކެއް ހަދައިގެން އުޅެނީ ރައީސް ޔާމީނުގެ ޝަރީއަތަށް ނުފޫޒު ފޯރުވަން: އަލީ ޒާހިރު
މިއީ ސިޔާސީ ގޮތުން ރައީސް ޔާމީނުގެ ޝަރީއަތަށް ނުފޫޒު ފޯރުވުން
އަލީ ޒާހިރު - ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް
އޯޑިއޯތަކުގެ ވާހަކަ މި ދަނޑިވަޅުގައި ދައްކަމުންދަނީ ރައީސް ޔާމީންގެ ޝަރީއަތަށް ނުފޫރު ފޯރުވުމަށް ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
މިފަދައިން ވިދާޅުވީ އަލީ ޒާހިރުގެ މައްޗަށް ފަނޑިޔާރުންނަށް ނުފޫޒު ފޯރުވާކަމުގެ ބޮޑެތި ތުހުމަތުތަކެއް ކުރެވިފައިވާ ދަނޑިވަޅެއްގައި، ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން ވާހަކަދައްކަވަމުންނެވެ. އަލީ ޒާހިރު ވިދާޅުވީ މި ސަރުކާރުން ކޯޓުތަކާއި، ފަނޑިޔާރުންނަށް އެއްވެސް ނުފޫޒެއް ފޯރުވާފައި ނުވާނެ ކަމަށެވެ. އަދި ކުރިއަށް އޮތް ތަނުގައިވެސް މިފަދަ ކަމެއް މި ސަރުކާރުން ނުކުރާނެ ކަމަށެވެ.
ކޯޓުތަކާއިމެދު އާންމު ރައްޔިތުންގެ އިތުބާރު އިތުރަށް ރަނގަޅުވަމުން އަންނަ ކަމަށާއި، މިފަދަ ވަގުތެއްގައި ފަނޑިޔާރުންތަކަކާއި ގުޅޭ އޯޑިއޯއެއް ލީކުކޮށްގެން އުޅެނީ ރައީސް ޔާމީންގެ ޝަރީއަތަށް ނުފޫޒު ފޯރުވުމަށް ސިޔާސީ ބޭނުމެއްގައި ކަމަށް އަލީ ޒާހިރު ވިދާޅުވިއެވެ. މި ވާހަކަ އެންމެ ބޮޑަށް ދައްކަމުންދަނީވެސް އިދިކޮޅުން ކަމަށާއި، މިއީވެސް އިއްތިފާގަކުން ހިނގާ ކަމެއް ކަމަށް ވެދާނެ ކަމަށް އަލީ ޒާހިރު ވިދާޅުވިއެވެ.
ކުރީގެ ފަނޑިޔާރުންތަކަކާއި، ވަކީލުންތަކެއް ބައިވެރިވި ނޫސްވެރިންގެ ބައްދަލުވުމުގައި ތިބި ފަނޑިޔާރުން ފަނޑިޔާރު ކަމުން ވަކިވާން ޖެހުނު ސަބަބަށް ބެލުމުންވެސް މިއީ ސިޔާސީ ވާހަކައެއްކަން އެނގޭނެ ކަމަށް އަލީ ޒާހިރު ވިދާޅުވިއެވެ. އަދި މި ވާހަކައަކީ މީގެ ކުރިން ކޯޓުތަކަށް ބާރު ފޯރުވާފައިވާ ބަޔަކު، މިހާރު ކުރާ މަސައްކަތް ކާމިޔާބު ނުވުމުން ކުރާ ކަމެއް ކަމަށް ވިދާޅުވިއެވެ. އަދި މިއީ ސީދާ އިދިކޮޅުން ކުރާ ކަމެއް ކަމުގެ ތުހުމަތުވެސް އަލީ ޒާހިރު ވަނީ ކުރައްވާފައެވެ.
ފަނޑިޔާރުންނާއި ގުޅޭގޮތުން ލީކުވެފައިވާ އޯޑިއޯގައިވަނީ އަލީ ޒާހިރަށް ވަރަށް ބޮޑެތި ތުހުމަތުތަކެއް ކުރައްވާފައެވެ. ރައީސް ޔާމީންގެ މައްސަލަ ބެއްލެވި 5 ގާޒީންގެ ބެންޗުގައި ހިމެނިވަޑައިގެންނެވި ހުސައިން ފާއިޒް ރަޝާދުކަމަށް ބުނާ ބޭފުޅަކު ވާހަކަ ދައްކަވާ މި އޯޑިއޯގައި އޭނާ ވަނީ ޔާމީނަށް ކޯޓުން ހުކުމް ކުރީ ގާޒީން "ރަހީނުކޮށްގެން"ކަމަށް ދޭހަވާ މޭރުމުން ވާހަކަ ދައްކަވާފައެވެ. އޭނާ ވަނީ ސިޔާސީ މީހުންގެ މައްސަލަ ބެލުމަކީ ފާޑެއްގެ ކަމެއް ކަމަށް ވިދާޅުވެ, ނުހައްގުން ހުކުމެއްކޮށް ޖަލުގައި ދުވަސްތައް ހޭދަކުރަން ޖެހުމަކީ ރައީސް ޔާމީނަށް އޮންނަ ތާއީދު ވެސް އިތުރުވެގެން ހިނގައިދާނެ ކަމެއްކަމަށް ވިދާޅުވެފައެވެ. މި އޯޑިއޯގެ މައުލޫމާތު ވަރަށް ސާފުކޮށް އެނގޭ މީހަކު ވަނީ މި އޯޑިއޯތަކަކީ ސައްހަ އޯޑިއޯތަކެއް ނޫންކަން ރާއްޖެއެމްވީއަށް ކަށަވަރުކޮށްދީފައެވެ.
މި އޯޑިއޯ ރެކޯޑިންތަކުގެ މައްސަލަ ޖޭއެސްސީން މިހާރު ތަހުގީގުކުރަމުންދާއިރު، މި މައްސަލައިގެ ތަހުގީގަށް އެ ފަނޑިޔާރުންގެ އޯޑިއޯ ސާމްޕަލް ވެސް ވަނީ ނަގާފައެވެ. ޖޭއެސްސީން ބުނީ އަމިއްލަ ފަރުދަކު ވިޔަސް، ދައުލަތުގެ ކަމެއް ހިންގުމާ ހަވާލުވެ ހުރި މީހަކު ވިޔަސް، ފަނޑިޔާރުންގެ މަސައްކަތާ ބެހި ނުފޫޒުފޯރުވާކަމަށް ކުރެވޭ ތުހުމަތުތަކަކީ، ފަނޑިޔާރު ގޭގެ އިތުބާރު ނެގެހެއްޓުމާއި، ފަނޑިޔާރު ގޭގެ މިނިވަންކަމާއި އިންސާފުވެރިކަން ކަށަވަރުކޮށް ދެމެހެއްޓުމަށްޓަކައި ވަކިން ޚާއްސަ ސަމާލުކަމެއް ދީގެން ކޮމިޝަނުން ތަހުގީގު ކުރާނެ ކަމެއް ކަމަށެވެ.
