ކޮވިޑްގެ އެކްޓިވް ކޭހުގެ އަދަދު 2002ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ބަލިން ރަނގަޅުވެފައިވަނީ 121 މީހުންނެވެ. އަދި 157 މީހަކު އަލަށް ކޮވިޑަށް ޕޮޒިޓިވްވެފައިވެއެވެ. އެއީ 4544 ސާމްޕަލްގެ ތެރެއިންނެވެ.

މީގެތެރެއިން 45 މީހަކު ޕޮޒިޓިވްވެފައިވަނީ މާލެ ސަރަހައްދުންނެވެ. އަދި 106 މީހުން ޕޮޒިޓިވްވެފައިވަނީ އަތޮޅުތަކުންނެވެ. ހިނގަމުންދާ ރިސޯޓްތަކުން 6 މީހަކު ވަނީ ކޮވިޑަށް ޕޮޒިޓިވްވެފައެވެ.

މިއާއެކު ރާއްޖެއިން ޖުމްލަ ކޮވިޑަށް ޕޮޒިޓިވްވި މީހުންގެ އަދަދު ވަނީ 81،810ށް އަރާފައެވެ. އަދި 79،569 މީހުން ވަނީ ބަލިން ރަނގަޅުވެފައެވެ. ބަލި ޖެހުނު މީހުންގެ ތެރެއިން 226 މީހަކު ވަނީ ނިޔާވެފައެވެ.

މިވަގުތު 27 މީހަކަށް އަންނަނީ ހޮސްޕިޓަލްތަކުގައި ފަރުވާދެމުންނެވެ.

އޮގަސްޓް މަހުގެ 30ން ފެށިގެން ރާއްޖޭގައި ކޮވިޑަށް ޕޮޒިޓިވްވާ މީހުން ރިޕޯޓްކުރަމުން އަންނަނީ 150ން މަތިންނެވެ. އެގޮތުން އޮގަސްޓް މަހުގެ 30 ވަނަ ދުވަހު 169 މީހުން ކޮވިޑަށް ޕޮޒިޓިވްވެފައިވާއިރު އެދުވަހު އަތޮޅުތަކުން 119 މީހުން ވަނީ ޕޮޒިޓިވްވެފައެވެ. އޮގަސްޓް މަހުގެ 31 ވަނަ ދުވަހު 152 މީހުން ކޮވިޑަށް ޕޮޒިޓިވްވެފައިވާއިރު އެދުވަހު އަތޮޅުތަކުން 74 މީހުން ވަނީ ކޮވިޑަށް ޕޮޒިޓިވްވެފައެވެ. އަދި ސެޕްޓެމްބަރ މަހުގެ 1 ވަނަ ދުވަހު 189 މީހުން ކޮވިޑަށް ޕޮޒިޓިވްވެފައިވާއިރު އަތޮޅުތަކުން ޕޮޒިޓިވްވި އަދަދު ހުރީ 119 ގައެވެ. ސެޕްޓެމްބަރ މަހުގެ 2 ވަނަ ދުވަހު ކޮވިޑަށް ޕޮޒިޓިވްވެފައިވަނީ 173 މީހުންނެވެ. އެދުވަހު އަތޮޅުތަކުން 89 މީހުން ވަނީ ޕޮޒިޓިވްވެފައެވެ. ސެޕްޓެމްބަރ މަހުގެ 3 ވަނަ ދުވަހު އަތޮޅުތަކުން ޕޮޒިޓިވްވި 120 މީހުންނާއެކު ޖުމްލަ 179 މީހުން ވަނީ ކޮވިޑަށް ޕޮޒިޓިވްވެފައެވެ.

ރާއްޖޭގައި ކޮވިޑްގެ ހަތަރު ވަނަ ރާޅަށް ފަހު ހާލަތު ރަނގަޅުވަމުން އައިސް މިހާރަކަށް އައިސް އަންނަނީ އަނެއްކާވެސް ނަންބަރުތައް މަތިވަމުންނެވެ. އެޗްޕީއޭއިން އަންނަނީ ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަން ދިނުމަށް އިލްތިމާސްކުރަމުންނެވެ.