ސްކޫލްތަކަށް ފޮތްތައް ފޮނުވުމުގެ މަސައްކަތް އަދިވެސް ނުނިމޭ: މިނިސްޓަރ

ދަރިވަރުންނަށް ބޭނުންވާ ފޮތްތައް ސްކޫލްތަކާ ހަވާލުކުރުމުގެ މަސައްކަތް އަދިވެސް ނުނިމޭކަމަށް އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވެއްޖެއެވެ.

ދިރާސީ އައު އަހަރުގެ ކިޔެވުން ފެށިއިރުވެސް ބައެއް ގްރޭޑްތަކުގެ ދަރިވަރުންނަށް ފޮތްތަކުގެ ހާރޑް ކޮޕީ ލިބިފައެއް ނުވެއެވެ. ފޮތްތަކުގެ ހާރޑް ކޮޕީ ނުފޮނުވި ހުރި ގްރޭޑްތަކަށް އެތަކެތި ފޮނުވުމުގެ މަސައްކަތް މިދިޔަ އޮގަސްޓު މަހުގެ 21 ވަނަ ދުވަހު އެޑިއުކޭޝަން މިނިސްޓްރީން ވަނީ ފަށާފައެވެ.

ސްކޫލްތަކަށް ފޮތްތައް ފޮނުވުމާ ގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓަރ ވިދާޅުވީ, މި ގްރޭޑްތަކަށް ބޭނުންވާ ފޮތްތަކުގެ ހާރޑް ކޮޕީތައް މިނިސްޓްރީއަށް ލިބިފައިވާކަމަށެވެ. އެހެންނަމަވެސް ބައެއް ރަށްރަށަށް އަދިވެސް ފޮތްތައް ފޮނުވިފައި ނުވާކަމަށެވެ. އެއީ މި ފޮތްތައް ގެންދާނެ ގޮތެއް ނެތިގެން ކަމަށް މިނިސްޓަރ ވިދާޅުވިއެވެ. އެހެންނަމަވެސް ގިނަ ސްކޫލްތަކަށް މިހާރު ފޮތްތައް ފޮނުވާފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ ފޮތްތަކުގެ ހާރޑް ކޮޕީތައް ނެތް ނަމަވެސް ހުރިހާ ގްރޭޑެއްގެ ކުދިންނަށްވެސް އެ ފޮތްތަކުގެ ސޮފްޓް ކޮޕީ ދީފައިވާނެ ކަމަށާއި, ހާރޑް ކޮޕީ ނެތަސް ކިޔެވުން ނުހުއްޓޭނެ ކަމަށެވެ.

ދިރާސީ އައު އަހަރުގެ ކިޔެވުން ފަށާފައިވަނީ ގިނަ ދުވަސްތަކެއް ވަންދެން ސްކޫލްތަކުގެ ކިޔެވުން އޮންލައިންކޮށް ކުރިއަށްގެންދިއުމަށްފަހުއެވެ. ދަރިވަރުން އަނބުރާ ސްކޫލްތަކަށް ގެންދިއުމަށް ސްކޫލްތަކުން އޮތީ ވަރަށް ބޮޑަށް ތައްޔާރުވެފައެވެ. އެގޮތުން ދަރިވަރުން ސްކޫލަށް ވަންނަ އިރު ހުން ބެލުމާއި އަތް ސާފުކުރުމުގެ ކަންކަން ކުރިއަށްގެންގޮސްފައިވެއެވެ. މިއީ އެޑިއުކޭޝަން މިނިސްޓްރީން އެކުލަވާލާފައިވާ ގައިޑްލައިންތަކުގައި ހިމަނާފައިވާ ކަންކަމެވެ.

ގައިޑްލައިންގައި ހިމަނާފައިވާ ގޮތަށް ކްލާސްރޫމްތަކުގައި ދަރިވަރުން ތިބޭއިރު ގައިދުރުކަން ހުންނާނެހެން ކުދިންގެ ގޮނޑިތައް އެތުރުމުގެ އިންތިޒާމު ވަނީ ހަމަޖައްސާފައެވެ. މީގެ އިތުރުން ދަރިވަރުން ސްކޫލް ތެރޭގައި އުޅޭއިރުވެސް ގައިދުރުކޮށް އުޅެވޭނެ އިންތިޒާމުތައް ވަނީ ހަމަޖައްސާފައެވެ. ދަރިވަރުންގެ ކިބައިން ކޮވިޑް-19ގެ އެއްވެސް އަލާމާތެއް ފެންނަން ހުންނަނަމަ ދަރިވަރުން ސްކޫލަށް ނުފޮނުވުމަށް އެޑިއުކޭޝަން މިނިސްޓްރީން މީގެ ކުރިން އަންގާފައިވެއެވެ. ސްކޫލްތަކުގައި ބަލި ފެތުރުން ހުއްޓުވޭނީ މިގޮތަށް އަމަލުކޮށްގެން ކަމަށް އެޑިއުކޭޝަން މިނިސްޓްރީން ބުނެފައިވެއެވެ.